LAKSAWNG PEK CAAN

Photo Credit

2 Korin 9 : 12 "Asung tukmi a laksawng caah hin Pathian cu lawm ko usih."

Luke 6 : 37 - 38 "Mi dang kha va soi hna hlah u law nannih zong Pathian nih an soi ve hna lai lo; mi dang kha sual va phaw hna hlah u law nannih zong Pathian nih sual an phaw ve hna lai lo; midang kha an sualnak va ngaithiam hna u law nannih zong Pathian nih nan sualnak an ngaihthiam ve hna lai.

Midang kha thil va `hen hna u, nannih zong Pathian nih an `henh ve hna lai: liam thluahmah in, nan i chap khawh chungin, nan zawi khawh le chap khawh chungin nan chungah an thlet hna lai, Midang ca i nan hman mi tahnak rel kha Pathian nih nanmah ca zongah a hman ve lai," tiah a ti.

Christmas caan cu pakhat le pakhat laksawng i pek i lunglawmh nuamh caan a si. Asinain laksawng vialte lakah a sunglawi bikmi cu Pathian laksawng a simi Jesuh Khrih kha ruahnak caan a si. Kanmah pawl zong vawlei cung thilri pawl kha laksawng kan i peknak nak in a thuk deuh in a sullam a um mi laksawng kha kanni pek a hau.

(1) Mino fale pawl nih nu le pa kha zeidah kan pek lai?

          Nu le pa dawtnak le an bia ngaihnak, nu le pa i an duhnak, an kan nunter duhnak ningin nun khawhnak laksawng kha pek ding a si.

(2) Unau tafar rual nih zeidah kan i pek cio lai?

          Pakhat le pakhat i zawnruahnak, dawtnak le zaang fahnak, ngaihthiamnak le airawlhnak kha kan i pek awk a si.

(3) Nu le pa hna nih fale hna kha zeidah kan pek hna lai?

          Vawlei cung thilri fimthiamnak nak in Pathian theihkhawhnak fimthiamnak le dawtnak in kan caan kha hman piak deuh a herh. Kanmah pumpak bak in lam hmaan lamding kha hmuhsak awk a herh.

(4) Kan pawngkam hawikom tah zeidah kan pek hna lai?

          Dawtnak, zawnruahnak, kanmah tluk in dawtnak lawng si lo in kan pum i pek in dawt khawhnak le an thilrit kha chaan khawh awk in laksawng kha kan pek awk a si.

(5) Pathian tah zeidah kan pek lai?

          Zumhnak kan ngeihchung kan pek chan lai. Amah duhning in nun kan ni zuam lai. Mah zawnruahnak le pawrhlawt ruamkainak vialte kan hlawnh lai. Sual kan ni ngaichih lai ti mi laksawng pawl kha kan pek a hau.

          Jesuh nih pakhat cio kan lungthin kha a kan hal. Kan lungthin kha kan pek awk a si.

 

Rev. Fr. Lucas Khia Mang

Add new comment

1 + 2 =