POPE FRANCIS I INDONESIA COZAH SIN CHIMMI

Pope nih Indonesia nawlngeitu hna sinah: ‘Biaknak karlak biaruahnak nih pakhat le pakhat i upatnak a chuahter’

(4 September,  2024)

Jakarta ah Indonesia rammi nawlngeitu hna he an i ton tikah, Pope Francis nih “A phunphun in lungrualnak” timi ram biafang kha a dirpi i, Catholic Khrihfabu nih biaknak karlak biaruahnak le rammi remdaihnak bawmhchanh ding in aa zuam lai tiah bia a kamh hna.

Devin Watkins nih a tialmi

Pope Francis nih Jakarta khua Istana Negara president inn ah ram nawlngeitu, mipi le ramdang pehtlaihnak bu pawl he tonnak an ngeih lio ah Indonesia vawlei cung ah a voikhatnak bia a chim.

President Joko Widodo, Vatican le Indonesia alan (အလံ) a hlermi Indonesia ngakchia mibu le president vengtu (guard) chungtel zeimawzat nih an don.

Upatnak Cauk min a ṭhut tikah, Pope nih Italian holh in hitin a ṭial: “Hi ram dawhnak ah a pilmi, nunphung le biaknak aa dangmi hna i tonnak le biaruahnak hmun ah, Indonesia mipi cu zumhnak, unau sinak le zawnruahnak ah ṭhancho hna seh ti ka duh hna. Pathian nih Indonesia cu thluachuah pe ko seh!”

I dannak ah Lungrualnak

Ram nawlngeitu hna sinah bia a chimnak ah, Pope nih Indonesia ram ah a rak don caah mi vialte cungah lawmhnak a chim, cun rili nih a tikulh thong tampi a fonh hna bantukin ramchung miphun le biaknak tampi hna cu zeitindah “a fonhtu puan” tiah auh khawh a si ti kha a langhter.

“Nan rammi biafang Bhinneka tunggal ika (A phunphun in i fonh, a sullam cu Mi tampi nain Pakhat) nih miphun pakhat ah fek tein aa fonhmi miphun phunphun hna i a phunphun in a ummi thil sining kha ṭha tein a langhter,” tiah a ti.

Khrihfabu nih zapi ṭhatnak ṭhanchoternak caah aa zuammi

Pope Francis nih Catholic Khrihfabu cu biaknak karlak biaruahnak ṭhanchoternak le “daihnak le theipar a tlaimi remdaihnak” sernak ah i tel dingin bia a kamh hna.

Biaknak karlak biaruahnak nih thleidannak a hloh khawh i pakhat le pakhat i upatnak le zumhnak a chuahter khawh tiah a ti.

“Catholic Khrihfabu cu,” tiah a ti, “mipi ṭhatnak caah rian a ṭuan i mipi bu le mipi bu chung i a dang rianṭuantu hna he rianṭuanṭinak fehter a duh, aa tluk deuhmi zatlang nunphung sernak thazaang a pek i a ṭha deuhmi le aa tluk deuhmi phawtzamhnak kha zatlang bawmhnak caah a tuah.”

Pakhat le pakhat i upatnak le dinfelnak

Pope nih cun Indonesia i 1945 Phunghrampi hramthawknak chirhchan in “Lianngan Bik Pathian” le zatlang dinfelnak kong kha catlang tlawmpal lawng ah voi zeimawzat a chim tiah a langhter.

“Miphun tampi ah lungrualnak, zatlang dinfelnak le Pathian thluachuahnak hna cu, cucaah zatlang nunphung thazaang peknak le lamhruainak caah timhmi hrampi phunglam an si,” tiah a ti. "Inn saknak caah a fekmi hrampi, bawmtu thilri he tahchunh khawh an si."

Ramchung nawlngeitu hna nih tlukruannak an tuah tikah ram hna ah a chuak khomi buainak kongah ngaihchiatnak a langhter i, Pope Francis nih Indonesia ram lamhruaitu ruahnak cu “a tlukruangmi le fimnak a ngeimi” a si tiah a ti.

Papa Thiang nih a chimmi cu, aa dangmi hna lakah remdaihnak nih mi vialte kha mi vialte ṭhatnak kawlnak ah unau dawtnak lungput ngeih a herh tiah a ti.

“Nunphung tampi le ruahnak aa dangmi hmuhnak le lungrualnak a fehtermi ruahnak hna karlak ah hi fimnak le nemnak tlukruannak hi tlukruannak a um lonak in pehzulh tein kilven a hau,” tiah a ti.

Cu bantuk thiamnak rian nih cun Indonesia mi vialte aa telter hna i remdaihnak, tlukruannak, minung covo upatnak, a hmunmi ṭhanchonak le daihnak kawlnak leiah i zuam dingin a sawm hna tiah a chimchap.

Pope St. John Paul II i bia kha a hun hngalh ṭhan. John Paul II nih 1989 ah Jakarta a tlawn lio ah, Indonesia nawlngeitu hna kha “rammi vialte minung le ramkhel nunnak” upat ding le “midang cungah tuar khawhnak le upatnak cungah hram bunhmi miphun lungrualnak karhter” dingin thazaang pek dingin a sawm hna.

Daihnak cu, “dinfelnak rian a si” (opus justitiae pax), cun mi vialte rian a si tiah a chimchap.

“Remdaihnak cu kan hmuh khawh,” tiah Pope Francis nih “kanmah duhnak le hmuhnak lawng si loin mi vialte ṭhatnak caah, pehtlaihnak sernak, hnatlaknak le rianṭuanṭinak ṭhanchoternak, ziaza phunkip tei khawhnak ding chawlehnak le zatlang nun harnak, le daihnak le lungrualnak karhternak caah thazaang fonhnak ah kan i pekchanh” tiah a donghnak ah a chim. Vatican news in kan lakmi asi.