Akita khualipi le Nu Mary langhnak aruang (2)

Photo Credit

A voikhatnak a Langhnak kong le Nu Mary Biacah mi (6 July 1973)

     “Ka fa nu, Ka novice, keimah zulh dingin zeizong vialte kaltaak in ka nawl ttha tein na ngai ti ka hngalh. A dam lo mi a tha a der mi na hnakhaw (ear) a fak tuk maw? Na hna chehnak in dam ter na si hrimhrim lai. Na kut i hma a um mi nih tah fahnak an pe maw? Mi vialte an sualnak in lungthlennak an hmuh khawh nakhnga caah thlacam ko. Mahkaa hmun i a um mi ka fale hna nan zapi tein nanmah ai-awh in midang chiah tthan khawh ding mi nan si lo. Bawipa thisa salnu hna i thlacamnak kha, ttha tein na cam maw? A si ahcun mah thlacamnak kha cam tti u sih.”

     “Maw a thiangbik mi Jesuh lungthin, a thiang mi Bawipa thisa chung i a taktak in a um mi, ka taksa le ka lungthin dih lak cu na lungthin thiang sin ah kan pek. Vawlei cung dih lak biak`heng cung i tuufa rawl danghnak puai i a pum aa pe mi cungah le Pa Pathian cungah thangtthatnak um ko seh law "na pennak tlung cang ko seh" tiah kan in nawl. Zaangfahnak in le toidawrnak he, keimah I pekchanhnak hi rak ka cohlan piak ko. Pathian sunparnak caah le thlarau tampi khamhnak caah na duh ning bantuk in rak ka hmang ko. Maw a tthawngbik mi Bawipa i Nu, na Fapa he zeitikhmanh ah rak ka tthen ter hlah. Zaangfahnak in na dawt bik mi na fa bantuk in rak ka huhpheng law rak ka khamh ko.” Amen.

     Mah thlacamnak a dih in vancung in aw thangpi in a chim mi cu: “Pope, Bishops le Siangbawi pawl caah thla fakpi in cam ko. Tipil na in thawk in atu tiang zumh tlak tein na campiak peng hna ti ka theih, cucaah fakpi in campiak peng rih ko hna. Nihin i thil sining vialte hna hi na bawi le sin ah chim dih hna law an in chimh mi paohpaoh kha rak ngai hna. Pathian nih thinlung tak tein thlacam dingin a kan fial va ti hna.”

A voihnihnak a Langhnak kong le Nu Mary Biacah mi (August 3, 1973)

     “Ka fanu, ka novice, na Bawipa na daw maw? Na Bawipa na dawt a si ahcun kan chimh hnga mi hi ngai tuah. Mah hihi a bia pituk mi a si caah na bawi le na va chimh hna lai. Hi vawlei cungah pa tam pi nih Bawi Jesuh cu an hrem, an fah ter. Vancung i a um mi ka pa hnemhnak caah le a thinhun mi nemter deuhnak caah thlarau tampi ka herh. Ka fapa he kan saduhthah mi cu misual mi hna le Pathian sin ah lunglawmhnak hme te hmanh a ngei lo mi hna caah anmah lungtho tein sifah innak a tuah mi le temh innak thawng in a rawk cang mi thlarau an remh tthan mi hi a si. Vawlei mi hna nih Pathian thinhunnak an theih nakhnga caah Pathian nih minung vialte dantatnak ngan taktak pek ding in timh tuahnak a ngei. (mah kaa zawn ah hin Japan ram mi hna caah a chim mi a si) ka fapa he Pathian thinhunnak a daih deuh nakhnga caah voi tampi kan in nawlpiak hna. A ra dingmi(natural disaster) rawhralnak zongin kan khamh hna, Jesuh vailam cungah a temh innak kha pekchanh in le, a thisung bik a luang mi, dawt mi thlarau tampi hna pekchanhnak thawngin le, Bawipa nih harnak in dingin a thim cang mi thlarau bu hna in Pa Pathian cu ka hnemh. Thlacamnak, sumnak le ralttha ngai in amah caah in ngamnak hna nih Pathian thinhunnak a daihter deuh.

     Mah ka chim mi hna hi nan convent zong nih tuah ve uh ti ka duh, cun sifah in duhnak, thianhlemnak thlacam ko. Mah ti cun, Pathian cungah lunglawmhnak zeihmanh a ngei lo mi le an lungthin kha thinhun tuknak lawngin a khat mi (pa pawl) vialte a i remh tthan khawhnak hnga caah thlacampiak ko hna.

     Bawipa thisa salnu hna i thlacamnak kha a sullam ruah bu tein cam law a tak in tuah i zuam law mah thlacamnak hi sual ngaihchihnak caah cam peng ko. Aho paoh nan mah le nan sining tein Pathian sinah pekchannak tuah dih uh. Pathian a thei lo mi pawl ca hmanh ah thlacamnak hi a herh. Thlacam a duh mi thlarau hna cu thlacam ding in an i pum khawm cang. Hruainak phungphai nan ngeih mi cungah i hnget tuk loin thlacamnak lei tu ah na Bawipa hnemh dingah zumhtlak si i zuam ko.

----Kan pehtthan te lai...

Add new comment

7 + 4 =