CAAN CU MAN A NGEI

Minung nunnak cu a toituk hringhran. Cu nunnak a thlentertu Ni le Thla le Kum le Suimilam caan hna cu zeinak hmanhin a caah maan a ngei deuh. A sinain micheu hna nihcun a thih kho lo ding bantuk le a thih cang i zeihmanh thinphan awk a umti lomi ban tukin mah duh salam in khua a sa i caan`ha a ngeihmi vialte cu zeihmanh loin a liam termi kan tam. A ngaingai ti ahcun kan nunchung i caan`ha kan hmuh mihna paoh ahhin a dih dongh kho lomi hnangamnak le nunnak kha kan hmuh khawh hna. Cucaah caan cu maan a ngei tuk hringhran.
Mi lianngan Job nih cun minung hna kan nunnak cu chitkhat te ah a lo zaumi thladem bantuk he a tahchunh. (Job 14;2) Cun sangpawlawng cu tichungah an zarh i a hnu ahcun tilam hngalh ti lo le meiin nih chitkhat te ah mitfangah a mit bantukin kan nunnak cu a si.Cu ruangah a liam cangmi caan hna kha kan zoh `han ahcun mang bantuk an si dih tiah a rak ti.
Atu kan hman liomi caan hi kan ruah ahcun thlitu bang rang tukin a kal i a liam zau ti cu hmuh khawh a si. Kan phak rih lomi caan zong khi hei ruah ahcun kannih nih zeihmanh fiangin kan hngal kho lo aa thup rih mi caan a si ti cu a fiang ko. Thaizing kong kha i porhlaw hlah, cu ni nih zei a chuah pi lai kha na hngal lo. (Phut 27; 1) Kannih nih kumkhat maw thlakhat maw nikhat maw a ra laimi caan chungah kan nung rih lai tiin chimh khawh a si lo. Zeicahtiah caan cu kannih nih kan uk kho lo, hnabei in a nungmi minung menmen kan si ko. Caan`ha kan hmuh cang kan ti tawnmi caan hna zong khi kan kal takmi an si `han ko.