HAWIKOMHNAK PATHUM A RAWHNAK (POPE FANCIS)

Sualnak ṭhatlonak hna ruangah Pathian le minung hawikomhnak, minung khat le khat hawikomhnak, minung le pawngkam hawikomhnak phunthum ning tein a rawhnak

 Bible thiang chungah a langhter mi Kain le Abel hna kong kan relnakin Kain cu nahchuahnak lungthin ruangah amah nau cungah dinfellonak kha a rak tuah. Hi konglam cu, Kain le Pathian karlak ah hawikomhnak kha a rawhter i, amah nih ṭhawlnak a ingmi vawleipi le Kain hna karlak zongah pehtlaihnak a rak hrawhter.

            Hi kong cu Pathian le Kain karlak an chimmi bia ah a lang. Pathian nih Kain kha na nau tah khoikadah a um tiah a hal i zeihmanh ka thei lo, tiah a rak leh. Pathian nih a halpeh ṭhan tikah khan “nang zeithil ṭhalodah na tuah? na naupa thisen nih khan Vawlei in a ka auh lengmang ko; nangmah cu chiatserh na si cang i hi hmun in ṭhawl na si lai” (Gen; 4:9-11).

            Kannih vialte cu kanmah he naihniam mi kan innpa hna kha ṭhatein kan ralring lai i, annih bawmhchanawk ṭuanvo kan ngei ko nain midang hna he hawikom ser awk le annih he chiah mi hawikomhnak kha pehzulh in kilven dingmi ṭuanvo hna kha zeiah kan rello caah kan nunnak chung i pum le lungthin fonh rianṭuannak kha a rawhter i minung khat le khat hawikomhnak, Pathian he chiahmi hawikomhnak le pawngkam kokek cungah chiah hnga dingmi hawikomhnak vialte kha a rawhter dih.

            Hi hawikomhnak vialte zeiah an rello cio tikah, vawlei cungah ningcangnak a umlo tikah mah nunnak ca zong thinphang lungretheih a dinnak kong kha Bible thiang in a langhter. Noah kong a chimnak ah minung hna cu Pathian nih a kan halmi ningcang tein sinak le daihnak caah rianṭuan awk kha zungzal an tlolh lengmang caah minung chungkhar kha ka hrawh dih lai, tiah a rak ṭhih hna. Zeicahtiah vawlei pumpi hi minung nih buar mi ṭhihphaih sualnak hna in a khat caah saram hna hmanh kha hrawh dingin bia ka khiah cang (Gen; 6:13).

            Vawlei cung thilnung saram vialte cu khat le khat pehzulh tein an i pehtlaih dih i mah le nunnak caah kokek pawngkam he komhnak a ṭhatnak ding caah zuam in rianṭuannak cu khat le khat unau ṭafar bantukin daw tein um cionak, ning cangnak, minung khat le khat dinfel tein umnak tiah tuchan minung hna i an duhherhnak kha hlan pupa hna nih ṭha tein an theih fiangnak kong kha hlan tuanbia hna ah lem a cangmi sullam hna in a langhter.