NUNNAK NGEI VIALTE PEHTLAIH FUNTOMNAK AH

NUNNAK NGEI VIALTE PEHTLAIH FUNTOMNAK AH NUNNAK NGEI PAKHAT CIO NIH AN PEKMI THAWNGṬ HA (CAWNAWK (LESSONS) HNA

Minung hna cu Pathian muihmel he aa loin sermi kan si, tiah biapi in chimrelnak cu thilnung vialte caah Pathian nih aa ruahchan mi tinhnak kha zeirel loin um awk a si lo. Zeibantuk thilnung saram hna hmanh manfawi mi thil an si lo. Van le Vawlei i hmuhkhawh mi thil vialte nih hin Pathian dawtnak kong, minung cungah a ngeihmi tahkhawh lo a dawtnak kong kha an thanh cio.

Fing le tlang, ti le vawlei dihlak cu Pathian dawtnak kha an langhter cio. Pathian he tlaihchannak hmuhmi tuanbia cu peng le hmun he pehtlaihnak a ngei i, cu peng le hmun hna cu pumpak caah abiapi ngaimi hmun an si. Kannih cu mah le nunnak caah ahleikhun a cangmi a rak chuahnak hmun hna kha kan cinken i, atu le atu tibantukin, cu peng le hmun hna kong kan ruah ṭhannak nih  ṭhathnemnak tampi a ngei.

Tlangcung umnak hmun ah  ṭhanliannak, cerhti putmi tiva pawngah  ṭhut i, cerhti kha din pengnak, innpawng hmunrawn i lente i celhnak, tiah hmuntonnak a rak ngeimi hna caah, cu hmun ah va len cu mah rak nun ningcang kha theih ṭhannak caan ṭha a pekmi a si kha kan hmuh.

Pathian cu mansung cauk pakhat kha a rak  ṭial. Cu cauk chung i aa telmi biafang hna cu van le vawlei i a ummi thilnung saram tampi hna an si. Canada ram in Bishop hna nih Pathian  ṭhawnnak huham an langhter mi ah zeibantuk thilnung saram hmanh, hnonhkhawh an silonak kong an rak hmuhsak.

Akau taktak mi khuacuanhnak thawkin ahme pacikte thilnung tiangin kokek vawlei cu minung caah khuaruahhar ngai thil an si. Kokek vawlei cu Pathian kong kha pehzulh tein (cat loin) a langhter mi a si. Japan ram i Bishop hna zong nih ruahawk ngai a simi konglam pakhat kha an hmuhsak ve. Thilnung saram hna cu annih a nungin an umnak kong, hla in an sakcio mi kha kan zohnak in Pathian kha dawt, ruahchan bochannak he nuamtein an umkho cio.

Sermi thilnung hna kong ruah ṭhannak cu thilnung pakhat cio thawngin kannih pek dingah Pathian nih a tinhmi cawnnak kha hmuh ṭhannak a si. Zumtu Khrihfa hna caah sermi thilnung hna kong hmuhsak ruah ṭhannak cu thawng ṭha pakhat ngaih bantukin, hngalh harmi biahalnak pakhat kong ngaih bantukin thlithupte a simi awthawng pakhat theih bantukin a si. Bible thiang chungah aa telmi Pathian nih biathlam a pek i, a chimmi konglam hna he hmunkhat ah chiah in, niceu a rak chuahnak le zan a sinak hna zongah Pathian  ṭhawnnak hmuhkhawh a si.

Hi bantuk langhternak hna kha ralring tein thlaichunh rian ṭuannak in kannih cu adang thilnung saram vialte he pehtlaiin a um kha hmuh a si. Vawlei pumpi kong chim tikah hin kanmah kong zong a chimmi a si ve. Vawlei pumpi hi a thiang, phunthiang mi a sinak kong soisel cekhlat in kan zoh ahcun kanmah kong kha tamdeuh in theih a si.

Van le vawlei cu adihlak in siseh, atamtuk mi pehtlaihnak hna in siseh, adih acar kho lomi Pathian i a tlin cikceknak kha an langhter. Maquino khua in Mithiang Thomas nih fimthiam tein a rak chimmi cu thilnung saram an tampinak le an phun aa khahlonak cu hmasabik a tuah a sertu i, tinhnak in a chuak i Pathian a  ṭhatnak kha thilnung saram phunkhat lawng nih tling cikcek in a langhter khawh lo caah, thilnung saram phunkhat nih tling tein a langhter khawh lomi Pathian  ṭhatnak kha adang thilnung saram phunkhat nih a betchih piak tawn.

Kannih cu thilnung saram hna an phun aa khah lonak kha, khat le khat pehtlaihnak phuntling he pehtlaih ter in kan kawl kan cawn ahau. Thilnung saram phunkhat cio konglam kan kawl tikah annih kha Pathian timhtuahmi (simanking) he pehtlaiin kan kawl lawngah thilnung saram pakhat cio i, sullam le abiapitnak kha  ṭha tein kan theihkhawh deuh lai.

Pathian bia cawnnak cauk ah a langhter ningin Pathian cu thilnung saram, khat le khat pehtlai tein hngatchan, bochannak kha timh in a sermi a si. Nika le thlapa, Sida thingkung nganpi le pangpar fate, Mupi le pithlung tiin relcawk lo saram phun le an ikhahlonak hna kha kan zoh kan kawlnak in zeibantuk thilnung saram hmanh, amah dang tein umkhawh a silo ti kha a langhter mi kan hmuh. Thilnung saram hna cu khat le khat pehtlaite bochan hngatchan in phunkhat a tlamtlin lonak kha adang saram phun hna nih an betchih piak i, khat le khat pehtlai tein an ibawmchan. (Pathian bia cawnnak ca ṭhen - 340)

Zeizong thilnung saram vialte cu Pathian a tlin cikceknak kha an cerh timi kan hmuh tikah kannih kan lungthin cu thilnung saram hna caah Bawipa a thang ṭhat i, saram hna he hmunkhatin Pathian biak duhnak thinlung thatho ngai in a hung chuak. Hi bantukin thinlung ah a chuakmi intuarnak cu Asissi khua in St. Francis nih a phuahmi hla ah rumra ngei ngai in a lang.

Maw...Bawipa Pathian, thilnung saram vialte he hmunkhatin abikin na nau Nika he hmunkhat in Bawipa kha thang ṭhatnak in pek ko hna seh.

- Ni cu aa dawh i a ceumi in na tlanter i, a thiangmi Pathian muisam kha a keng.

- Ka Bawipa ka Pathian, na far a simi thlapa le arfi hna nih Bawipa kha, in thang ṭhat ko hna seh. Bawipa cu Van kaupi ahkhin thlapa le arfi hna kha fiang tein na ser hna i, annih cu mansung an si, an idawh, an inuam.

- Ka Bawipa Pathian, na nau thli thawngin nangmah kha thang ṭhat si ko seh.

- Bawipa cu thilnung saram vialte hna kha thli in na nunter hna i, thli in van minmei hna le khuacaan phunphun kha na chuahter hna.

- Ka Bawipa Pathian, na farhniang a simi tiin nangmah kha thang ṭhat si ko seh. Ti cu san a tlai i, toidornak a ngei, a man a fak i, a thar in a thiang.

- Ka Bawipa Pathian, na nauhniang lumnak mei in nangmah cu thang ṭhat si ko seh. Bawipa cu mei in zan muihnak kha a ceuter i, mei cu aa dawh i, lente aa celhthiam, thazaang in a khat i a  ṭhawng.

Brazil ram in Bishop hna nih kokek vawlei cu Pathian kha an langhter bantukin kokek vawlei ah Pathian a umnak kha an hmuhsak. Pathian i, nunnak thaw a pemi Thiang Thlarau cu a nungmi saram hna cungah a um i, Bawipa he pehtlaih hawikomh dingin a kan sawm. Kokek vawlei ah Pathian kan tonnak cu kokek vawlei he pehtlai mi van ṭhatnak a si kan ti lai.

Hi konglam hna ruangah thilnung saram hna cu Pathian tlin cikceknak kha ngeih loin Pathian le thilnung saram hna cu tahkhawh lo dingin an ihlat ti kha philh awk a si lo. Cuti a silo ahcun kannih cu thilnung saram hna kha bawmhchanh loin annih an ngeih awk a tlakmi, a hmaanmi hmun kha fehter lo bantuk ah a cang lai. Kannih cu annih i a niammi nunnak ah kan caah a pekkhawh lomi thil kha an sin i pakpalawng halnak in donghter kan si cio lai.