Khrih lawnglawng hi Tlangbawi taktak cu a si

Tlangbawi cannak

Tlangbawi Cannak Sacrament

Tlangbawi cannak hna cu sacrament pakhat a si i mah sacrament thawngin Khrih nih a lamkaltu hna kha Bupi chungah caan a dongh tiang hman zungzal awkin a rak aptakmi mission (thlahnak) rian a si; cucaah tlangbawi cannak hna cu Lamkaltu rianṭuannak sacrament an si. Degree (tahnak) pathum in a um: bishop, siangbawi le deacon ti in dotthum in ṭhen a si. Khrih nih Lamkaltu rian a sernak le a thlahnak kong cu a dang ah zoh ding a si. Hika ah hin cun sacrament phungin mah ministry(rian) i chanh lawng kha kan zoh lai.

Zeicahdah hi Sacrament hna cu (ORDERS) Cannak an si?

Cannak, asiloah Sinak tiah kan leh mi biafang cu ORDER timi kha a si i, a phuaih phuaih mi pakhat khat a chim duhmi a si. A bik in uknak aphuaih kha a si. Bupi chungah mah bantuk a phuaih kha a rak um cang i Bible bia in lakmi a rak si. Melchizedek tlangbawi sining(Sinak) in ti kha a si. (Cf. Heb 5:5, 7:11, Ps 110:4). Biaknak ah bishop cannak, siangbawi cannak, deacon cannak tiah chim a si.

Bupi chung i a ummi mah Sinak chung luhnak kha ordination tiah auh an si. Cucu thleidannak (thianternak) thluachuahpeknak, asiloah sacrament kha a si. Tuchan ah ordination timi biafang hi bishop, siangbawi, asiloah deacon sinak chung luhternak lawngah hman a si. Ordination nih a thiang huham ṭhawnnak kha hmannak nawl a pe mi Thiang Thlarau laksawng kha a pek. Mah ṭhawnnak cu a Bupi in Khrih sin lawngin a ra mi a si.

Ordination cu consecration (thianternak,Pathian sinah pekchannak) ti zongin auh a si. Zeicah tiah a Bupi caah Khrih nih a dang tein a thleidan mi le nawl a pekmi a si caah a si. Bishop kutchuannak le ordination thlacamnak hi mah ordination i hmuh khawhmi hmelchunhnak cu a si.

Khamnak Khuakhannak Ah Tlangbawi Cannak Sacrament

 Biakam Hluan Tlangbawi Cannak

Isreal miphun cu “Tlangbawi hna pennak le a thiang miphun in” Pathian nih a thimmi an si. (Ex 19:6, 61:6). Sihmanhsehlaw Isreal miphun chungah Pathian nih Isreal miphun phun hleihnih chung khan phun khat a simi Levi miphun kha biaknak rianṭuantu ding caah a dang tein a chiah hna. Pathian hrim hrim kha an mah ro a si.(Nam 1:48-53, Josh 13:33). Ahleikhun biaknak tuahsernak in Biakam Hlun Tlangbawi cannak cu a hram a thawk. Tlangbawi hna cu “Pathian he i pehtlaihnak ah mizapi can ah thil a tuahtu, sualnak caah laksawng le raithawinak a pechantu dingah thim” an si. (Heb 5:1, Ex 29 29:1-30, Lev 8:1).

Pathian bia phuan awk le raithawinak le thlacamnak in Pathian he i hawikomhnak kha ngeihter ṭhan awk caah sermi a si. (Mal 2:7-9). Mah tlangbawi cannak hi khamhnak chuahpi awkah ṭhawnnak a ngei lomi ah a cang hiamṭhiam. Raithawinak kha ngol loin nawlh zungzal a hau mi le thiannak taktak kha a phan kho lomi a si. Thiannak cu Khrih raithawinak lawng nih a tlinh hnga mi asi. (Heb 5:3, 7:27, 10:1-4).

Bupi a biaknak nih Aaron tlangbawi cannak le Levi phun rianṭuannak ah upa sawmsarih hna thimnak bantukin (Num 11:24-25), Biakam Thar i tlangbawi rianṭuannak thlam kha a hmuh. Cucaah Bupi nih bishop ordination peknak i thlacam mi ah hi ti in a ti. “Pathian kan Bawipa Jesuh Khrih a Pa vel ngeimi na Bia in, na Bupi kongah khuakhannak kha na rak ngei cang. A hramthawk tein, nangmah nih Abraham tefa hna kha na miphun thiang si awk caah na thim cang. Nangmah nih uktu le tlangbawi kha na chiah hna i, na hmunthiang kha na rianṭtuantu loin na chia bal lo”.. ti a si.

Biakam Hlun Tlangbawi cannak nih a rak cuanter mi muithlam vialte cu Jesu Khrih “Pathian le minung karlak ṭuantu” ah a tlinnak a phan. (1Tim 2:5). Khrihfa phungbia nih “a sangbik Pathian Tlangbawi” kha Melchizedek tlangbawi sining in tlangbawi ngan a si mi Khrih tlangbawi a sinak muithlam a si ti in a ruah. (Heb 5:10, 6:20, Gen 14:18). “A thaing mi, soi awk um lo mi, a thurhnawm lo mi” (Heb 7:26) a si i, “voikhat thawinak in amah nih thianter a si mi hna kha zungzal ca in a tlinter hna. Cu voikhat thawinak cu vailam raithawinak a si.” (Heb 10:14).

Khrih a khamnak raithawinak cu a hlei in a tlingmi a si. Voikhat ah zalak in pekchanhmi a si. Sihmanhsehlaw mah thawinak cu Bupi chung i Bawipa Thisa thawinak ah a umter. Mah bantuk cun Khrih a tlangbawi sinak pakhat zong a si ve. Khrih a tlangbawi sinak a tlinnak kha tlauter lo in rianṭuantu tlangbawi sinak thawng in umter a si. Ministerial priesthood an timi Khrih lawnglawng hi tlangbawi taktak cu a si. A dang vialte cu a rianṭuantu an si dih.” (St.Thomas Aquinas).

 

 

 

Add new comment

1 + 6 =