Dai zirziar te umnak in tho tuah

Mino pawl

Missionary rian`tuantu pawl cu lungchung mirhnak he thawng`tha an chim tiah Pope Francis nih mino pawl a ti

Nan ulenau hna kha zohkhenh dingah, lawmhnak thawng`thabia chim dingah le tehte khang dingah, a hniarhnuar mi, nuamhnak a umlo mi nan nunnak pungsan in tho`than cang u tiah Pope Francis nih mino pawl kha a ti. Pope Francis i “tho tuah, zohkhenh tuah, tehte khang tuah” timi biafang pathum kha langter in Khrihfa missionary rian`tuantu pawl i  `tuanvo rian pawl kha “Missio Young People – Missionary Mino” phu chungtel pawl kha a liamcia mi zarhteni 23 April ah a chim. Anmah pawl cu Italy ram in an si i Pope i missionary mino phu in an si.

Italy ram i mino pawl cu missionary mino tonhpumhnak caah Rome khua ah an i pumh. Cu tonpumhnak i an i timhmi cu ‘Back to the COMIGI: Mission restarts from the future’ (Keimah sinah kir`than u; Missionary rian cu hmailei caan in a thawh ti asi. Atu i tonhpumhnak cu mino pawl mission rian`tuan duhnak thinlung an thawh`than khawhnak caah asi.

Dai zirziar tein mah zawn lawng ruahnak in thocang tuah

Pope nih a cunglei i biafang pa (3) chung i a pakhatnak “Tho tuah” timi a chim tikah Bupi i “missionary thinlung” kha a sawhduhnak a si. Hi biafang cu vui dingin an kalpi mi Nain i nuhmeinu fapa kha Khrih nih a chimmi bia asi (Lk. 7.11-17). Cu bia a ngai i nunnak a hmuh `than. Jesuh Khrih nih cu tlangvalpa i a nu nuhmeinu kha zaangfah dawtnak nganpi a hmuhsak. `Tap lo ding zongin hnemhnak a pek. Cutin a hnemh tikah ngai a nuammi biafang men asilo. Jesuh nih a chimh tikah tuah sernak zong aa tel chih. Cu tlangval pate cu a nu sinah a ap`than. Jesuh nih kanmah hna kha a siarem ngai mi sining cang, mahzawn lawng ruat in umtu ningcang, thathutnak le chungthu leengnaal thil umtuning in tho`than dingah a kan auh bangin thazaang zong a kan pek. Mission rian`tuantu pawl cu hawi zawn ruahnak rian, an ruahchanhnak kha serpiaknak thawngin mahle ulenau hna kha kilven le bawm dingin auhmi an si.

Pope nih a pahnihnak biafang a fiangter `than tikah “Zohkhenhnak” nih dawtnak rian kha a tlingter i hngalhnak a ngeimi lam pungsan in tlinternak; phundang in kan chim asiahcun “Samaritan mithapa” i tuahsernak phun asi. Mino pawl cu ralring tein aa veng thiammi zohnak-hmuhnak ngeih a herh. Cuti asi lawngah bawmhnak a herhmi pawl kha an hmuh khawh lai. An herhbau mi vialte kha chappiak in mah tikhawh chungin bawm awkah zuam a hau lai. Atu nan nunnak kha daitein i nun i hawizawn ruahnak rian hna kha `thahnem ngai le tlamtling tein `uan a herh. Tinhmi nganpi he lungchung in hmanthlak suai thiam u. Caansau `thathnemnak caah fektein tuar khawhnak le minung hna i nunnak lamtluan ah damternak pekin nun an `thangkhawhnak le hawikomh tuahpiaknak dingah mino pawl i caan a phanh cang.

Lawm tein tehte khang tuah

A pathumnak biafang asimi “Tehte khang tuah” timi he pehtlaiin a chim tikah missionary tuah tikah umlo in a ngahlo mi thil pakhat asi ati. Khrihfa kip nih Thawh`han Nunnak kha mah nunkhuasak ningah nungter ding asi. Tiduhnak cu thih hnuah a nungt`han mi bantuk kan si hrimhrim a hau. Mission rian cu lungtho ngaiin karhlan ding asi. Cuti asi lawngah mission tuahtu i a lawmhnak cu midang hna kha a cheuhkhawh lai. Cuvebangin lunglawmhnak a bau i nunnak a ngeilo mi bantuk nunnak cu a nung`than mi bantuk asi lai. Hibantuk tonhnak phun cu a dawh i zumhnak kha tha a `thawnter chin.  Nunnak hlun kir`han ding sining cangin zong zeitin indah a hrial khawhlai timi zong a hngalh ter.

Pope nih Italy i Missionary Mino pawl kha a dulmi mithmai he `thawngthabia kha vape siloin lungthin chung in a chuakmi mirhnak he mission riantuan dingah, thawng`ha chimpeng dingah, cuti asi lawngah nan i lawm lai ti chimbuin a biachimmi kha a dongh ter.

https://bit.ly/3KetyEd

 


 [PK1]

Add new comment

1 + 10 =