95 Theses chungin

Pathian zumhning aa thleng
29.     Thiang Thlarau chan ah Pathian zumhning a donghnak a phan. Fapa chan lio bantukin mah pumpak cio in le aa `then`thek mi bu chung in Jesuh zumh khawh a si ti lo.  Jesuh nih a thlah mi Lamkaltu hna  sin lawngah sual ngaihthiam khawhnak bia le vancung ram biathuk theihnak bia a pek hna (cf; Jn. 20:22-23; Mt. 13:11). Cucaah Jesuh thlah mi Lamkaltu a pommi hna cu Jesuh a pommi hna an si i Pathian a pommi zong an si (cf; Jn. 13:20). Lamkaltu a hlawmi cu Jesuh hlawtu an si i Pathian a hlawtu zong an si caah  Thum komh Pathian a biami an si ti lo (cf; Lk. 10:16) i Seitan biatu an si. Cucaah, Thiang Thlarau chan ahcun Lamkaltu hleihnih hna he aa pehtlai mi, Penticost ni i an dirhmi Bupi chung in Jesuh zumh lawng kha, Jesuh zumh taktak a si i Jesuh nih a umpi zungzal. Bu `then`thek chungin Jesuh zumh a ngah ti lo. Zeicaah ti ahcun bu `then`thek chung ahcun Jesuh a umlo ruangah a si (cf; Judas. 1:19).
Jn. 20:22-23    “Mi an sualnak nan ngaihthiam ahcun ngaithiam an si lai, nan ngaithiam lo ahcun ngaithiam lo an si lai tiah Jesuh nih a chim.”
Mt. 13:11    “Jesuh nih, ‘vancung ram biathuk theih khawknak cu nan sinah pek a si cang, asinain mizapi sin ahcun pek a si lo’ tiah a ti.”
Jn. 13:20     “Keimah thlahmi poah a rak pommi cu Keimah an ka pom a si i Keimah aa ka thlahtu zong an pom a si ve tiah a ti.”
Lk. 10:16     “Cun Jesuh nih ‘Nanmah an hlawtu hna cu Keimah an ka hlawt a si i, Keimah aa ka thlahtu zong kha an hlawt a si ve’ tiah a ti.”
Judas 1:19     “Hi hna pawl cu bu`hennak a chuahpitu an si i Thhlarau an ngei lo.”
Pathian bia ngaihning aa thleng
30.     Thiang Thlarau chan ah Bupi bia ngaih cu Jesuh bia ngaih a si i Pathian bia ngaih zong a si ve.  Jesuh nih a bia thiang cawnpiak awk ah a Lamkaltu a thlah tik hna ah Thiang Thlarau nih ka chimmi vialte hi an chimh hna lai tiah a ti (cf; Mt. 28:19-20; Jn. 16:12-14). Cucaah, Lamkaltu hna cawnpiaknak cu Jesuh cawnpiak mi lawngte a si i Jesuh cawnpiaknak a zulmi hna cu Bupi cawnpiaknak zong a zulmi an si ve (cf; 1Kor. 11:23; 1Thes. 4:2,15; Jn. 15:20).
    Jesuh nih nan bia a ngaimi hna cu ka bia a ngaimi an si tiah a ti caah, Lamkaltu hna an cawnpiaknak kha zulh in kan ii ciinken zungzal a hau (cf; Lk. 10:16;Judas 1:17). Pathian ta a silo mi nihcun  Bupi cawnpiaknak an zul duh lo (cf; Jn. 4:6). Cu hna pawl nih cun, Bupi hruaitu cu minung sawhsawh an si ko an ti i an cawnpiakmi hna an al tikah minung bia an al si ti lo i Thiang Thlarau a kan petu Pathian bia an al ah a cang (cf; 1Thes. 4:8). Cucaah, Thiang Thlarau chan ahcun Jesuh thlahmi Lamkaltu hna he aa pehmi Bupi a bia kan ngaih a herh. Lamkaltu cauk in Biathlam tiang, Cauk (23) hna hi Bupi cawnpiaknak an si.
Mt. 28:19-20    “Miphun vialte hna sinah va kal u law kan cawnpiak mi hna vialte hi zulh awk ah va chim hna u  tiah Jesuh nih a zultu hna kha bia a cah hna.”
Jn. 16:12-14    “Thlarau a `tum tikah kan chimh cang mi hna kha a lak lai i nan sinah a phuan lai.”
1Cor. 11:23    “Kan chimh `than mi hna cawnpiaknak hi Pathian sin in ka hmuh mi a si.”
1Thes. 4:2    “Bawipa Jesuh aa ka chimhning in kan cawnpiak ve hna.”
1Thes. 4:15     “Atu kan cawnpiak mi hna hi Bawipa cawnpiak mi a si.”
Jn. 15:20     “Ka cawnpiaknak an zulh ahcun nan cawnpiaknak zong an zulh ve lai.”
Lk. 10:16     “Jesuh nih Lamkaltu hna sinah nan bia a ngaimi hna cu ka bia a ngaimi an si, a ti.”
Judas. 1:17     “Ka dawtmi hna, Bawi Jesuh  nih an cawnpiak mi hna kha ii ciin ken zungzal u.”
1Jn. 4:6     “Pathian ta a simi nih kan bia an ngai i Pathian ta a silo mi nihcun kan bia an ngai lo”.
1Thes. 4:8     “Cucaah hi bantuk cawnpiaknak a altu cu minung bia an al a si lo i Thiang Thlarau an petu hna Pathian bia an al a si.”