Theithiam Hna U Sih!

Theithiam hna u sih.

Bu pakhat khat a si lo ah mah nih zumhmi bu le midang nih zumh i diarpi mi bu a cuai va thlai ti ding a si hrimhrim lo. Bu kong he pehtlaih zongin bia i el ding a si hrim hrim lo. Bu pakhat, zumhnak pakhat kan ti mi hna hi sianginn cacawnnak ah cawnchawm mi zong a si lo. A tu lio na um nak na bu cungah zumhnak na ngei kho tak tak maw ngei kho tak tak lo ti zong ruah hma sat ta a hau. Na zumh mi kha theih ta i zuam law, na theih hnu ah zumh zong i zuam ding a si. Biatak kan ti a si ah cun, zumhnak, bu pakhat konglam he pehtlai in ruah tikah a kua tuk i an thuk ngaingai ko hna. Cu a si caah mah nih zumhmi hmanh hi theih a har ngaingai ko hna.

Bu konglam a si lo ah, zumhnak kong he pehtlai in midang hna he biaruah tinak kan tuah cang lai tiah naa timh a si ah cun nangmah le nangmah na zumhmi bu konglam theih hmasat i zuam ta. Mah zumh mi bu pakhat konglam lawng hmanh ruahning ruahning phunkip in theih hmasat i zuam ta a hau. Bu pakhat a si lo ah phu pakhat cung lawngah na ruahnak a dih in na chiah sual a si ah cun, cu ruahnak bi in luat khawh ding i zuam ta. (Chim duhmi cu ruahnak kaupi in na bu konglam kha theih i zuam). Na theih dih cikcek hnu lawngah midang zumhmi bu he pehtlai in biachim ti dingin i tim. Zumhnak konglam he pehtlai in bu dang hna he bia chim ti (dialogue) kan ti tikah pakhat le pakhat i zuam ding zong a si lo.

Thil dik, Biatak tu kha phukhat le phukhat i bomh in theih khawh i zuam ti ding a si. Cu a si caah midang hna nih an zumhmi bu konglam na theih cia lo a si ah cun zei tin dah bia cu na chim khawh ve hnga? Cu ti a si lo ah cun, pakhat le pakhat i zuam ding lawng (Mah bu kong lawng dirpi) naa tim lai i midang cungah tei khawh duhnak lungthin lawng na ngei ko lai. Cu ti a si ah cun kap khat le khat bia el nak lawng a chuak lai i thin hunnak le i sik nak lawng a chuak ko lai. Dawtnak le theih thiam piak nak lungthin ngeih khawh a si ti lo caah chiatnak le rawhral nak lei lawng a panh ko lai.

Ruahnak bi te chung lawngah um i thil ttha lo lawng a chuah ding na theih ko a si ah cun Bu dang hna he biaruah ti dingah naa tim ko rih lai maw? A si lo ah thil tha chuah khawh ding caah tah zuamnak lungthin na ngei kho lai maw? Biatak in kan ruah a si ah cun zeibantuk zumhnak paoh nih thil tha cuah khawh cio nak ding lawng an i tim cio ve hna i, an biaknak chung tuah sernak si hna seh, hruai ning cang siseh, thatnak lei lawngin an i cawnpiak cio ko hna. Cu a si caah, mah ni tuah sual, palhsual ruangah mah nih zumh lio ko mi bu hmai chiatnka a pe tu na si sual ah cun, i ngaichiah tthan thiamnak lungthin zong ngeih khawh i zuam ko. Palhsual a si le mah nih palh mi cungah tavuan lak ngam ding a si ko. Cu ti a si ah cun, kapkhat le kapkhat (Bu khat le bu khat) cungah i theihthiam piaknak a um lai i "Daihnak" lei ah lam kan panh ti kho ko hna lai.

By. Fr. Fidelis