Biaknak hlun kha Biaknak thar ah thlen a si

Atu chan Khrihfa vialte kan Pathian biakning hi aa khat cio maw? Zei Khrihfabu nih dah Pathian kha zei bantuk in an biak, ti mi le hlanlio Biakam hlun chan ah Pathian minung pawl nih zeitin dah an Pathian kha an rak biak ti hi vun zoh tuah usih.

          Hlanlio Israel miphun hna nih Pathian an biak tikah anmah an phungning cio in le a sullam cio in pekchanhnak le raithawinak kha saram thi hmang in an tuah tawn.

          Biakamnak hmasabik nih khan Pathian biaknak caah phunglam a ngeih i Biakinn zong a ngei. A biakinn cu minung nih ser mi a si. Biaknak puanthlaam kha an ser. A lenglei cu hmunthiang ti a si. Cu chungah cun mei-inn, cabuai le Pathian sin pek mi changreu kha an um. Puanzaar pahnihnak hnulei ah khan hmunthiangbik ti mi hmun kha a um. Cu chungah cun rimhmui khanghnak sui biak-`heng le sui hut mi kuang, biakamnak kuang an chiahnak kuang kha a um. Cu kuang chungah cun Manna an chiahnak sui-um, Aron `hiang`hunh a corh mi le nawlbia `ialnak lungtlap pahnih kha an chiah hna. Cu kuang cungah cun Pathian sunparnak Cherubim an um i sualngaihthiamnak hmun kha an thla an zarh. Lenglei thlaam chungah khan tlangbawi hna cu an rian`uan awkah nifa tein an lut lengmang. Asinain chungchin thlaam ah khan cun tlangbawingan lawng a lut kho i cu zong cu kum khat ah voikhat lawng a si. Thisen kha aa put i "amah caah le mi nih hngalh loin an tuah mi sualnak caah Pathian sinah khan a pek." Hi thil vialte hi lenglei phunglam lawng an si i Pathian nih zeizong vialte a remh `han caan ca tiang lawng an si [Heb. 9:1-10].

          Chim duh mi cu hlanlio zongah hin Pathian an biak tikah thawinak thilri pakhat khat telh lo ahcun an bia lo. Pathian biak ti tikah saram maw zei maw pakhat khat tal in biak a si. Biaknak caah biakinn an ngei ve. Tuchan Khrihfa hna zong nih Pathian biaknak caah biakinn cu kan ngei cio ve ko. Asi ahcun Pathian biaknak taktak caah zeidah kan hman.

          Heb. 9:25-28 kan zoh ahcun, "Khrih cu amah le amah i thawi awkah voi tampi a luh a herh lo, cuti tuah a herh a si ahcun vawlei ser hramthok in voi tamtuk a in cang hnga. Amah le amah raithawinak i aa hmannak thawngin sualnak kha a hloh khawhnak hnga  chan vialte nih donghnak cu a phaak dengmang caan ah hin voikhat ah zaa lakin a hung lang. Mi tampi sualnak laakpiak awkah Khrih cu voikhat rai-thawinak ah pek a si."

          Khrih, vawlei cung i a rat cu minung vialte sual ngaihthiam kan sinak hnga caah le raithawinak a innak thawngin a Pa sinah minung vialte phaakpi ding kha a rian a si. Pathian nih saram thi in raithawinak pekchanh kha a lung a tlin ti lo caah a Fapa thi in thawinak ah a thlen. "Cuti cun Pathian nih raithawinak hlun vialte kha a hlawt hna i Kri raithawinak ah khan a thlen hna," [Heb. 10:9].

          Bawi Jesuh nih Raithawinak ah hman ka si ti aa hngalh caah a Pa duhning tein vawlei cungah nautatnak le temhinnak phunzakip tuar in Kalvary tlang cungah minung vialte caah voikhat ah zaa lakin Raithawinak ah aa pe.

          Jesuh nih Raithawinak ah aa hman hlan ah a kan cahtak mi bia a um. Cucu a Pum kha mitsur-haang le changreu ah a thlen i hi mitsur-haang le changreu hin Biak`heng cungah raithawinak ah hman dingin a kan cahtak. Cucaah cun Catholic Khrihfa hna caah cun tlangbawi nih biaknak pekchanhnak a tuah tik i thla a cam mi cu, "Maw zeizong vialte a tuah khotu Bawipa Pathian, Nangmah cu velngeih zangfah thiam mi na si. Nangmah velngeih zangfahnak thawngin hi changreu cu kan hmuh. Minung kut rian`uannak le vawlei in a chuak mi hi changreu cu Nangmah sinah kanin pekchanh. Hi changreu cu kanmah caah nunnak changreu ah a cang lai," a ti. Cun mitsur-haang caah khan hiti hin a cam `han, "Hi ti le mitsur-haang an i cawhnak biathuk hin kanmah minung cannak aa hrawmduhtu Bawipa nih Amah Pathian cannak kha kan hrawm ve ko seh. Hi mitsur-haang cu Nangmah sinah kanin pekchanh. Hi mitsur-haang cu kanmah caah thlarau din awk ti ah a cang lai. Maw Bawipa Pathian, kannih kha rak kan cohlang ko law toidor le lungkuai in kanin pekchanh mi thawinak hi na lung rak tling ko sawh," tiah a chim i a pekchanh.

          Tlangbawi nih a pekchanh mi changreu le mitsur-haang cungah khan tlang-bawi nih thla a cam `han rih mi cu, "Kanin pekchanh mi hi thluachuah run pe law na hna rak tla ko sawh. Thlarau le biatak in pekchanh mi hi cotlak mi ah kan serpiak ko. Hi kanin pekchanh mi hi na Fapa ngeihchun, kan Bawipa Jesuh Khrih pum le thi ah rak canter ko hna," tiah thla a camh hnu ah khan cun Jesuh Thi le Sa ah aa cang taktak cang. Zeicah kan ti ah cun amah Jesuh bia a um cang. [Jn. 6:53-56] chungah, "Biatak kan chimh hna, Mi Fapa ka sa hi nan ei lo i ka thi hi nan din lo ahcun nan chungah nunnak nan ngei kho lai lo. Ka sa a ei i ka thi a ding mi paoh nih zungzal nunnak an ngei i hmanungbik ni ah nunnak ah ka thawhter hna lai. Ka sa a ei i ka thi a ding mi paoh cu ka chungah an nung i kei zong an chungah ka nung ve," tiah fiang tein a kan chimh.

          Cucaah Catholic Khrihfabu cu Khrihfa dang he aa lawhlonak, a saannak bik le khuaruahhar a sinak zawn cu mahka zawnte hi a si. Tlangbawi nih raithawinak i a pekchanh mi mitsur-haang le changreu kha kan ei kan din `han tikah Jesuh bia, "Ka chungah an nung i an chungah ka nung ve" ti mi bia nih khan kan nunnak pi cu a `hawnter i kan zumhnak zong cu hmailei ah a fong chin i kan ruahchannak nih van a phanh.

          Cucaah Catholic (RC) Khrihfabu nih cun Biaknak ah Amah Bawi Jesuh Thi le Sa kha hmang in Pathian kha kan biak. Hi biaknak ah hin vawlei cung mi lawng si loin vancungmi le mithiang vialte hna le van hlaremhbu pawl he kan biak kan thang`hat. Hi mitsur-haang le changreu, Jesuh Thi le Sa ah a cang taktak tiah kan chim khawhnak cu [1Cor. 11:29-30] chungah a kan chim mi cu "Changreu kha a ei i hrai in mitsur-haang kha a din tikah Bawipa Pum sullam kha a hngalh lo ahcun a ei a din ah khan biaceihnak aa ei aa din chih. Cucaah cun pei mi tampi nan zawt nan fah i a tlawmpal cu a thih zong nan thih phah kha a si cu," tiah fiang tein a kan chimh.

          Tlangbawi nih Raithawinak i a pek-chanh cia mi changreu le mitsur-haang kha sawhsawh  a si ti lo, Jesuh Thi le Sa ah aa thleng cang ti cu a fiang. Zeicah kan ti ah cun sawhsawh cu sisehlaw a eitu hna kha zawtnak le thihnak tiang a phanhpi kho lai lo. Atu cu Bawipa Pum sullam hngalh loin an ei an din tikah a zawt zong an zaw i a cheu cu a thih tiang an thih phahnak kha a si. Cucaah cun Bawipa Thisa ei ti mi hi nunnak taktak zong a si i thihnak zong a si fawn rih. 

/- Saya Joseph Bawi Ngawt