Pope Francis i Nazi

Pope Francis i nazi cu lilan an zuar i vawlei i asangbik khumhnak a lonh

Pope Francis nih a hmanmi nazi kha aherhmi hna bawmhnak caah lilan in cawn nithumni ah a zuar i cu nazi ṭazeih caah ahmasabik vawleicung i asangbik khumhnak a lonh ti asi.

La Violette tiin auhmi Fimcawn laksawng Foundation caah Pope Francis nih a hmangmi Swatch Once Again ṭazeih asimi nazi kha November ni 30 ah lilan in a zuar. Cu ṭazeih um nazi i phungning in an zuarmi a man cu $55 (MMK singkhat renglote) lawng he cawkkhawh mi asinain Pope nih lilan in a zuarmi ahcun nazi i a donghnak man hi $56,250 in zuar asi i nazi i hrampi man nakin let tampi a lonh i tangka tampi pek a haumi Swatch ṭazeih nazi ah a cang.

Wisconsin ramkulh, Green Bay khuapi i Bishop David Ricken nih Brain Laviolette thilṭha tuahnak bu kong le cu sianginn i nazi ngeih luaimai a huammi kum 10 renglote siangngakchia pakhat cu ti a lio i ruahlo piin a thihnak kong kha Pope sinah ca a kuat. Cu ca chungah Bishop Ricken  nih saingngakchia hna sianghleirun kaikhawhnak ca tangka bawmhnak caah Pope i a man fawibik mi nazi pakhat hlut dingah a hal i Pope nih cu a halmi lung a tling i lilan in an zuar tikah minthang an simi Fred Savage, Joe Thiemann, Terry Bradshaw, Condoleezza Rice le Randall Park hna an i tel.

Pope Francis nih lilan puai caah amah i thilri hna a hlutnak cu atu hi a voikhatnak asilo. Ahlan deuh zongah Pope i thim asi hnu kumkhat tlinghlan deuh zongah Harley-Davidson nih amah kha Motor Cycle pakhat laksawng a pekbal i amah nih min a ṭhut hnu ah $285,000 in a zuar i inn le lo ngeilo le rian ngeilo mi hna caah a hmuhmi tangka kha a hmang balcang. A luanciami 2017 kum, November lio zongah laksawng a hmuhmi leilawng (Motor Car) kha lilan in a zuar i ṭhatnak rian caah a hmang bal.

Kan laknak hrampi>>> https://bit.ly/3Uz3ybL