Missa hal cu Pathian thluachuah hmuhnak a si

Catholic a si mi paoh cu a zei caan paoh ah thlacam piak a herh lomi le Missa tuah piak a herh lomi kan um hna lai lo tiah kan zumh. Thlacam piak nak in Missa raithawi nak hal le tuah piak cu hmual a ngei deuh mi a si ti cu zapi kan theih cia mi a si ko nain Missa hal hi a dang Diocese nak in Hakha Diocese hi a tlawm deuh khun ti cu fiang tein kan hmuh. Missa halnak  hmual ngeihnak kan theihthiam rih lo caah maw a si, kan sican nak nih a phanh lo ruangah maw a si hnga. Kaa dang ramdang ahcun Missa a hal mi hi an tamtuk ruangah siangbawi hna nih Missa nan hal kho rih lai lo tiah an khamh caan te hna a um ttheu.

Siangbawi hna sin i Missa kan hal kan hlut mi te khi siangbawi hna nih an pawcawmnak le an duhherh mi a um nak tete ah an hman khawh mi te a si. Atu kan siangbawi pawl i nifatin Missa an tuahmi hi ramdang in Missa a hal mi hna caah thlacam piaknak le raithawinak an tuahpiak mi a tam deuh. Kanmah pawl zong Missa kan hal ruangah kaphnih in Pathian sin i a hlu kan pek a si lengah siangbawi pawl kha kan bawmh kan cawm hna zong a si; cu hlei ah kanmah caah Pathian thluachuah kan hmuh khawhnak ca zongah kan tuah mi a si fawn.

Kumkhat ah voikhat tal Missa na hal bal maw? Zumhnak le duhnak taktak na ngeih a si ahcun Missa hal khawh lo ti cu a um lai lo. Nan innchungkhar ah a tlawmbik nan chuahni cio tal ah, Pathian thangtthat le lawmhnak in siseh, hmailei ngandamnak, paw cawmnak caah siseh, na hal khawh ah cun Pathian he nan i pehtlaihnak a fek chinchin ko lai.

Kumkhat chung ni 365 ni chungah na hmuh mi na ni hlawh ni (2) ca te tal khi rak khong law, cabawm chung te ah khumh law, cabawm a phaw cungah na hal duhmi, naa tinhmi te kha ttial law, siangbawi pa kha pe law mah cu a si ko. Siangbawipa nih na hal duh caan te ah Missa an tuah piak khawh le khawhlo an chimh lai i Missa na hal ni ah nangmah zong lungtak tein naa tel ve ahcun hmual a ngei tuk mi a si. Mah na hal duh mi te kha siangbawipa nih Pathian sinah thawinak in an hal piak lengah Missa chung aa tel mi vialte (a ngaimi vialte) nih an in halpiak ve tikah hmual a ngei khun mi a si i Pathian nih na hal mi cuan pek hrimhrim ko lai. Zumhnak duhnak taktak na ngeih ah cun na tuah khawh tuk mi a si ko. Pathian thluachuah tam chinchin in na hmuh lai.

Siangbawi te nih “Missa hal u” tiah an chim ngam tuk setsai lo. Aruang cu Phaisa a duhtuk mi kan lo sual lai ti an phan caah a si. “Midang kha thil va tthen hna u, nannih zong Pathian nih an tthenh ve hna lai. Liam thluahmah in nan i chap khawh chung, nan zawi khawh le khawh lo in nan kut chungah an tthenh hna lai”(Lk 6:38). Tampi a tuh mi nih tampi an zuun tawn, tlawmte a tuh mi nih tlawmte an zun tawn (2Cor 9:6).

/- Ca ttialtu - Robert Hram Ceu