MINUNG LE KOKEK PAWNGKAM HAWIKOMHNAK

Minung le kokek pawngkam hawikomhnak aa tlak dingah

Vawlei cung minung hna an thinlung ṭhatlonak le sualnak an tuah mi a tamtuk hringhran caah (Gen. 6:9) Pathian cu minung a rak sermi kha a ngaih a chia, aa ngaichih i (Gen. 6:6) tiah a langhter nain, Pathian cu a dinfel i miṭha a simi Noah thawngin minung khamhnaklam onhpiak dingah bia a chah. Cuticun Pathian cu minungkha mah le nunnak a tar in thawkṭhannak caanṭha kha a rak pek. Ruahchannak kha hmuhpiak ṭhan ding i a herhmi cu miṭha pakhat si kha asi.

Bible thiang chungah zulhtawn mi phunglam ningin a langhter mi ah a thar in thawkṭhannak ah sertu cu kokek vawlei   heernak ningcang ah betchih mi upadi hna kha theihṭhan in upat le zulh a herh, tiah fiangfai tein a langhter. Tahchunnak ah hi kong kha ulh ni le pehtlaih mi upadi a sermi ah kan hmuh. Nisarihnak ni ah Pathian cu sernak rian a lim hnuah aa din. Bawipa cu Israel miphun hna kha nisarihnak ni ah a dinhter hna i cu ni kha ulh ni ah rikhiah dingin nawl a pek hna (Gen. 2:2-3); (Ex. 16:23; 20:10).

I lawh dengmang nak in kum (2) ah voikhat an cithlaknak vawlei kha an dinhter (Lev. 25:1-4). Cu kum ah thlaici cinnak kha an khap i mah le mah innchungkhar hna caah a zaceo mi thlairawl hna lawng kha zunnak nawl an ngei (Lev. 25:4-6). Ahnubik kum i zarh voi (1) a rauh tikah (7Í7= 49), minung khat le khat hawikomhnak le annih an ṭuan an ei an nunnak vawlei he hawikomhnak hna ah zawnruahnak, ningcangnak um dingin i zuamnak menmen a si.

Pehzulh in hi upadi an sernak cu Pathian laksawng sinak in a pekmi vawlei pumpi le vawlei i thlairawl vialte hna cu minung dihlak aa pehtlaihnak kong feh ternak a si. Lei le lo a ngeitu, thuan i thlaici a cingmi hna cu leikuang in a chuak mi thlairawl hna kha misifak hna, nuhmei hna, nu le pa ngeilo ngakṭah buangro hna, annih he a ummi mipem hna, an ram khat a simi hna he i ṭhencheu in ei cio dingah a forh hna.

Nannih cu facang nan zun tikah leikuang dihlak thiang tein na zun lai lo, nan zun dih hnu ah a liam mi thlairawl zong kha nan ruh lai lo, nan mitsur dum i mitsur thei hna nan lawh tikah dum kha thiang lak in nan lo hna lai lo, a ṭilmi mitsur thei zong kha nan char lai lo. Cu hna kha misifak hna le khual hna caah nan nganh piak hna lai (Lev. 19:9-10).