DAIHNAK (PEACE)

“Daihnak” cu mikip nih an i ngeih, saduhthah cio mi pakhat asinain a sullam taktak kha an thei dih cio lo. Daihnak caah an i zuam cio ko nain a dikmi daihnak kha an hmu kho cio lo. Mah hmuhnak, dirhmun le pomning cio in an i zuam cio caah daihnak taktak laak kawh loin buainak phuntling tu a chuak tawn. Cheukhat aana hmang uktu hna an uknak ram hna ahcun an pom ning he le hmuh ning aadang mi phu hna kha asoisel le ttihphaihnak, tlaih i thongthlaknak, mi thahnak tiang in nawl an buar ko na in mipi sinah an langhter ttheu mi cu “diahnak” a dirpi tu phu kan si an ti ttheo tawn.

An zulhawk lam he aa khat lomi ruahnak, cawlcanghnak kip kha “Daihnak a hrawktu” “mipi tthathnemnak lam a hrawktu” tiah sual an phawt tawn hna. An dirhmun a pomlo mi hna kha “Daihnak a duhlotu” tiah soisel in sual an phawt tawn hna. Cuccah aana hman in uknak a la tu hna i “Daihnak” timi cu ttihnak ngei hna seh tiah “sersat namneh tlaihkhipnak” menmen asi i a dikmi daihnak he cun kiklum tahnak Mercury le thir bantukin an i thlau.

Catholic zatlang nunphung cawnpiaknak hna ahcun a dikmi daihnak lei hmaihoih in an cawnpiak cio. Pope Paul VI i vawleicung diahnak thawngthanhnak (formal message) ah “Daihnak timi cu hriamnam chiahnak menmen khi asilo. Ram uktu hna dohkhawh lo dingin (the upper hand) aanaa hmang in mipi daihter zong a si fawn lo. Duh lo nak langhter khawh lo tiangin tthihphaih i a lengvuan daihternak zong asilo. Aana hmuh duh ruangah zuamcawhnak a ngei mi phu hnih kar lakah i tluk dingin cantawi tuah mi remnak zong asilo”tiah Pope Paul VI nih (Peace is possible, in Ways of Peace, Vatican Press 1973, p.51) ah a langhter.