Asian Contenental Synod (Bangkok)

Ringawn phuntling komhnak ah minung pakhat cio nih aw kan ngei

26^th February 2023: Meeting a nithumnak

Asia ram he a pehtlai in tuahmi tonpumhnak (synod) a ni thumnak le a donghnak cu ni hnih chung rak tuah kel bantukin Thiang Thlarau sin (Adsumus Sancte Spiritus) thlacamnak in hramthawhnak an tuah.

Ni hin tonpumhnak ah (Catholic Bishop Conference of Philippines) in Bishop Pablo David, Tuluk ram Bishop hna zung in Miss Teresa Wu, FABC zung i Bible thiamsannak commision zung in secretary, Asia synodal force task in chungtel Mis Estela Padilla hna nih houtu ṭuannak le tawlrelnak an tuah.

Mah le ram cio ai awh in synod a kai mi hna nih, a ni hnihnak i an rak ceihmai mi cungah an lung chung siaherhmi kong kha ruahṭhan in an group chungah an ruahnak kha i chimhruahnak le i hrawmṭi nak an ngei.

Relator Genenral of the XVI ordinary General Assembly of the Synod of Bishop, Luzinboh Archdiocese in Pope palai Cadinal Jean-Claude Hollerich SJ nih a biapi thil pathum kha a chimh hna. “Ringawn tumnak thil phun tling kha tahchunhnak lak in a chimh hna. Ramkip Ai awhtu pakhat cio hi ringawn tumnak thil pakhat cio nan si i ringawn tumnak hna cu hmun khat te ah aa ruang te le aw dawh tein tum khawhnak ding ah ṭuan chuah a herh tiah a ti hna. Cu pin ah aa ruang lo le ngai dawh loin a aw a chuah sual nak hnga lo, felfai tein a tu le a tu tuah ding a si.

A pahnihnak ah, hmun khat khualtlawn ṭi tikah toidornak hi a biapi, toidor nun lawng nih hmun khat te ah khual kan tlawngti kho lai tiah a ti hna. A pathumnak le a donghnak ah Cardinal nih a chim rihmi cu hmunkhat ah khual a tlawngṭi mi Bupi cu Thawngṭha Bia phuan awk ah le mah zawn ruat loin Pathian fa le hna caah rianṭuan ding in Khrih nih a thlahmi a si tiah a chim.

Mah a dih cun khuatuaktaan i thleidan thiamnak le zulhphung a hran suainak member chungtel Fr.Clarence Devadass nih zulhphung ningcang remhṭhanmi kong le ramkip ai awh in synod kaitu hna i ruahnak cheuhmi vialte komhmi ca thluan a rel piak hna. Synod kaimi hna chungin thlarau lei kong i ceihmai tikah a herhmi timhlamhnak ngeih ding in a fial hna.

 Ramkip ai awh synod kaitu hna cu hmun khat khual tlawng ṭi a si mi Asia Khrihfa Bupi ṭhanchonak le Bupi hi zei bantukin dah a thlen awk a si ti le cu cu zei tin dah kan tuah chuak lai timi bia halnak le 2023 October le 2024 October kar ah tuah dingmi Catholic Bupi he a pehtlai in tonpumnak (synod) ah kan duh chan bikmi hi zei dah a si timi bia halnak zong an ceihmai chih. Cu hnu ah synod kai mi hna nih meeting chung i an ceihmai cathluan hna le zulhphung hna he pehtlai in an ruahnak cio an chim dih hnu ah dai tein thla an cam hna.

Asia ram kip fonh meeting pi nithum chung kan tuahmi le kan ruahnak, kan hmuh ning kan chim kan i ceihmainak vialte hi sullam a ngei i ṭhathnemnak a ngei. Hi kan tuahmi hi Catholic bupi zong nih zei tik hmanh ah a philh lai lo tiah FABC (Federation of Asian of Bishops’ Conference) i secretary a si mi Cardinal Mario Grech nih a chim. FABC haotu Achbishop Kikuchi nih Asia Catholic Bupi meetingpi cu tluang tein kan dih cang ti fianternak caah meeting a kai mi vialte hna cungah lawmnak bia a chim.

Asia ram huap meeting (synod) a donghnak Missa raithawinak cu FABC lutlai a simi Yangon Achdiocese in Cardinal Charles Bo, Bangkok hmunṭhu Archbishop Francis Xavier Kriengsak Kovitvanit, India in Cardinal George Alencherry, Major Archbishop of Ernakulam (Syro-Malabar) le Thlanglei Korea ram, Suwon Diocese uktu Bishop Mathias Ri Long-Hoon (Lee Yong Hoon) hna hruainak in an tuah.

Asia ram huap meeting (synod) i a khualtlawnnak lamthluan cu Jesuh Khrih i ṭhetse ram a khualtlawnnak he aa lo i zuamcawhnak le harnak tampi um ko hmanhsehlaw tuah a herhmi a si. Zeicah tiah hi synod nih a ceihmai mi le tinhmi vialte cu bupi kha ngaiternak, hmuh tonternak le khuaruah thiamnak rian in thawngṭhabia phuannak ah tehte khaannak rian hma a kalter deuh tiah Cardinal Charles Bo nih a phungchimnak ah a telhchih. Harnak le zuamcawhnak hna kan ton tikah kan lungthin kal ning le kan khuaruahning kan thlen a hau tiah a chim chih. Hi kong he pehltai in L.E.N.T timi kongah rianternak a tuah.

L: Khrihfa Bupi cu hmunkhat khual tlawng ṭi mi kan si caah Bupi ṭhanchonak caah dawnkhaantu vialte kha kan kaltak a herh. E: Khrihfa timi cu Jesuh Khrih i hnuzul kan si i tinhmi kawltung kha fiang tein a ngeimi kan si. Mit i hmuh lawng si lo, hna nih theih lawng si lo, kan pawngkam i aa chawkvakmi hna kha mit nih zoh sawh men si loin, Jesuh lungput he zawnruahnak ngeih dingah auh kan si. N: Samaria miṭha pa bantukin innpa ṭha kong tahchunhnak i a hramthawk cu “ka innpa cu a hodah a si” timi (Lk 10:29) i biahalnak kha a si. A donghnak ahcun innpa ṭha cu zaangfah zawnruahnak a ngeimi kha a si. Asia rammi hna cu mi tlawm kan si, zatlang nunnak le ramkhel kongah i tuaitaamnak le i remlonak kar ah khua kan sa hna. Hi harsatnak lak ah hartong kan unau hna bawmh ding ah Bawipa nih a kan auh. T: A thar in i thlennak, “Maw Bawipa, na Thlarau kha rak thlah law vawlei hmai hi run tharchuah ko”. Hi meeting ah Thiang Thlarau nih a kan chimhmi kha ngai dingah auh kan si tiah Cardinal Charles Bo nih a ti. Cucaah Bupi nunnak tharchuah awk ah  hmunkhat teah khual kan tlawn ṭi ahcun, kan mah thilti khawhnak in hlawhtlinnak kan hmuh khawh lo caah Thiang Thlarau tharchuahnak kan herh. Hi synod khualtlawnnak lamthluan i kan kalṭi lio ah “Bawpa pakhat lawng hi rianh dingah” Pathian nih lungthlennak vel laksawng kan herh zungzal.

Missa a dih tikah ramkip ai awh in meeting a kaimi 12 hna nih nithum chung meeting i an hmuhton mi le pa khat le pa khat hawikomhnak tiah meeting thawkka i pangpar le phazangdan thluachuah pekmi kha an i put Missa raithawinak a hruaitu bishop hna hmai ah lawmnak bia an chim.