Lamkaltu Tuanbia

5. LAMKALTU TUANBIA BIBLE CU PUMKHAT SINAK, PATHIAN KHA TEHTE A KHAAN
    Lamkaltu tuanbia (Bible) a dihlak zong hi Thiang Thlarau rian`tuannak kha tehtekhan in a `tialmi asi. Zumtu hna kha pumkhatte pakhat sinak ah a serpiaktu Pathian a sinak kha tehte a khannak asi. Pentecost ni ah a rak `tummi Thiang Thlarau Pathian cu lungngetnak, hmunkhatte umnak, pumkhat sinak i Bawi a sinak kha hmasabik ah fiangtein a langhter hnu ah tehte a khan.¹³

(a) Pentecost ni ah zumtu hna hmunkhat tein an umnak hmun, lungkhat thinkhat tein an umlio caan, lungnget tein a ummi zumtu hna cungah Thiang Thlarau Pathian a rak `tum (Lam. 2:1).

(b) Thiang Thlarau Pathian cu minung a `thencheu tertu Pathian asilo. Bawipa cu minung a pumhkhawmhtu  Pathian asi. Hi konglam he pehtlaihin bible ah tehte a khaanmi cu, Thiang Thlarau Pathian a rak `tumnak in a chuakmi awthawng an theih cio tikah mi tampi hna cu lamkaltu hna le zumtu hna hmunkhatte pumkhat in an i pumhnak hmunah an rak i khawmh (Lam. 2:6).

(c) Miphun zakip, holh phunphun hna zong cu, mithiang Peter phungchimmi kha dikthliar tein an ngaihcio (Lam. 2:5-36). Ahohmanh hmun aa cuhmi an umlo. Kei cu Thiang Thlarau ka hmuh, kei zong ka hmuh ve, keimah zong ka ngei ve tiah bia alnak pakhat hmanh a um baklo. Thiang Thlarau nih a toihmi hna cu Peter pakhat lawng asilo.
    Lamkaltu dangdang hna le zumtu hna cu an dihlakin (120) tluk an si. Asinain, cu ni ah lamkaltu Peter lawng nih phung a rak chim, adang lamkaltu hna, zumtu hna le Jerusalem ah a rak i pumkhawmh mi vialte hna cu mithiang Peter phungchim mi kha an ngaihcio. Lamkaltu hna cu pakhat le pakhat i cuh in phungchimnak an rak tuahlo.
    Hi konglam cu Thiang Thlarau Pathian cawnpiak hmuhsak mi biatak cu, lungngetnak, hmunkhatte pakhat sinak asi kha fiangtein a langh.

(d) Thiang Thlarau Pathian cu lamkaltu hna le annih rocotu hna hmangin zumhnak he pehtlaih mi biatak kha zungzal in an cawnpiak i an hmuhsak. Zumhnak kong an cawnpiaknak zongah pumkhat sinak kha an ser peng. Zeitindah kan theih khawh lai ti si ahcun;
(1) Lamkaltu hna he pumkhat tein a pehtlaihter.
(2) Lamkaltu hna i tuah tawnmi Pupa phunglam kha zohkhenh kutchanh in a pekpiak.
(3) Mit in hmuhkhawh asi i, lamkaltu hna sinin a ra mi, pumkhatte asimi Bupi pakhat lawng sernak.
(4) Bawipa Jesuh chiahtak mi biak phunglam asimi Missa tuahnak in pumhnak ah kpumkhat pakhat asiter.
(5) Hmunkhat tein thla a camter hna nak thawngin zumtu dihlak kha pumkhat pakhat siternak tiin hmuhkhawh, tonghkhawh komhkhawh mi hmunkhatte umnak, pumkhat pakhat sinak kha a saktu Pathian asi.

End Note:

13 Cf. Raniaro Contala messa, The mystery of Pentecost, trans, Glen S. Davis (college Ville, MN: Liturgical Press, 2001), especially chapter 1; Matthew Levering, Engaging the Doctrine of the Holy Spirit, 281-284.