Bro.Dai Mana Ling ( Biahalnak le Lehnak)

(21) Cu lioah, Bia 12:1-4 ah Lu pasarih le ke pahra a ngeimi Limkeng senpi a lang `han i Nau a hring dengmang mi nu hmaiah cun a fa kha a chuah cangka in ka ei lai, tiah a dir. Aphi caah (Ngakchia kha thah dingin khua a khangmi nawlngeitu Herod Siangpahrang kha i cinken uh. Jesuh thah a duh caah kumhnih tang ngakchia vialte kha a rak thah dih hna. (Mt 2:16-18)

(22) Bia 12:5 ah “Minu cu miphun vialte thirfung in a uktu ding fapa kha a hrin,” a ti mi kan hmuh. Cu fapa kong kha Lk 1:32-33 ah Vancung mi nih Nu Mary sin a chimh ahkhan, a sangbik Pathian Fapa cu Jacob tefa hna kha zungzal in a uk hna lai. A pennak cu zeitik hmanh ah a dong lai lo. Cu pa cu midang aho hmanh siloin Jesuh a si. Nu Mary fapa Jesuh lawng nih a kan khamhtu a si caah miphun vialte a uk tu ding cu Jesuh lawnglawng a si ko lo mei! Lk 2:21-29 ah Nu Mary le Josef nih ngak-chia (Jesuh) kha cuarpar tan ding in Biakinn lei an kalpi lioah Thlarau he a khatmi profet Simeon nih cun thluachuah a pek i, mi tampi nih an doh laimi a si i thah a in lai nak kong a chim; Mary hi a fapa nunnak caah kum sawmthum hlei zeitluk in a rak tuar ti kha ruahpiak ve uh. Lk 2:41-52 ah, “Jerusalem Biakinn ah kum 12 lawng a si rih mi ngakchia pa Jesuh a tantak caah nithum lamkal in an kir i an kawl`han nak kong, Jesuh an sinah Nazareth khua ahkhan a kir i a nu le pa kut tangah nawlngai tein a um nak kong kan hmuh. Hi thil vialte hi Nu Mary nih a thinlung ah aa cinken dih. Hi thil hi Khrihfa budang a chuah hlan kum (1500) hlei lio tein Mary nih thil vialte a rak hngalh dih cang. Nang tah na thei ve maw? Soisel awk a si lo tiah ka ruah.

(23) Bia 12:5 ah, “Minu nih cun a fa kha a lak zau i Pathian le a bawi `hutdan sinah a kalpi,”  a timi cu Nu Mary le Josef nih ngakchia cu Biakinn i Pathian sinah an pekchanhnak kha a si (Lk 2:23). Jesuh cu a thih hnuah Vancung a Pa sinah a kainak kha i cinken uh. Apa `hutdan orhlei kam ah a `hut kha thei usih. Stephen lungcheh in thah an zalh lioah amah nih, “Zohhmanh u, vancung aa hun i Pathian orhlei kam ah Mi Fapa a `hut kha ka hmuh (Lam 1:6-11, 7:56)” tiah a ti.

(24) Bia 12:6 ah “Minu cu Pathian nih a rak timhpiak mi hmun ah thetse ram ah khan a zam i khika ah ni (1260) an rak zohkhenh,” a tinak ahhin Herod Siangpahrang nih Naute thah, Pathian thah a duh caah pa ngakchia vialte a rak thah hna tikah vancung mi cu Josef mang ah a rak langh i zan`im pi ah Izipt ram lei an rak zamnak kha cinken awk a si (Mt 2:13-15). Nu Mary cu Izipt ram i aa thuhnak kong kha a chimmi a si.

(25) Bia 12:7-16 ah, “Vancung in raldoh nak a sungh caah vawlei ah thlak a si mi Limkeng nih fapa a hringtu minu kha thah awkah a dawi colh. Sihmanhsehlaw cu rul kut cun a luatnak kong, zohkhenhnak caan chung vialte cu hmun ahkhan Mupi thla an pek i an kuatnak kong, cu tikah Limkeng nih minu kha fenhseh tiah a kaa chungin tilian a chuahter nain vawlei nih minu cu a rak bawmh; a kaa kha a an i Limkeng kaa chung in a chuakmi tilian kha a rak dolh,” ti kan hmuh. Hika ahhin, “Herod nih zeitluk in ngakchia (Jesuh) kha Mary kut in chuh in thah i zuam hmanhsehlaw Izipt vawlei nih annih kha a rak khamh hna ti kha cinken awk a si. Izipt ram i caansau nawnte an um hnuah Herod a thih hnuah Israel ram a simi Galilee ram ah kir dingin vancung mi nih Josef mang ah a chim (Mt 2:16-23). Cu ram Nazareth khua ahkhan umhmun an khuar. Hika zawn ahhin, “Limkeng cu minu kha a dawi” a ti tikah Jesuh thah a duhmi Herod cu a thi cang nain a fapa Arkelau nih Jesuh chuahnak Judah ram, Bethlelem kha a uk`han caah vancung mi nih a mang in a chimh i Galilee ram Nazareth khua ah umthai dingin caan sining nih a pek ruangah siseh, cu bangin Herod fapa Arkelau nih a hrem`han hna nak ruangah siseh, Nu Mary cu a fapa caah lungrethei in a tuarnak kha a langhter (Mt 2:22)

(26) St. Paul nih (1Kor 15:22) ah “Adam he an i pehtlaihnak thawngin mi vialte cu an thih bantuk in Khrih he an i pehtlaihnak thawngin nunnak ah thawhter an si lai,” ti kan hmuh. Cuticun Adam ai ah Khrih a rak si i khamhnak kan hmuh ti kan theih ah cun hlan i sualnak a rak tuah sualtu Eve ai ah Khrih a chuah hlan tein amah a hring dingmi Nu Mary kha vawlei hramthawk tein a rak thim cang i Eve thar Nu Mary a si ko ti kha kan cohlan awk a si.