Akita khualipi le Nu Mary langhnak aruang (3)

Tlawmpal a daih hnu ah:

     “Na lung chung i na ruah mi kha a hmaan maw? Hlawt mi lung si dingin biatak tein bia naa khiah cang maw? Ka fanu/novice, Bawipa caah zeihmanh ngei lo ding in pum aa pe duh mi, aa tlak mi Bawipa salnu si ding in theih bu tein biakamnak na tuahnak ahhin thir pa 3 in vailamtah cungah khenh chih na si lai. Thir pa 3 hna cu: sifahnak, thianhlemnak le, nawl ngaihnak a si lai. Mah pa 3 chungah hin nawl ngaihnak hi a hram pi a si lai. Na bawi le nawl ngai tein um law na Bawi le nih theihthiamnak in an in hruai lai,” a ti.

A vawithum nak a Langh nak kong le Nu Mary Bia-cah mi (October 13, 1973)

     “Keimah cu a ngeih a chia mi Nu ka si. Pa pawl nih an lung an i thlen lo i mittha deuh an si lo ahcun Pathian nih ttih a nung tuk mi dantatnak in minung a si mi paohpaoh cungah a tlunter lai. Mah dantatnak hi vawleicung dantatnak vialte lakah a nganbik mi a si lai i Noah buanchukcho le Sodom le Gomorrah dantatnak hna nakin a ngandeuh mi, ahohmanh nih an hmuh bal lo mi dantatnak a si lai. Vancung in kah mei-alh a rak tla lai i mi vialte an thi dih lai. Mi ttha he mitthalo he an thi dih lai. Siangbawi le zumtu ttha hna zong an thi dih lai. Anung mi hna nih a thi mi si an duh deuh lai, zeicahtiah a nung mi hna caah vawleicung hi nun tlak mi vawlei ah an ruat ti lai lo. Rosary le ka Fapa nih a chiahtak mi hmelchunhnak lawnglawng a tang lai.

     Nifate dong loin Rosary cam peng ko. Rosary na cam tikah Pope, Bishop hna le Siangbawi hna caah tiah cam peng ko. Bupi chungah Sehtan tukforhnak a lut lai i Cardinal nih Cardinal a do lai, Bishop nih Bishop a do lai, Upatnak nganpi he a ka cawisangtu Siangbawi cu a hawi Siangbawi le nih an nehsawh lai. Biakinn hna le biakttheng hna cu hrawh an si lai. Bupi chungah a hman lo mi ruahnak le hnial kalhnak a cohlang mi tampi an um lai. Khuachia nih Siangbawi le Pathian rianttuantu tampi hna cu vawleicung pumsa duhnak lei ah a hruai hna lai i a chuahter tthan hna lai. Pathian caah pumpek in rian a ttuan mi thlarau hna cungah tukforhtu khuachia hna cu khamh khawh an si hrimhrim lo. Thlarau tam tuk sungh a si cang mi cungah hin ka ngeih a chia tuk hringhran. Mah tining te in sualnak le thlarau thihnak a karh peng ahcun ngaihthiamnak a um ti lai lo. Ral ttha ngai in na bawi le sin ah va chim. Anmah nih thazaang an in pek khawh lai i zeitik ah thla kan cam lai i mi vialte an lung an i thlen khawh lai ti cu an in chimh lai. Bishop Ito hi na Bupi a hruaitu pa a si.

     Nihin hi, ni donghnak ni nangmah sin i bia ka chim ni a si. Atu thawkin nangmah an hruaitu (Mother/superior) nawl `ha tein na rak ngai lai. Rosary a tam khawh chungin cam i zuam. Keimah lawnglawng nih rawhralnak a ra lai mi chung zongah kan khamh khawh hna i ka daihter khawh. Keimah a ka bochan mi paohpaoh cu ka khamh dih hna lai,” a ti. Mah Nu Mary a mitthli a luan mi cu (Akita Mayor) Akita khuapi uktu pa nih a mit hrimhrim in a va hmuh ve. Mah lawng siloin Diocese Bishop a si mi Bishop John Shojiro Ito zong nih a cozah uktu bawi hna sin ah heh tiah a chim ve. Cun a Cozah zong nih an theih dih tikah cun Japan a cozah pi zong cu a lung a thleng tthan ti a si. April 22, 1984 Akita Nu Mary langhnak hi a hmaan mi a si tiah “The Holy See” nih a thanh. 1988 June thla ah Ratzinger (Pope Benedict XVI) Cardinal a si lio ah Akita cung i a cang mi thil hi Bupi zumhnak in kan zoh tikah zumh awk tlak a hmaan mi a si tiah a thanh `han.

     Nu Mary nih Akita sin i a langhnak kong hi English to Chin in ka leh mi cungah hin tlamtlin lonak tampi a um lai. Lai Dictionary le Kawl Dictionary hman loin laiholh he a rem nakin ka leh mi a si. Kaa timh mi cu Nu Mary ka dawtnak langhternak caah Nu Mary langhnak vialte hi laiholh in let dih ning law lai mi Khrihfa hna vialte nih rel kho ve u sih ti ka duh caah a si.             

Alettu------ Mr. Anthony Ngunkung