95 Theses chungin Minung Dawt Ding

Minung dawt ding

2.    Pathian nih minung a dawt caah kannih zong nih kan hawi minung asi ve mi cu zei bu, zei biaknak an si zong ah, kan ral tiang in kan dawt ve a herh (cf; Mt. 5:44). Cupinah, Pathian nih minung nunnak caah a sermi thingkung, saram le nunnak ngei lomi ti, ni, tlang le lung hna le sermi thil vialte hna kha a dawt hna caah kanmah zong nih dawt ve kan herh i, minung nunnak le `thanchonak caah `thahnem tein kan hman a herh.
    Ei dingah a kan pekmi saram pawl zong hrem lo le `thathnem tein ei ding kan si.Thingkung le saram zong holh an thiamlo nain lunglawmh le ngeihchiat an thiam ve caah thluachuah le thlachiat an kan coter khawh (cf; Habakuk 2:17). Nunnak a ngeilo mi zong Pathian nih a fimnak in a sersiam hna ruangah, holh an thiamlo nain lunglawmh le ngeihchiat an thiam caah thluachuah le thlachiat an kan coter khawh. Kan Bawipa Jesuh an thah lio zongah ni nih a ngeihchiat langhternak ah a hmai a thup i lii zong aa hnin, van zong mithli ruahti in a sur, tlang le lung hna le puan zar zong an lungkuai in an i thlek i an kuai dih (cf; Mt. 27:45-51).
    Pathian lawng dawt i minung dawtlo cu Farasi pawl bantuk an si (cf; Mt. 23:23-26). Minung a dawmi hna cu zei bantuk miphun le biaknak an si zongah vawlei thluachuah an co. Izipt ram nau zohkhenhtu sayama pawl zong Israel pafa pawl an that siang hna lo i Pathian `thatnak an co (cf; Ex. 1:15-20). Cucaah caan`tha kan hmuh fatin `thatnak tuah zungzal awk kan si (cf; Gal 6:10).
    
Mt. 5:44    “Nan ral kha daw u law, an hremtu hna caah thla campiak hna u.”

Habk. 2:17     “ Labanon tupi ah thing na hau, atu nangmah hau na si cang lai, a saram pawl na thah hna, atu ahcun cu ramsa pawl i `tihnak he na khat lai.”

Mt. 27:45    “Chun lai pi ah ramchung pumpaluk in chunmui a tlung, Jesu fakpi in a au `than i a thaw a cat, cun Biakinn puanzar cu `thenhnih ah aa `then, lii aa hnin dih i lungpi zong an kuai dih.”

Mt. 23:23-26    “Phungbia cawnpiaktu saya hna le Farasi mi hna, nan caah ngeihchia a va si dah! Midepde hna!...Nawlbia nih a biapi taktak a timi dinnak le mi zangfahnak le zumhtlak mi sinak hna cu zei hmanh ah nan rel `tung lo. Mitcaw pawl! nan hrai chung i a ummi thil cu thianh hmasa u law cucun pei a lenglei zong cu a thian ve lai cu.”

Ex. 1:15-20    “Nau dongtu sayama pawl  nihcun pa naute zong kha thatlo in an zuah dih. Pathian `thatnak cu nau dongtu sayama hna cungah a tlung.”

Gal. 6:10     “Cu caah caan`tha kan ngeih fatin, aho cung poh ah thil`tha tuah hna u sih.”

 

Pathian dawt ding

3.    Nawlbia pahra chung i, Pathian pakhat lawng na biak lai a timi hi nihin ah, Bawi pathum Pathian pakhat a simi Pa, Fapa, le Thiang Thlarau kha dik tein kan biak lo asiahcun hell thlaknak a si. Cathiang nih Pathian sunparnak caah zei thilpoh fiang tein a chim lo (cf; Phut. 25:2). Pathian dawt ding timi bia cu thukngai in a chim caah theihthiam a harngai (cf; 2Peter 3:16) i, Cathiang an hrilhfiah tikah Pathian lung tlinnak in an biak lo asiahcun hremnak deuh an tong  (cf; 1 Chan. 15:13).
    Pathian an `tanhtuk nain “palh`tanh” asicaah Pathian sialmi lam chungah luh loin (cf; Rom.10:1-3), thihnak lam tu an zulh (cf; Phut. 16:25). Pathian duhning le a lungtlinnak in kan biak khawhnak ding ahcun (cf; Heb.12:28); Pathian dawtning phunthum (Biatlang-95) ah hin, “Pathian pakhat lawng na biak lai” timi nawlbia hi ka rak fianternak cu a si.

Mt. 4:10    “Jesu nih ‘Bawipa na Pathian lawng na biak lai i a rian lawng na `tuan lai’ tiah a leh.”

Phut. 25:2    “Pathian nih thil a thuhmi hi a sunparnak cu a si.”

2Peter 3:16     “ ....... a cakuat chung i bia hla a `tialmi cheukhat cu theihthiam a har ngai...”

1Chan.15:13    “Bawipa duhning in kan biak lo ruangah Bawipa kan Pathian nih a kan hrem hi a si.”

Rom 10:1-3    “Pathian caah an `tang ngaingai ticu a theihpitu ka si; sihmanhsehlaw an `tanhzia hi palh`tanh a si. Cu caah.... Pathian nih.....a tuahmi lam chungah an lut duh lo.”

Phut. 16:25     “Lam ti in na ruahmi kha thihnak lam a si kho.”

Heb. 12:28     “....a lung aa lawm mi pauh nih amah cu upatnak le `tihzahnak he bia u sih.”

Add new comment

4 + 3 =