Thlauh hna hlah u!

Kan ngakchiat lio sianginn kan kai history kong kan cawn tikah ramkong he pehtlai in rian a ttuan mi hna konglam hi a tam bik in rak cawn a sitawn. Thil an rak tuah khawh ning, ram le miphun caah an nun thap in an rak cawlcanghnak kong hna kha philh lo ding le an mah hna bangin ram dawtnak lungthin kan ngeih khawh cio nak hnga ding caah le kan ram sining hna zong theih thiam ding caah tiin rak cawn a rak si. History kan cawnnak ah hin vawlei thil sining hna le miphun tthancho khawhnak hnga ding caah tiin rian a rak ttuanmi hna kong hi a tam deuh in cawn a si caah mah ram a him nak hnga ding caah rian a rak ttuanmi hna sining ah hin, raltuk nak te hna, i kahthahnak te hna hi an i tel. An rianttuannak i hmuitinh cio mi cu “ram daihnak le luatnak” hmuh khawhnak ding caah hin funtom khawh a si.

Kan nih Khrihfa mi hna zong nih thlarau a him nak hnga ding caah tiin history kan ngei ve. Vawlei sining le kalpi ning bang siloin, tangdornak le lungsaunak, nawl ngaihnak le sumnak in “daihnak” rian hi rak ttuan a si ve. Thlarau lei he pehtlai in ral cu kan tu ve, sihmanhsehlaw intuarnak in a si. Nawl ngaihnak in a si. Jesuh Khrih nunzia le cawnpiak nak hna kha a zul mi kan si.

Tthatnak a tuah mi hna kha dirpi a si i hrem a ing mi hna kha in pi ve a si. Thlarau khamh a si khawhnak hnga ding caah minung kar lakah thleidannak a um lo. Zeicah tiah cun Khrih pum chungah pumkhat, Pathian muisam in sermi sinak ah muisam khat kan si ve caah a si. Mirum, mitthawng, sifak santlailo tiin thleidannak lunghthin a um lo.

Israel upa 70 thim a si mi hna chungin minung pahnih Eldad le Medad hna cu Pathian nih a thlarau a pek hna lio ah an um lo nain, an riahnak hmun khan bia an chim cuahmah ve timi kha hmuh an si tikah tlangval pakhat a va tli i Moses sinah a va phuan. Cu tikah Joshua nih: “Ka bawipa Moses, thlauh hna” tiah a ti. Sihmanhsehlaw Moses nih anih cu, “Keimah ca lawngin dahra na ruah hi? Bawipa mi vialte hi profet si dih in, annih cungah Bawipa nih a thlarau chia sehlw ka hei tinak lakah cun!” tiah a ti.(Number 11:24-29). Pathian rian a ttuanmi hna nih tthatnak a tuah tu hna an hmuh an theih hna tikah an lawmhpi ve hna i an ttanh hna, thleidannak lungthin an ngei hna lo timi kan hmuh khawh.

Cun biakamthar chungah Johan nih Jesuh kha a thawh i, “”Saya, na min in khuachia a tthawlmi pakhat kan hmuh i kan bu chungmi a si lo caah, tuah ti hlah, kan ti,” tiah a chimh. Jesuh nih cun, “Tuah ti hlah, ti hlah u, zeicahtiah ka min in khuaruahhar mi thil a tuahmi nih cun ka thang cu a ka chiat kho lai lo. A kan doh lomi cu a kan bawmmi an si”tiah a ti(Mk 9:38-40).

Jesuh hrimhrim nih tthatnak a tuahmi hna kha ttanhpi dingin a kan fial. Zeicah kan ti a si ah cun Jesuh Khrih hrimhrim cu tthatnak, dawtnak, daihnak le a hmaanmi a si caah a si. Tthatnak a tuahmi hna kha dirpi cio hna u sih. An rianttuannak ah teinak an hmuh khawhnak hnga ding caah thla zong campiak cio hna u sih.