NULEPA CA I ROCA

NU LE PA PUAINI (OR) JOACHIM LE ANNE PUAI NI (26 July)
    Dominican Kodaw
Hi puaini he pehtlaihin daite le lungtak tein khua kan ruah hlan ah (thlacam hlanah) Nu le Pa he pehtlaimi puaini hna kong, Khrihfabu hna nih kan tuah ningcang, tuah ni hna cu nikhat le nikhat, hmunkhat le hmunkhat aalo cio lo i hmun ram le nun phunglam ning cio in aa dangdang in an tuah cio kha kan hmuh. Cheukhat hmun hna ahcun Pa ni, Nu ni tiah ni dang tein an tuah i, hmun cheukhat hna ahcun Nu le Pa hna ni tiah komhin an tuah kha hmuh asi. Myanmar ram Catholic Bupi ahcun Bawinu Mary i a nu le pa asimi Sts. Joachim le Anne Puaini, 26 July ni ah kan tuah cio mi cu, phunglam pakhat bantuk ah a can cang kan tikhawh. Cucaah July thla (26) ni cu Bawinu Mary i a Nu le Pa hna ni asi bangin, Nu le Pa hna ni tiah zong Myanmar Catholic Khrihfa hna nih kan cohlang i kan theih.
    Bupi chung phungningin fehtermi Bible Thiang ah Joachim le Anne cu Nu Mary i a nu le a pa an si timi kan hmu lo. Nain, James (,/:) Bible timi hlan Bible pakhat ah Joachim le Anne timi innchungkhar tuahkhat ah kum upa (tar lei) an si tiang fa ngei kho lo in an um. Cu hnu nikhat ah, Pathian Vancungmi pakhat cu kha nuva hna hmai ah a rak lang i fate (naute) pakhat nan hrin lai i, mah ngakchia kha Pathian nan pekchanh lai, tiah a rak ti hna. Cu hnuah, fanute Mary kha an hrin i an zohkhenh an cawm hnuah, Pathian bia an cawnpiak pah in ahnubik Pathian nu sinak ah aatlak in an chuahter tiah a langhter. Annih cawnpiaknak le chimhhrinnak thawng lawnglawng in Mary cu “Bawipa na bia bang in ka cungah tlungko seh tiah a chim khawhnak asi, tiah a mial. Zeibantuk zulh tawnmi phunglamning hmanh ah siseh, Bupi chung tu ahcun Joachim le Anne nuva hna cu zohchunh awk tlakmi, nu le pa tuahkhat sinak in hramthawhnak Khrihfa hna chan lio thawktein upat hmaizahnak an rak pekmi Mithiang hna sinakin an rak cohlan hna.
    Nu le Pa hna he pehtlaihin Bupi chung Bible hlun, Bible cathar hna in fiangtein cawnpiaknak a um ko. Nawlbia pa (10) chung i Pali (4) nak an “Na nu le na Pa va upat hna tiah a cawnpiak. Catholic Bupi i Athiangmi zumhnak cawnpiaknak 2215-2220 chung zongah fiangtein a cawmpiak.
    Vawleicung i a ummi minung nuai tampi chungin kannih caah nu le pa timi hi dikthliartein kan chim ahcun Papa le Nunu timi minung pahnih lawnglawng an um. Nain kan nunnak ah kha Papa le Nunu bantuk asimi hna zong nu le pa sinak in upat hmaizah awktlak mi an si ve. Buddah zumhnak nih a khuhchilh mi Myanmar-Fimnak Bible cawn piaknak (—.-;’:8) zongah upat awktlak (!——91, !——9) phu chungtel sinakin, nu le pa kha a hmuhsak. Cuve bangin kannih Khrihfa cawnpiaknak zongah nu le pa timi cu upat awk tlak mi lawng silo in, Pathian nih fale caah, hi vawlei ah khinhmi (ttuanvo pekmi) Pathian aiawhtu Kuzale an si i, nu le pa timi cu nawlngaih awk tlakmi an si kha fiangtein a kan cawnpiak. Bawipa Jesuh Khrih pumpak hrimhrim zong ahhin vawlei ah a rak um lio ah (a rak umlio ah) St. Joseph le Nu Mary kha upat tein le an nawlngaih tein a rak um kha Thawngmhabia nih roca a chiahmi kan hmuh.
    Nawlbia pahra (10) kha mhenhnih ah mhen i zohfel khawh asi. Nawlbia pathumnak tiang cu minung nih Pathian cungah chiah dingmi thinlung put he pehthlaih in a cawnpiak mi asi i atangmi nawlbia pasarih (7) cu kannih minung khat le khat cungah peh thliahmahin chiah ding mi lungput kha a cawnpiak. Cuti minung khat le khat cungah kan ngeih (chiah) dingmi lungput ah Nu le Pa cung chiah dingmi lungput cu pakhatnak ah aum, cucaah nawlbia pali (4) nak ah Na Nu le Na pa va upat hna tiah a tinak cu asi. Nawlbia pasarih (7) i pakhatnak (hmasabik) nawlbia asi bantukin nu le pa hna cu kan nunnak ah hmasabik hmunhma a la mi asi. Kannih kha minung nunnak ah a kan hruai piaktu hmasabik tawngh a ingmi hna cu nu le pa an si. Kannih kha fimnak a kan chimh hmasabik zong nu le pa an si i hmaisuang Saya tiah chuankhanhmi an si. Kannih kha a kan theihthiam khotu bikmi hmasabik hna zong nu le pa an si caah, seichia le bawmchia (rop) lawnglawng hlonh phung an si tawn nain fapa mha lo, fanu hrut cu an hlawt ballo timi phungthluk a chuaknak asi. Nu le Pa dawtnak cu sawhsawhte a sinain dong khawh lo tiang a ngantuk hringhran caah ca in mial khawh lo tiang asi. Myintmo tlang timi tlangsangpi hmanh nu le pa dawtnak hmaiah cun ahme aniamtuk rih.

    Sihmansehlaw tuchan piter nu le pa hna cu zaangfak awktlak ah an i chuah cang. Sipuazi kha papektuk chan asi caah zeizongte cu tuaktan an ing tikah, nu le pa hna zong tuaktan an ing ve cang. Nu le pa hi kum upa an sicang caah san an tlai ti lo tiah tuaktan a in cang ahcun kuatnak ding hmun cu Putar pitar chiahnak inn (keha) asi ko. Cheukhat a sual deuh (chiahru) deuh mi cu fale nih hlawt i an kal tak mi kha asi. Innchungkhar bupi ah Dawtnak hmanh hi sipuaizi bantukin an tuakcang ko lo mei? Putar hna inn zong timhcia in tuah mi, nu le pa hlawtnak inn tiah mitampi nih an ruah. Lungfak awk ngai asi.
    Hawidawt hna - Nihin nu le pa puaini ah khi hna kha thukpiin ruatding kan sawm hna. Ahleice in Bawipa Jesuh zohchunh in tuah aa zuammi Khrihfa hna i athiangmi zumhnak ah Dawtnak cu asangtuk hringhran. Kannih cu, “Pathian cu Dawtnak asi” ti tiang dawtnak lawnglawngin Pathian fa kan sinak kha tehte kan khaanding asi. Cuti tehte khannak ah hmasabik dawtnak ngeitu an si caah kha hna he i peh in tuahnak cu Pathian innchungkhar sernak ah tahfung an si. Cucaah Bupi cawnpiaknak ningin nu le pa cu upat awktlak le an nawl ngaih awk tlak an si. Annih tinvo thawngin an nawl kan ngaih awk asi. Phundang incun, Pathian cung kan lungput cu nu le pa kha an nawl kan ngaihnak in kuttongh in kan tuah khawh mi zong asi.
    Nihin, nu le pa puaini ah kannih nu le pa dihlak nih Sts. Joachim le Anne kha kan zohchunh khawh i fale hna lamhruai kho mi, nu le pa hna siding ah thlacam hna usih. Cu ve bang in, kanmah pumpak zong Bawipa Jesuh bantukin, nu le pa kha upat, ngaih a thiammi fale hna siding ah thlacamnak in kuttongh in zuamcio hna usih.

    Nobert Ca Ling (OSC)
    27 July 2023 (Thu)