Melem le zuk

Milem

Thinlung lei thiamsang hna nih mi pakhat i a khuaruah ning hi ningkel a si maw a si lo ti kha sullam theih a har ngaingai mi zuk hmanthlak(pachi) cu mizaw kha an hmuhsak hna hnuah hlathlai in a phi an kawl. Cu hmanthlak (pachi) a zohtu cu hmanthlak cungah a `tha in maw a hmuh, a `tha loin maw a hmuh, asiloah khuachia vanghru bantuk in dah a hmuh, zeibantuk sining in dah a hmuh timi cungah thinlung lei thiamsang hna nih cun hlathlai in a phi an pek. Ngaite ah hmanthlak zuk (pachi) i a sullam a hrampi taktak cu thinlung lei thiamsang lawng nih a theih. Bianaah, a lung thin ningkel a simi hna nih pangpar borkhat bantuk in a hmuh mi a fiang tuk ko mi zuk hmanthlak pakhat kha a cung tang a let talam in pungsan phunphun a zoh i cu mipa nih khuachia vanghru ah a hmuh a si ahcun kha mipa cu a lungthin ningcang lomi, chiatnak lei lawngin a hmu thiammi, a nunnak ah thinphang thlalaunak a rak tong balmi, serhsat hremnak a rak ing balmi, thinlung lei damlonak a ngeimi, a dinglo namnehnak a ton bal caah lungthin a hman ti lomi tiah thinlung lei thiamsang nih sii roca ah a `tial lai ti a si. Cuticun Siilei thiamnak ningin an hlathlai `theo. Cuti a si ahcun mi tampi nih Jesuh Khrih hmanthlak (zuk) tiah an hmuh mi pachi milem kha khuachia vanghru ah a hmuh a si ahcun thinlung lei thlopbultu sibawi ngan asiloah thinlung lei thiamsang sinah a sining a va chimh a hau lo maw?).
    Cucaah profet ka si a ti i Jesuh hmanthlak te hna a phoihter mi profet hna he nan ton ahcun i ralrin awk a si. Nawl ngeitu hna sinah thawngthanh ding a si. Hi kong hi `tha tein na rel ahcun na fiang ko lai. Mi pakhat kha milem a biami hna tiah a soisel tu hna cu amah cu kha milem hna kha a thinlung chungin Pathian aiawh in a rak bia ve cangmi an si ko. Zeicah milem kha lungchung in Pathian tiah ruah le zumhnak a ngei lomi nih, “Milem biaknak” timi bia hi a chim lai lo. Jesuh Khrih, Nu Mary, Vancung mi hna milem kha a upat thiam mi hna nih cun cu milem hna kha lung chung in Pathian taktak a si tiah zumhnak a ngeihlo caah siseh, milem ka biak tiah a thinlung ah a umlo caah siseh, milem a biami dot a phan lo.
    Cu bangin milem kha an hman ko nain cu milem hrampi a simi Jesuh sinah a ruahnak a phanh caah Khrih he tampi an i naih deuh. Nu Mary milem a biami tiah ruahmi hna cu an thinlung in milem kha Pathian ah a chiami an si. Nu Mary cu Catholic nih zeitik hmanh ah Pathian tiah an zum ballo i an bia bal fawn lo. Bible nih roca a `tialmi Jesuh nu a si caah Pathian hnu in Bawinu cu mi vialte lu cungah chiah in an upat cio nak a si. Cucaah milem hmannak kha a lengvuan mit zohnak lawngin chim ding a si lo. Milem a ker lo nain kha milem a hmuh tik paoh ah “Milem an biak” a timi dihlak lungthin cu milem kha Pathian sinak in a rak bia cangmi an si. Zei ruangah tiah cun a phi cu Pathian cu minung hna i lenglei tuahsernak, lenglei sining kha zoh in bia a chattu cu Pathian a si lo. Amah cu minung thinlung zoh in bia a chat mi a si. Minung lungthin a hngal dihtu Pathian a si. Khrih chan zongah Farasi mi hna thinlung in a chuakmi hna kha a rak theih chung cang i a rak chimh`than bal hna. Cucaah milem hmuh tik paoh milem a biami hna tiah a ruatmi paoh, keimah cu milem kha Pathian ah ka ruah, a timi in i ruat uh.
    Jeremiah 3:16 ah “Cun ramchung ahcun nan hun karh i nan punzam tikah mi nih Bawipa biakam nak kuang kong kha an chim ti lai lo, a ruah zong an ruat ti lai lo, a hngalh zong an hngal ti lai lo; a herh zong an herh ti lai lo i a dang zong an ser ti lai lo? a ti. Kan hawi Khrihfa pawl nih hihi an i tlaih i Catholic nih Bible hlun biakam kuang cung i Pathian nih a serter mi vancung mi Cherubim milem hna kha hram bunh in Pathian he aa pehtlai mi zuk le milem hna an ser mi kha an soisel `theo. Ruahawk a simi pakhat cu cunglei i langhter mi Bible bangin Bible thar chan ah Israel mi chung a simi Catholic hna nih biakam kuang hlun kha hman a si ti lo. A ruah zong an ruat ti lo i an tuah ti fawn lo. Asinain Khrih pek mi biakam thar he aa pehtlai mi hmanungbik zanriah dum`ti nak ah Lamkaltu (zultu) hna a rak pekmi changreu le mitsurzu in hmuhmi Khrih i thi, a sa biakam thar kha Catholic nih an lung ah a campeng mi a si. Biakam thar a simi a thi kha an din (Mark 14:22-26/ Lk 22:14-20/ 1Kor 11:23-25). A cunglei i Bible ning zong in Cherubim milem tuah ti lo awk, ruah ti lo ding le lungchung ah camter ti lo ding tiah a chim lo. Heb 9:1-28 ah, Paul nih Bible hlun i biakam kuang chiahnak thlam caah zeitindah an rak timhtuah ti kha a chimh hna i culio Tlangbawi hna nih minung sualnak caah rai an rak thawinak kong le Jesuh Khrih nih amah thisen luanh in a kan khamhnak kong kha tahchunh in a chim. Cu bantukin Paul nih a chim lioah, “Cu kuang cung ahcun Pathian sunparnak Cherubim kha an um i sual ngaihthiamnak hmun kha an thla an zarh. Hi thil kong hi a dihlak in chim can atu hi a si lo (Heb 9:5) tiah a bia cu fianglak langhter loin a chiah mi kha a zohtu budang hna nih RC pawl nih Cherubim milem an tuahmi cu a herh lo bantuk ah an hmuh. Ngaite tiah cun (KJV) Bible ning in, “And over it the cherubims of glory shadowing the mercy seat; of which we cannot now speak particularly” tiah a `tial. A sullam cu Paul nih bia a chim lio ahhin Bible hlun i Thlam he pehtlai mi paoh kha a dangten dikthliar in a chimkhawh lonak kha a chimmi a si. Jesuh Khrih kong kha a hleice in a chim lio caan a si. Catholic pawl nih Pathian tuahter mi Cherubim milem hna in aa thawk i Pathian he pehtlai mi, milem hna ker le tuah cu Bible an zulhmi a si.

Add new comment

4 + 0 =