CAAN HMELCHUNHNAK

Hmelchunhnak hi san a tlai ngaingai. Ca i `ial hau loin th­­­il pakhat khat kha fawi tein a kan hngalhter. Hmelchunhnak cu cathiam mi nih an rel khawh bangin cathiam lo mi zong nih rel khawh a si. Lam hrawn ah khika lei kalnak, hika lei kalnak kha fawi tein theih khawh awkah hmelchunhnak an tar tawn. Lam a rawh sual ahcun kal awk a si lo tiah thing pakhat khat kha an khaan i cu ti cun kal awk a si lo tiah hngalh khawh a si.

Zeizong te nih mah le hmelchunhnak an ngei cio. Khuacaan nih khuacaan hmelchunhnak a ngei. Thingkung,  ramkung le minung saram hna nih mah le hmelchunhnak an ngei cio dih. Mah tlang ah minmei a zaam ahcun ruah a sur lai. Rua a par ahcun paam a tlung lai. Cuticun hmelchunh nak kha an ngiat hna. Hmelchunhnak a rel kho mi cu mifim an si i harnak tampi kha an hrial khawh. Caan hmelchunh nak a rel kho i a hmang kho mi hna cu an `hangcho. Chan zong mahle chan cio in hmelchunhnak an ngei ve. Bawi Jesuh nih chan hmelchunhnak nan rel kho lo maw a ti bal khah. Tuchan mi hna caah hmelchunhnak cu Jonah hmel chunhnak bang a si lai. "Jonah cu Niniveh khuami hna caah hmelchunhnak a si bangin mi Fapa zong tuchan mi hna caah hmelchunhnak a si ve lai," a ti.

Atu lio kan chan hmelchunhnak hna hi kan rel khawh ahcun, mi tampi nih kan chan hmelchunhnak hna hi a ruah in kan ruat bal lo. Kan chan a har, ei le din caah kan lungre a thei i thil dang kong ah ruahnak caan zong kan ngei lo kan ti. Mah hrimhrim hi kan chan caah hmelchunhnak pakhat a si ti kha kan philh cang.

Khrihfa zumhnak lei in kan zoh ahcun Pathian kan thei deuh i kan thar tiah kan ti lio ah sualnak le `hatlonak a tam chin. Bible kan cawn, kan hngalh deuh kan ti lio ah palhnak chungah kan tla deuh chinchin i palhnak chung kan tlak le tlak lo kan i thei lo. Biatak kan kawl kan ti biatak le palhnak hmanh kan thleidang kho hna lo. Mah zong hi chan hmelchunhnak phunkhat a si ve.

 Bible nih a kan chimh mi caan donghnak hmelchunh nak hna hi rel hna u sihlaw kan cungah harnak a tlun sual nak hnga lo lungthlennak in Pathian lei ah i mer hna u sih.

Catialtu - Fr. Paul Thla Kio