December ni 3-9 tiang, Thawngpang

Thawngpang Fonh

Dawtmi ulenau hna kan Myanmar ram in society of Jesus (S.J) Tlangbawi phu chungin kan Chinmi pathum hna cu Bishop Felix Lian Khen Thang, Kalay Bishop nih Tlangbawi Ordination kha 3.12.2022 zarhteni ah Kalaymyo St. Mary Cathedral ah a pek. An pathum tein Tedim lawngte an si i an min hna cu Fr. John Bosco Dim Khawl Thang, Fr. Joseph Cin Hau Mang le Fr. Simon Kam Sian Muan an si.

Cun December ni 4 Zarhpini ah kan Bishop Lucius Hre Kung cu Kyainn Parish Center ah adventu avoi hnihnak zarhpi Missa Raithawinak a tuah piak hna. Chuncaw eidih hnu in Kalaymyo lei ah a kirṭhan.  

Cacawn nikhatni December ni 5 ni ah Assumption Intermediate Seminary dirhnak kum (25) tlinhnak Silver Jubilee puai cu Pastoral Center, Kalay Compound ah hlunghlai ngaiin an tuah. Cu Jubilee puai ah Philosophic Department, Pyin Oo Lwin ah a kai hna mi Brother (Seminarian) paruk hna kha Bishop Lucius Hre Kung, Bishop of Hakha Diocese nih angkifual a pek. Cu hna paruk hna chungin kan Hakha Diocese chung in Brother pakhat a tel ve. Amah cu Sawti khua, Rezua Parish in Bro. Peter San Maung asi.

Brother pawl angkifual an pek dih hnuah Bishop Felix Lian Khen Thang, Bishop of Kalay Diocese nih tukum i Theology Final Year a dihcang mi Brother pahnih kha Deacon sinak Ordination a pek. An pahnih tein Kalay Diocese in an si.

Deacon Ordination a dih hnuah Lawmhnak Jubilee Missa cu Bishop Felix hruainak he Siangbawi 50, Sister 50, Brother 10, Damah Saya 20 le zumtu khrihfa unau 400 hrawng he hlunghlai ngaiin tuah asi.

Cun kan Hakha Diocese chung i a ummi Damah saya/mah pawl bawmnak ding caah December ni 7 ni ah Mindat zone in Rev. Fr. Om Se le Rev. Fr. Joseph Se Thang hna i tel in Bishop Lucius, Hakha i a umm kan Father hna le damah saya hna tel in tonbiaruahnak an ngei. Covid_19 le atu i kan Myanmar ram dirhmun ruangah harsatnak phun zatling a tongmi kan saya pawl zeitinindah kan bawm kho lai ti pawl an i ceih tiah thawngpang kan theih.

December ni 8-9 tiang cu Tribunal Court he pehtlaiin Bishop Lucius, Canon Law leiin Degree a hmutu siangbawi pawl, cun Siangbawi upa pawl le Damah saya aiawhtu Saya Albert Cung Nawl hna tel in tonbiaruahnak an tuah.