Adikmi dawtnak cu ningkel lo umnak in a luat

1.e Pakhat le pakhat theihthiam ngaihthiamnak

Nu le va hna i chungkhar kong lamthluan cu tlam a tling zungzal kho lo. Lam a tluang kho lo. Lungthin ruahnak aa khatbak lomi minung pahnih i komhnak cun buaibainak hna kha hrialkhawh asilo. Theihthiamnak a pialsualnak hna, thinlung put le duhnak aa tong suallonak hna, asilo mi i puhsualnak hna kha an ton hrimhrim ko lai.

Cu in lunghaknak hna hrialkhawh lo an tonte lai.

Cubantuk asinak cu asi awk asi ko. Minung cu zakhat ah zakhat a tling an silo. Pumpak cio zaangdernak a ngeimi an si. Pakhat le pakhat lunghaknak an ton tikah kaphnih tein ruamkai ding asilo. Buainak a fiannak dingah ceihkhan `ti ding asi.

Ingtuar khawhnak thinlung, dawtnak thinlung he i ceihhmai in fianter ahcun buainak aa remkhawh lo awk zeihmanh a umlo. A chiabik sining dirhmun a phan kho lailo. Ahmaantu nih a palhmi kha theihpak in ngaihthiam hnuah a palhtu nih ahmaantu kha a nawl lai i an i remh lai.

Vale an palh caan a um i nupile an palh caan zong a um ko lai. Vawleicung ah a palhlo mi minung an umlo. Minung asi paoh a palhkho mi lawngte an si asilo mei? Dawtnak thinlung in ceihhmai i fianternak tuah le theihthiam ngaihthiamnak, mah palhmi i remhnak hna cu chungkhar kong kha sau a nguhter. Chungkhar ka sercang lai tiah cun pakhat le pakhat ngaihthiam khawhnak hlankan in timhcia a hau. Zeicah tiah an pahnih ning tein an palhthiam veve caah asi. An palhkhawh veve caah asi.

Vale asiah nupile asiah thinhunnak kha hmaisater ding asilo. Thinhun lio caan ah  konglam tuahtan khawh loin, ruahnak in chim le biachah an hman tawn. Ruahdamhnak cu a palh chel a um tawn. Buainak pakhat kha lungsau tein fiater asiahcun ahmaan ning tein fianter khawh an siko lai.

Lunghrinhnak thinlung in ralringlo biachiah le tuah ahcun palhnak tampi tuahkhawh asi. Remhkhawh mi palhnak phun asi ahcun a poi lo. Remhkhawh lo mi palhnak asi sual ahcun ngaihchihnak ca a hnu suallai.

Voikhat ah Albert an timi Babearia khua ukbawi pakhat a rak um. Amah cu a thin tawituk mi asi. Amah nih Ausburg khuapawng ram lak khawhnak a tuahlio ah a uknak ram in cakuat pakhat a rak hmuh. A cakuat chungah a nupi cu ningkel loin a umnak thawngpang a rak i tel. Ningkel loin a um taktak ko lai tiah a zumh i a thin a huntuk caah hal hmasa loin innlei ah a rak kir i a nupi kha a rak thah. A that hnu in `hatein a hlathlai tikah a nupi cu ningkello a umlonak kong an rawimi asinak kong a rak hngalh.

Sualnak a umlo a dinfel mi a nupi a thahsual kha aa ngaihchihtuk i a ngaih a chiatuk `han. Zeitlukin aa ngaihchih i a ngaih a chiat ti a fiannak cu kum (27) lawng asi rih mi a nupi i a pawlmi a samte cu zankhat bak ah a lu dihlak in an rang dih ti asi. Asinain aa ngaihchihnak cu a tlaituk cang.

Tuaktan hmasa lo thinhun buin bia a chah caah palhnak tampi a tuahsual mi chungkhar ngei tampi hna i ngaihchihnak bia tampi ka theihbal.

Pakhat le pakhat i ngaihthiam zungzal in i komh awk asi. Zungzal hawikom `tha si awkah an i thim asiko lo maw?

Pakhat le pakhat zungzal ngaihthiamnak le mah palhnak i remh zungzal nak cu chungkhar ngei mi`tha hna thil tikhawhnak pakhat asi.

R.Quillion an timi pa nih “ngaithiam a thiammi pahnih hna an i fonhnak cu a nuammi lehthahnak a chuah ter” tiah a rak ti.

#Pehthan asi telai>>>