Athiang zarh caah

A thiang zarh caah kan Pope Francis nih thazaang laknak video in a chimmi thawngtha bia

Dawtmi nu le pa, u le nau hna, nan dam cio hna maw? Tuzan nanmah le nan inn cio len dingah caantha ka ngei. Tuah ningkel bantuk siloin phundang deuh in si lai. Nanmah nih nawl nan ka pek a si ahcun nanmah he chikhat te a si zongah biaruah ti ka duh.
Atu bantuk harnak kan ton lio caan ahhin kan ton liomi harnak vialte kan tei khawhnak hnga caah a hlan kan nunning bantuk siloin phundang deuh in nan chungkhar ah nan nung lai ti cu keimah zong nih kan intuar pi ve hna. A leng chuah lo, Sianginn zong kai loin a ummi ngakchia hna le mino hna i hmailei an nunnak lam-thluan caah keimah zong nih khua ka ruahpiak ve hna. Chungkhar dihlak in ka thinlung chungah nan um dih. A biapi in midam lo an umnak chungkhar le Covid-19 ruangah chungkhar lei thih le loh a tong i a tap/a hram mi chungkhar dihlak hna dihlak ka thinlung ah nan um dih.
Tuni cu harnak a tongmi hna kong ka ruah tikah ka thlavai a kiang. Nan dihlak chungin ka thinlung ah naihniam deuh in a ummi upa deuh(tar) pawl caah khua ka ruat. Corona zawtnak ruangah siizung a phanmi hna zong ka philh hna lo.
Vawlei pumpi i a tlungmi zawtnak(Corona) ruangah anmah nun nak ca hmanh ah ruah loin mi vialte caah a herhnak bik hmunhma ah an nunnak pek in riantuan mi hna zong ka philh hna lo. Annih cu zeitik caan paoh ah riantuan khomi paral tha an si. Tangka lei ah chambaunak a ngei i hmailei nunnak caah lungrethei in a ummi zong an um lai ti zong ka theih ko. Covid zawtnak ruangah anmah caah siseh, a leng i a ummi an chungkhar le an dawtmi hna caah lungrethei/ tihphannak in a ummi thongtla pawl ca zongah ka lung cu a phanthan hoi.
Inn le lo ngeilo, i bochan awk hmanh a ngeilo mi hna ca zongah khua ka ruatthan. Atu caan hi kan zapi/ mi vialte caah a har lio caan te a si. Mah vialte hi ka theih dih ko. Mah ruangah atu ka chimmi bia hna in le ka fale nan dihlak caah nanmah he naihniam tein ka um ko tinak thinlung he dawtnak in ka rak langhter duhnak a si.
Atu kan caan hi a thabik siding in i zuam cio hna usih. Kan pawngkam i a herhdeuh nak ah papek deuh in pekkhawh i zuam hna usih. A thlavai kiangmi hna kha kawl hna usihlaw zatlang(mibu) he pehtlaihnak tuahpiak asiloah phone zong in pehtlaihnak tuah hna usih. Italy ram le vawlei pumpi i harnak a tongmi vialte hna caah thla campiak hna usih. Kan zapi ten i thenthek dih hmanh usih law dawtnak thinlung kha kan sersiam a si ahcun zeitluk a hlatnak hmun i kan um hmanh ah kan lungthin cu a phan kho a si ko lo maw? Atu kan vawlei pi i a herhmi cu dawtnak thinlung ser kha a si.
A hlan he i lawh loin a thiang zarh i puai hna cu kannih nih kan tuah cang lai. Pathian i a dongkho lomi dawtnak le thawngtha bia cu a tawinak in ka langhternak a si. Kanmah le kan khuachung hna cu a king dih ko lai nain Thawhthan(Easter) thawngtha bia cu a tlerh in aa tler dih lai. (2Korin 5:15) ah St. Paul nih a chimmi cu 'Mi vialte caah a thihnak chan cu minung nih hin an nun chungah anmah ca lawngah nung ti loin, anmah ruang i thihnak a ing i a thothan mi pa ca i an nunnak hnga caah a si'. A thothan mi Jesuh Khrih i a thawh-thannak cu thihnak a tei ruangah a si.
Thawhthan zumhnak cu kanmah i kan i ruahchannak kha tha-zaang a pek. Tuzan hi ka fale nan dihlak le keimah bia kan i ruahti nak cu a si. Kan vawlei pi i a tlungmi tu zawtnak thalo in kan luat khawhnak hnga caah a thabik caan timi cu kan i ruahchan ding a si. Cucu ruahchannak cu a si. Ruahchannak timi cu zeitik hmanh ah hnahnawhnak a kan pe lo, ruahnak thalo zong a siter lo. Ruahchan nak ah Dawtnak, Lungsaunak kha pakhat le pakhat cungah chiah in atu caan hna ahhin a thabik siding in i timtuah hna usih.
Atu bantuk in nan inn cio ah len in biachimnak caantha nan ka pek caah kaa lawm. Awnem ten biachimnak in harnak a tongmi hna, ngakchia hna le upa(tar) hna sinah naihniam tein umkhawh i zuam hna usih. Anmah hna sinah keimah cu an sinah naihniam ten ka um venak kong le Pathian nih a rauhhlan ah a thalo mi harnak chungin a kan khamh cang lainak kong zong ka chimhpiak chih uh. Keimah ca zongah ka fale nan dihlak in thla ka campiak ve uh. Nan zapi ten rawl-ei kaa thaw dih uh. A rauhhlan ah kan i tong hna lai.