Dai MNai Ling Tialmi Ca

CA`TIALTU I CHAMBAUNAK LE TINHMI
    Hmasabik ah hi Biahalnak le Bialehnak cauk te chuahkhawhnak nawl a ka petu Thumkomh Pathian kha ka thang`that. Catholic Bupi i hmasabik Pope a si i Jesuh Khrih nih a rak thim mi Peter nih mah le zumhnak kha dirkamh awkah a cawnpiak mi cu "Anmah i tlerhkhon nak kha `tih hlah u, lau hlah u, nan lungthin taktak in Bawipa Pathian cu `tihzah u, ruahchannak nan ngeih mi kong kha, ka chim tuah u, an ti mi hna an um ahcun, nemnak le hmaizahnak in chim khawhnak dingah timhcia tein um zungzal u; Khrih zultu nan si ruang i nan ziaza `tha a soi mi hna nih khan nan ziaza `tha an hmuh tikah anmahtu an ning a zak lai. Nan chia`tha thleidannak kha thiang tein um ter u", (1Pet 3:14-16) tiah kannih Catholic fale dihlak kha thazaang a kan pek. Cu bia cu amah pumpak hrimhrim nih a thih tiang a rak tuah khawh.
    Hi caukte ka chuahchannak bik cu Catholic Khrihfa pumpek pakhat cio nih kamkhat lei mi hna soisel (congoih)nak konglam hna kha Bible ningin mah le zumhnak kha dirkamh khawhnak caah le Bupi nih a tuahser mi, umtuning hna hi khoika in dah a rak i thawk. Zei konglam ruangah dah hi tuahning upadi hna hi kan zulh i kan tuah, tiin soisel congoih mi biahalnak hna kha Bible chung i Bible cang he zeitluk tiang dah aa tluk ti kha fiangfai tein theih i leh khawh dingah a biapi in kaa timh mi a si. Zeicah hitihin ka chim ti a si ahcun chantiluan hi nikhat hnu nikhat rangtukin a `hancho bangin sur bantuk aa tah mi zatlang pehtlaihnak "Mass Media" i khuhchilhnak cu a rangtuk hringhran. Bianaah "Facebook, Instagram, Messeger, Wechat and Viber" kha hmangin thawng dik lo hna kha AD (33) thawk tein nihin tiang sangtuk ral`thatuk in a rak dirmi, Jesuh Khrih nih a dirh mi Catholic kha a phunphun in an doh an congoih tikah, zumhnak a fek lo mi Catholic Khrihfa cheukhat thinlung an vairuanh ter tawn hna. Hi thil umtuning khamh awkah Catholic chungin a thei a hngalh mi hna nih a si khawh chung an leh khawh ve a hau. Tuchan ahcun thabat zaangba in khuate lei ah va kal i Pathian kong, Catholic kong a rak chim mi kan hmai i Catholic Khrihfa hna le mission a rak `uan mi Siangbawite ninglam he aa lo ti loin pehtlaihnak thilri hna hmang in an phaknak hmunin mission rian`uan khawh chan a si cang. Kan biaknak chungah a um cang mi Khrihfa hna zumhnak cu hi caukte an relnak thawng cun kamkhat lei in `hancho khawh a si ti ruahchannak he ka `tial mi a si. Kan hawi Khrihfa hna kha soisel sualphawtnak in ka `ial ka chuah mi a si hrimhrim lo i kan hawi Khrihfa hna lenglei hmuhnak in theih `tunglo an soiselnak hna kha a chung taktak in lehrulh `thannak a si. Ahleicei in Catholic Bupi i tuahning upadi vialte hi Bible chungta lawng an si; Bible hram bunh mi zumhnak tuahning upadi lawngte an si kha an theih i Catholic Bupi cungah zumhnak a hmun nakhnga ruahchan mi a si.
    Ca`tialtu (keimah) nih hi cauk chung i ka hman mi biafang hna he pehtlaih in nawl kan duh hna. Pakhatnak cu; Myanmar ram i Catholic Bupi kha a hruai i (CBCM) Bishop pawl nih timhtuah zohfelnak in an chuahmi Catholic Bible kha ka hman lo caah a si. Zeicah ka hman lo tiah cun atu ka chuah mi cauk hi Myanmar ram i a um mi kan hawi Khrihfa tamdeuh hna i Saya Judson nih a letmi Bible cauk pakhatte lawngin soisel dohnak hna kha fianter mi a si caah cu biahalnak hna he aa tlak dingin budang Bible cauk kha ka hmannak a si. Cucaah kan hawi Khrihfa pawl he biaknak lei biahalnak le bialehnak tuah tikah tlamtling dingin Myanmar ram i kan hawi Khrihfa pawl nih an hman zungzal mi Saya Judson nih a lehmi Myanmar Bible kha ka hmannak a si, tiah Catholic Khrihfa hna kha hngalhter kan duh hna. Aruang cu, upadi pakhat ah a konglam pakhat hi Bible chung i aa tel lawngah an cohlan kha hngalh a herh. Hawile hna caah Myanmar ram i Saya Judson nih a letmi biafang kha 'a si', 'i' ti tiangin an ciah (by heart) dih caah a si. Annih an hman mi Bible ka hman a si ahcun a tlamtling deuh bantuk a si. Ramleng Khrihfa hna ca zong a si ah, Myanmar ram i hawi Khrihfa hna caah "King James Version" timi "English Bible" lawng kha tam deuh nih an hman mi a si. Pahnihnak ah; "Kan Khrihfa hna" ti mi biafang hmannak kha a hrang deuh tiin a intuarh mi pawl caah kan nawl ko hna. Hi biafang hmanning ah Mirang nih cun "Protestant" tiah hman a si ko nain Myanmar ram mi dihlak thinlung ah a cam cang mi "Budang Khrihfa hna" ti mi biafang kha ka hmannak a si. Hi cauk cu kan hawi Khrihfa hna dihlak caah ka `ial hnawh chan mi cauk a si lo. Zeicahtiah hawi Khrihfa hna ahhin an cohlan ning aa khah cio lo caah a si.
    Catholic ca tu ahcun, "Catholic, Roman Catholic Mission (RCM), Roman Catholics (RC), Roman Catholic Church" timi

biafang hnakha ka hman ko. Biaknak kong biahalnak le bialehnak cauk a si caah, annih zong nih, "Nannih RC," tiin an chim an hman cio ve caah "nan nih budang pawl" tiin ka hman venak kha ka theihthiam piak uh tiah chim ka duh. Hi cauk cu Catholic pawl ca lawng siloin budang Khrihfa hna zong nih rel khawh a si ve i annih an rak soisel (congoih) tawn mi kha a hmaan maw? timi zong a tuaktanter dingmi cauk zong a si lai, tiah ruahchannak ka ngei. Ngaite cu annih leikap kha kannih Catholic pawl nih Bawi Khrih ah "Kan unau Khrihfa hna" tiah kan kawh hna nak  zong kha theihter ka duh. Khrihfa phun (2) a um. Catholic Khrihfa le a dang Khrihfa "Protestants" ti an si. Kan hawi budang Khrihfa hna lak ah zeizong te kha thleidan in a theihthiam i soisel congoih a hmang lo mi dawtmi unau Khrihfa hna kha soisel congoih in `ial mi caah  hmuh loin theih`ung hngalh `unglo in soisel a hmangmi hna kha leh`hannak caah ka `ial mi a si kha ka theihthiam piak u tiah nawl kan duh hna.
    Hi caukte kan relnak thawngin Catholic pawl zumhnak cu biaknak dang hna nih zeitlukin soisel hna hmanhsehlaw Jesuh Khrih nih a dirhmi zultu hna hrimhrim nih Jesuh cawnpiaknak ningin pehzulh an cawnpiak mi Catholic Bupi chungah kan um i Jesuh Khrih kan biak hi khamhnak caah zeitluk in dah zumtlak a si timi kan theih ahcun ca`ialtu i ruahchannak a tling lai i hi cauk chuahhnawh channak zong teinak a hmuh lai. Hi cauk a rel mi paoh nih a dik mi Bible i a hmaannak kha theih hngalh cio hram hna u; Catholic Khrihfa dihlak nan ngandam sehlaw Vancung ram ah mithiang Lamkaltu hna he hmunkhat tein zungzal nung Pa Pathian kha nan thang`hat khawh cio nakhnga, Pa, Fapa, Thiang Thlarau a min in, Amen.
            Holy Spirit Catholic Church
            Diocese of Owensboro
            Bowling Green, Kentucky State, USA
            Feastday of the Assumption of
            The Blessed Virgin Mary, 15th August 2019