Zohkhenhtu vancung mi hna puai ni ah

Cu caan ah cun a zultu hna kha Jesuh sinah khan an ra i, “Vancung Pennak ah ahodah a ngan bik?” tiah an hal. Jesuh nih ngakchiapate pakhat kha a auh i an hmaiah a dirter i, “Nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo. Vancung Pennak chung i a ngan bik cu mi toiah aa dor i hi ngakchia bantuk ah aa cangmi cu a si. Cun ngakchia hi bantuk pakhatkhat kha ka min in nan conglawmh hna ahcun, keimah nan ka conglawmh a si. Hi ngakchia tete hi pakhat hmanh zawmhtaih hna hlah u. Annih a vengtu hna an vancungmi kha vancung khua ah ka Pa hmaika ah an um zungzal ko.”(Matt 18:1-5,10)

Nihin cu bupi zohkhenhtu vancung mi hna puai a kan tuah piak. Nihin kan relmi cathiang zong nih midang cungah zawmhtaihnak lungthin ngeih lo ding in a kan cawnpiak. Zeicah tiah cun midang nu/pa va zawmhtaih cu anmah lawng zawhtaih siloin anmah a zohkhenhtu vancungmi zongkha zawhtaih a si.  Pathian kan i bochannak ah hin ngakchia hna bantukin zumhnak, dawtnak lungthin ngeih ding a si.

Sihmahsehlaw ngakchia hna zia bantukin um ding cu a si lo. Lehrulh duhnak lungthin ngeih loin, tangdornak lungthin, nawl ngaihnak lungthin timi hna hi Khrihfa mi hna nih kan ngeih ding nunzia hna an si bantukin Vancung Pennak cotlak mi si khawh nak ding caah zong ah a herh mi an si. A kan vengtu le a kan zohkhenh a kan hruaitu vancung mi hna sin zongah lawmhnak bia chim in bawmhnak hal zungzal hna u sih.

Hebrew chungah "A si ahcun vancungmi cu ahodah an si kun? Vancungmi cu Pathian rian a ttuantu thlarau, khamhnak a hmu hngami bawmhawkah Pathian nih a thlahmi kha an si" tiah a ti (Heb 1:14).

“Maw a ttha vancung mi, keimah zohkhenhtu ah Pathian nih a chiah mi, ka ceuter in ka veng law ka hruai in ka peng ko, chunnitlak in zankhuadei tiang. Amen”