Missa kan hal bal maw?

(Catialtu  -  Robert Hram Ceu)

Zeiruangah dah Catholic bupi hi nihin vawlei cungah a tthancho i zumtu a tambik mi le daihnak, remnak, hngangamnak a tambik mi a um Bupi a si?

            A biapi bik cu Bawi Jesuh thisa sacrament kan zumh ruangah a si. Bawi Jesuh a thih hlan hmanungbik zaanriah an dum lio ah mitsurhang le changreu in a thisa a sernak kha nihin ni tiang zong ah Missa timi Bawipa thi le sa sernak, zumhnak taktak ei dinnak kan ngeih ruangah a si. Hi tuah sernak hi a thuk tuk mii a si i zapi nih cohlaan khawh,  zumh khawh le theih khawh a har ngaingai mi zong a si. Lai holh in kan chim a si ahcun Raithawinak kan tuahmi a si kan ti khawh. Pathian biaknak kan tuah kha a si. Bible ca hlun ah tuufa in raithawinak an tuah, Cathar ah Bawi Jesuh nih amah pum kha kan zapi caah thawinak in a pekchanh cang caah mah a pekchanhnak a pum le a thisa taktak cu amah nih a kan chimh bantu in nihin ni tiang Bupi tuahsernak in a sangbik mi le a thukbik mi zumhnak, tuahsernak raithawinak cu a si.

            Khrihfa ttha si awkah hi bantuk raithawinak ah hin dotla tein le lungtak tein kan i tel a herh. Raithawinak ah kan thazang um tawk in pekchanhnak kan ngeih ve a hau. Catholic Khrihfa a fel taktak mi hna nih cun a tu le a tu Pathian sinah biatak raithawinak Missa an hal zungzal. A sullam cu Pathain sinah thangtthat nak lawmhnak, thluachuahnak le bawmhnak kan hal mi a si. Cuasi caah Pathian na thangtthat ahcun na lawmh ahcun, bawmhnak hal na duh a si ahcun pekchanhnak na tuah a hau. Phungchim thiam le thlacam thiam lawngin a za lo. Midang pawl cu raithawinak an ngei lo. Pastor pawl kha thla kan campiak u tiah an auh hna, rawl an dangh hna i  a hlu an pek hna.

            Kannih zong Missa kan hal mi cu Pathian kan thangtthat kan lawmh, bawmhnak kan hal mi a si caah amah lawmhnak in ahlu kan pek a si. A biapi in thlacampiak kan herh caan, har caan, ngaihchiat caan, kan chuah ni, lawmh caan  te hna ah Pa Pathian sinah thlacampiak dingin “siangbawipa raithawi pekchanhnak kan tuah piak” tiah kan hal mi hi a hmual a um tuk mi a si. Missa hal i zuam cang u sih.