MYANMAR RAMAH THAWNGṬHA PHAWTZAMH HRAMTHAWKNAK

BIAKNAK KARHTER RIANṬUAN HRAMTHAWHNAK LE ZUAMNAK HNA

          Bupi i Biaknak karhter (mission) rianṭuan timicu mah le umnak hmun, phanhnak hmun i tuanbia sican ning cungah hrambunh i Bupi dirhnak kha asi. Bupi (Khrihfa) umnak hmunkip, caankip ah Biaknak karhter rianṭuannak a um peng ve lai. Bonferro (1559) le Paolo (1568) hna i biaknak karhter (mission) rianṭuannak a rak dong nain Myanmar ram leiah Thawngṭha (Evangelist) phungchimtu, thawngṭha phuan ding aa zuamṭhan mi zong an rak um. (1689) kum in (1722) kum tiang Barnabite biaknak karhter hna (missionaries) an rak phak tiang ah Awa le Naypyidaw pahnih i biaknak karhter rianṭuannak kha Yudia (Thailand) Biaknak peng (diocese) uk Bishop nih a rak zoh hna. Franciscan Tlangbawi pahnih asimi hna cu Fr. John Jeno le Fr. John Joret an rak si. Cunglei i kan langhter cangmi Myanmar Portugal khua kha an rak hmuh. Asinain Buddhist Phungki hna i sualpuhnak ruangah (1693) kum ah thahnak an rak ing. Annih thah an innak cu Biaknak Konglam ruangah asilo, Portugal hna an huat ruangah asi, ti zongin an chim.

 MYANMAR RAM AH THAWNGṬHA CHIM PHAWTZAMH HRAMTHAWHNAK

          Bishop Carlometbarba nih a hruaimi palai phu cu Tuluk ram lei kal dingin (1719) kum ah Pope Clement (11) nih a rak thlah hna. Tuluk ramchung an luh khawh lo caah an rak i ṭhitmi Biaknak karhtertu (missionaries) hna kha ramdang hna ah kan thlah ah aṭha deuh men lai, tiah Bishop nih cun bia a rak chah. Mah Tlangbawi hna chungah Barnabite phu chungtel Tlangbawi Karchi kha Awa le Bago Naypyidaw lei kal dingin a rak thim. Mahticun, Myanmar ram leiah pungsan hmaan tein Catholic biaknak karhter rianṭuannak cu, Fr. Karchi le Fr. Joseph Vitoni hna an rak phak kum (1722) in a rak i thawk, tiah ahnu (keneh) zulh khawh asi. Annih Evangelist caah an rak i zuamnak cu Madras le Myanmar ram in Franciscan Tlangbawi pawl nih an pengram kaltak an rak duhlo caah hnahnawhnak fakpiin a rak pek hna. Dinfelmi an thinlung ṭhawnnak kha Pegu Siangpahrang nih a tlaihchan hna caah annih kha a rak cohlang hna i, Naypyidaw chungah Biakinn hna a sakter hna hnuah Biaknak karhter (mission) rianṭuannak nawl a rak onh hna.

Add new comment

2 + 12 =