ṬHITUMH PHUNGPHAI

Man

            Laimi nih nupi kan ṭhit, va kan ngeih tikah kan celh na lo loin a si khawh chungin man kan i man tawn. Hi bantukin manh kan i zuamnak zong hi fanu ngeitu nih chawva a hauh ruang le a duhfah zong aa tel ko lai. Asinain minung kal cio ningin man kan i manhmi cu kan nupile kha man kan ngeihter hna ruangah a si. Mi fanu a si ve mi cu aman loin, thilhring bantukin a sawhsawh in, fawite in i laak khawh a silo ti ruah zongah siseh, chungkhat le chungkhat ipehlaihnak ca zongah siseh, man kan iman mi hi a si.

          Nihin ah man manh a doh in a domi tampi an um. An mawh lo. Minung kan phung nih a laak hnga mi nakin ahlei le aluan in, duhlo thlak in, hakkauh in an laak. Cheukhat nih ‘kei cu laak vekvek ah a sining tein, laak lo vek ah laak lo lawlaw’ tiah a timi an um ve. Cheukhat tangka tawng kho nih phungleng lanh tiangin thilri, tangka, ṭhitumhnak kha an tuah i an buar tikah, an ngeih in kan phung an hrawh tikah zapi caah lam a pit i hawi nawl zong cawn khawh lo, ngeih nih le phanh khawh lo khua lakpakar ah kan phung kha upatnak in kan tlaihchan kho ti lo.

           Tangka tawng kho nih an duh in hi bantukin man vial manh duh ṭung lo, puai vial midang nih phanh khawh lo tiang in ṭhitumhnak an tuah tikah kan phung kha tangka in an hrawhter i, kan phung kha upat lo ah kan tlakter mi zong kha kan zeite a poi lo. Cheukhat nih fanule cu ahodah hrin le ser a kan bawm, kanmah nawl ta tiah kan phung a hrawk zong an um hoi. Cucaah vawleilei nih a kan hruaih khawh ti lo le mah duh salam in khua kan sak ruangah sifak le mizapi (mizaran) ca ah tiah ruat in, biaknak tal nih kan tlangtlak kho hna hnga maw? tiah an rian asilo nain pastor le upa hna tiang nih an rian ah an i tenh hi an mawh lo.

          Man i manh ning kong hi kan ṭial tikah minung pakhat le pakhat, ngeih le chiah, phun le hram cu kan i tiangaw dih lo. Hi a tanglei i ka ṭialmi hna hi mizapi i kan i manmi kha a thluangpi in kan ṭialmi an si.

Manpi hna  

           Mizapi nih kan ngeihmi manpi cu phunthawh he cun phun nga an si. Cu hna cu puman, numan, niman, ṭaman an si. Bawi ka si aa timi hna nih mizapi hlei in salpaman le ṭhuthmunrawl tiah manpi ah an i relh chih i an i ngeih. Hi hna lengah tluang le i ṭhitumh ahcun a hlei in man an timi zong a um rih.

Hngalh awk: A tanglei ah kan ṭialmi India tangka an rak hmanmi Rupee 1 hi nihin

      2005 kum i tangka thlen cun kyats 27-30 hrawngah a um.

Crd- Stephen NI Kio