BAWIPA THISA KHA KUTDONH IN EI COHLANNAK

KUTDONT IN BAWIPA THISA COHLANNAK CUNGAH CATHOLIC BUPI I RUAHNAK

Khrih ah dawtmi nu le pa u le nau hna mitampi nih an tuah caah ka tuah ve timi siter duhlo nak lung siaherhnak he hi Caapar in kan cheuh ve hna.

Missa ah ka hmuhmi cu Mithianghlim ri chungin cheukhat le Khrihfa cheukhat hna cu Bawipa Thisa Sacramentu kha an kut in donh i an ei mi kan hmuh hna. Kutdonh in a ei mi cheukhat hna cu a fekmi konglam chimnak umlo in Changreu sawhsawh valak in ei mi phun, Bawipa Thisa upat biaknak azor sual lai ti ka phang ngai. Kutdonh in Bawipa Thisa einak cungah Catholic Bupi i ruahnak lungput zeitindah a um. Kan nu Bupi i ruahnak lungput kha theih a hau. Kan nu Bupi nih Bawipa Thisa kha kutdonh in ei cohlannak kha tha a pe lo. Zeicaah tha a pek lo timi Catholic Bupi i ruahnak lungput paruk (6) kha a vun langhter lai.

1. Bawipa Thisa kha kutdonh in ei nak cu ningcang thar asi bantukin, khi bantuk tuahnak kha hman duh ahcun Bawipa Thisa Sacramentu kong kha Pathian bia cawnnak cataang (Sunday school) ah ṭha tein theih a ho bantukin, kutdonh in i laknak suallam zong khaṭha tein kan theih aho lai.
2. Bawipa Thisa kha kutdonh in ei, cohlan mi tuahsernak kha khuapi tampi ah tam deuhin kan hmuhnak cu Siangbawi an tlawmtuk tiah hmuhnak ruangah Khrihfa sawhsawh hna nih Bawipa Thisa kha kaa in cohlannak kha tha an pek lo pinah an hawile midang hna zong kha kut in cohlan ding tha an pek i an tukforh hna. Kutdonh in cohlannak, einak kha kan hnatlak pi asi ahcun zeitik hmanhah Bupi upadi ah a lungtling lomi hna kha thapek bantuk asi lai.
3. Bawipa Thisa kha kutdonh i einak i a nganbikṭihnungbik mi cu Bawipa Thisa cungah chiahmi upatnak le biak upatnak kha a zorternak a si. Catholic Khrihfa tamdeuh nih kutdonh in Bawipa Thisa einak kha aa tlaklo mi upat lonak tuahser ning asi tiah an ruah. Cu ve bangin Bawipa Thisa kha kut in donh i a ei hnga ding vialte hngakchia hna telh in an ei hlanah a kut thiang tein an iṭawl hrimhrim lai tiah na ruat maw?
4. Siangbawite nih an thinphang bikmi cu pekchanh ciami Bawipa Thisa changreu kha kutin donh i a ei mi hna cu catlap tein toidor ngaiin ei asi cia kha a hngalhcia lai. A suallam cu Bawipa Thisa donhnak pakanpar an va hman hmanh ah Bawipa Thisa changreu in a beuh i arak tla mi pelpawite te cu a kam leiah a liamfuan lonak ding kong zeirel loin a philhmi Khrihfa tam deuh hna i kutchung ah Bawipa Thisa peknak i sining cu zeitindah asi hnga.
5. A ruangdang pakhat cu zumhnak a dermi asilo ah thinlungput a tling cikcek lo mi asilo ah a lung hmanlo, a hrut, a Aa mi hna i Bawipa Thisa kha hmaizah tlakmi in an tuahsual lai timiṭihnun kha a si. Pathian bia cawnnak cataang (Sunday school) ah Bawipa Thisa Sacramentu kong khaṭha tein a theifiang lomi Catholic Bupi cawnpiaknak khaṭha tein lam hmuhsaknak a inglo mi hna cu Bawipa Thisa kutdonhin einak kha changreu sawhsawh valak i ei mi he aa khat ko tiah an ruah khawh.
6. Bawipa Thisa kha kut in ei cohlan khawh asi ko tiah fawi tein kan ruah ahcun thinphan ding pakhat a um rih. Cucu a dang kan unau Khrihfa Bu dang hna nih “Catholic Khrihfa hna nih Bawipa Thisa cungah an chiahmi zumhnak le pumhbiaknak kha thazaang der dingin an soisel khawh i an nih i Bawipa zaanriah einak he aa khatbak mi asi ko tiah an chim khawh. A cunglei i langhter mi Catholic Bupi i ruahnak lungput paruk (6) kha kan hngah hnuah kutdonh in Bawipa Thisa ei cohlan a tlak maw/ tlak lo timi kong tu cu nangmah cungah aa hngal asi cang.