Nang le Kei Hawikomhnak

5. “NANG LE KEI HAWIKOMHNAK” LE DAIHNAK
(“I- Thou relationship” and Peace)
Philosophy thiamsang (Martin Buber) chimmi “Nang le Kei hawi komhnak” (I - Thou relationship and Peace) kong chimta ka duh. Kei cu minung ka si bantukin nangmah zong minung na si ve. Kei cu Pathian muisam he aalo mi in ser ka si bantukin “Nangmah” zong na si ve. Cucaah “Nang” zong “Kei” zong aakhahmi huham kan ngei, aakhahmi `hawnnak kan ngei i aman zong kan ngei veve. ‘Nangmah’ le ‘Keimah’ hawikomhnak cu aa tluktlak mi pehtlaihnak asi.
“Nang le kei pehthlaihnak” cu khat le khat pehtlai tein upatnak le manngei ah chiahnak huham aakhat mi hawikomhnak asi. Hi pehtlaihnak ah nang le kei karlak naihniam dingin thinlung hlei hna kan donh. Zawnruahnak hlei, zaangfahnak hlei i theihthiamnak hlei hna an si.
Nang le kei karlak ah huatnak hlei hna, ruamkainak hlei hna, keimah tinak hlei hna kha kan hlawt hna. Hibantukin “Jesuh Khrih minah pahnih (loah) pathum hmunkhat tein kan um ahcun kei cu nannih sinah ka um” (Mt. 18:20). Kha bantuk khat le khat pehtlai tein dawtnak a ngeimi pahnih karlak ah Pathian a um caah a dai ko.
Hi vawlei ah nang le kei kan itonnak cu thlachuak mi asi. Pathian veel thawngin asi. Cucaah Pathian minah huatnak tello in dawtnak ah kan i tong lai. Hlennak umlo in dinfelnak he kan i tong lai. Ruamkai porhlawtnak telo in i dawt tein kan i tong lai. Khibangtuk tonnak cu innpa (midang) kha mah pum bantukin dawtnak he i tonnak asi. Hi tonnak cu lung a khahter. Thazaang asi, Pathian zultu hna kan sinak kong tehte khaannak asi (Mt. 5:13).
Asinain keimah cu “Keimah” nangmah ka si lo. “Nangmah cu nangmah” keimah na silo, a dangmi veve, adangte thil ti khawhnak hna, adangte duhmi hna he adang tein thluchuah hna an um. Midang kha mah pum bantukin a dawthiam mi cu midang kha mah pum he aa rupte siding in a tuah lo. Midang i adangte sinak kha a upat, tha a pek, midang i adangte sinak kha a hnatlak pi, midang i mah pum he a thleidan mi sinak i thil ti khawhnak, `thanchonak caah aa pum pek. Amah nunnak karhchonak, teinak hmuhnak, daihnak hna cu keimah kongkau asi, timi dawtnak thinlung a ngei.

>>> Kan peh`than lai>>>