Jesuh Khrih nih a chim mi minung phunli

Jesuh Khrih nih a chim mi minung phunli

Jesuh Khrih nih minung phunli kha vawlei phunli he a khahchunh. Matthai dal (13) nak ah kan zoh ahcun thlaici vorhtu bianabia ah khan thlaici vorhtu pa kong kan hmuh lai.

“Pakhatnak phun cu lamhril kachaang vawlei an si. Thlaci biatak (Bible) a si caah phunttha phunthiang mi a si. Vawlei phun cungah aa hngat. Kachaang- lamhril i a tla mi thlaici cu vate nih an char i mi nih an lamh caah a kung an tthang kho lo.”

“Phunhnihnak vawlei cu non a pan deuhnak lung vawlei an si. A kung a rak kheuh ko nain ni a lin tikah a linhnak an tuar kho lo i an uai dih.”

“Vawlei phunthumnak cu hling a tam mi vawlei an si. Thlaici hna cu a kung an kheuh ko nain hling nih an zual hna i an `hang kho ti lo.”

“Phunlinak vawlei tu cu non a ttha mi vawlei ttha a si caah zualtu naidemhnak um lo, rambelh zong a um lo mi vawlei an si. Cuka hmun i a tla mi thlaici tu cu letzakhat, let sawmruk, let sawmthum in an vui an tlai. Hi vawlei phunli he aa lo mi minung hna cu; mi sawhsawh zong nih theih khawhnak dingah kan fianter a si ahcun, Pakhatnak phun cu lam hril-kachaang vawlei phun, biatak kha an ngaih nain a kehlei hnakhaw in a lut i an orhlei hnakhaw in a chuak`han mi phun an si. Zeihmanh a tang lo.”

Pahnihnak miphun hna cu lung nih a danh mi vawlei phun an si. An hnakhaw in a lut i an ka in a chuaktthan mi minung phun an si. Kan chim ahcun “Bawipa thawngttha cu a tthatuk” an ti i “zeicah a tthat” tiah kan hal hna ahcun, “Kan ni peng i kan ngu kho lo” tiah an kan leh. “Zei cawnnak dah naa laak” tiah kan hal hna tikah ‘Ka hngal lo’ tiah an kan leh.

“Phunthumnak vawlei phun cu hling tam mi vawlei an si. Phungbia an ngaih tikah an hnakhaw in a lut i an thinlung tiang a khen mi hna an si. Asinain lungretheihnak hna, rian le khai hna lakah phungbia lei i zuam awk a philh tawn mi hna an si. “Nunning ziaza ah lungrawk ngai mi an si, Asinain kaa manh rih lo a ti mi hna an si.”

Ahnubik vawlei phun cu vawlei ttha vawlei thiang phun an si. Phungbia (Bible bia) kha an hnakhaw ah a lut i an thinlung tiang a khenh lawng siloin kuttongh in aa zuam a tuah mi hna an si. An lu (Head) in an thinlung (Heart) tiang a phak lawng siloin kuttongh (Hand) in a sak mi hna an si. A ttha mi (parami) pahrang theipar hna a let tampi in a tlai kho mi hna an si.

 Kha! a si ahcun careltu hawikom unau vialte hna kan umnak cio in kannih pumpak cio kha i check hna u sih!

Hnakhaw in a lut i a chuaktthan mi minung phun maw ka si; Hnakhaw in a lut i Ka in a chuaktthan mi minung phun maw ka si; Hnakhaw in a lut i thinlung in a chuaktthan mi minung phun maw ka si?

Hnakhaw in a lut i kuttongh in a tuahmi phun dah ka si. Hi vawlei minung phunphun chungin zeibantuk miphun chungah dah kaa tel tiah cekhlat hnu ah remh a herh mi kha i remh cio hna u sih! Tlokciar mi nakin kuttongh a si mi tuahnak lawng kha ttuanchuah cang hna u sih.

“Hna nan ngeih ahcun thei ko uh”(Mt; 13:9).