Biahalnak le lehnak (Apeh)

(27) A cung i Bia 12:17 ah, “Limkeng cu minu cungah khan a thin a hung ngai ngai i Pathian nawlbia a ngai i, Jesuh nih a phuanmi biatak, zumhawk tlak tein aa tlaih mi cu minu leikap a `angmi a tefa hna kha doh awkah aa thawh,” ti kan hmuh. Cu thil ah vancung mi sinin Pathian bia, Nawlbia kha a cohlang mi nu cu Mary a si ko. Lim-keng phun rul phun cu Nu Mary(nu) phun he siseh, minu phun a simi fapa Jesuh i a nu Mary he ral an si lai, tiah vawlei hramthawk in chiatserh nak a rak tuah cia mi hna a si.

Cuti a si ahcun Limkeng phun cu ahodah an si? Minu phun cu tah aho te dah an si? Zoh`han tuah usih. Kha Bible caang kan zoh ahcun Jesuh nu Mary phun a simi Catholic Khrihfa hna kha an duh hna lo caah nifate an serhsat an soisel i Mary a upat lomi, a hmaizah lomi budang Khrihfa hna cu “Limkeng chung an sinak kha vawlei hramthawk tein minu he ral an si lainak kong, Pathian chiatserh mi rul phun an si lainak kong a fiang i “Limkeng phun” tiah auhkhawh an si lai, tiah ka ruah. Biathlam i a lang mi minu hi Bible dihlak ah kan hmuh mi Mary a si lo ahcun ahodah a si kun lai? Seventh Day bu a dirhtu E.G White timi nu a si hnga maw? Aphi cu, cu ruangah Limkeng phun a simi budang Khrihfa hna nih Nu Mary le amah kha a cohlang mi Catholic Khrihfa hna kha an soisel i an thangchiat cio. Cucu ahodah a al kho lai?

A cunglei i ca`ial tu nih ka `ialmi hi a palh na ti ahcun Genesis in Biathlam tiang Bible in Nu Mary hi Jesuh nu a si lo caah upat hmaizah awk a herh lo, tiah nan ka fian ter khawh. Cu leng ah chim ka duh rih mi cheukhat cu Biathlam(12) chung i “Vancung i a langmi Minu” cu Nu Mary a si kho lo ti cohlang in a almi hna cu budang hna an si. Zeicahtiah cun annih nih Biathlam cu hmailei a cang dingmi thil lawng a si tiin Bible sullam an palh caah a si. Ca`ial tu nih cun ka cohlang lo. Zeicahtiah cun Bible hlun chung i profet hna nih an `ialmi “Chimchung bia” timi cu hmailei a cang dingmi thil kha an chimchung mi a si i “Biathlam” tu cu hlan i a cangmi le a si liomi le a si laimi thil vialte i theihkhawh lo, hngalhkhawh lomi thil vialte a langhternak a si, tiah ka ruah. Cucaah Biathlam(12) chung i Johan nih mi vialte a uktu dingmi fapa Jesuh chuahnak le a nu Mary i intuarnak kha hmuhpiak dingin a langhter. Ngaite tiah cun Jesuh chuah lioah hin Johan hi a kum a tling rih lo kho men. Khrih zultu hna lakah kumno bik a si tiah ruahmi a si. Asinain Thiang Thlarau aa phuannak thawngin a rak hngalh lomi fapa hringtu minu (Mary) i a intuarnak vialte kha vancung ah langhnak in a hmu`han mi a si caah Bible dihlak a donghnak Biathlam nih Herod Siangpahrang i mi thahnak in luat dingah Minu (Nu Mary) le Josef hruainak in Izipt ram an zamnak hna, Nazareth khua lei an kirnak hna kha muisam langhter in a `ial. Cucaah Biathlam (12) i minu cu Nu Mary dah ti lo aho nu hmanh an si khawhlonak kong a fekmi tehte a si.

Biatlang komh ah Genesis in Biathlam tiangah kan hmuhmi Bible caang hna cu Nu Mary kong a langhter mi Bible caang lawngte an si ko lo maw? Bible lawnglawng a timi paoh nih zeicah hi Bible caang hna hi i hmuhter loin kan um hnga? Catholic pawl nih Bible chung i aa telmi paoh kan zulh dih. Hi Bile caang hna kan nganhtak ahcun, Khamh ka si cang tiah zeitindah kan ti ngam lai. Kan chimngam ahcun ningzak a si. Khamhnak tuanbia cu Pathian vancung mi le Nu Mary biakamnak thawngin hram a domhmi a si. Khrihfa taktak a simi nih cun a alkho lai lo. Nu Mary kha biak awk caah a si lo. Asinain zei biaknak paoh nih Biaknak a dirhtu i a nu kha an upat cio. A dirhtu hrimhrim zong kha an upat, an hmaizah. Vawlei cung minung vialte zong nih hringtu nu kha an upat cio. Asinain hawi Khrihfa hna nih an biakmi Jesuh Khrih kha ka zumh, khamh ka si, tiah an ti, an aupi i amah hringtu Bawinu Mary tu cu an soisel i an al mi cu ningzah awk ngaingai a si. 

Khrihfa a si lomi, biaknak a biami hna hmaiah ningzak a si. Khrihfa hna hi mah tihin maw an si, an kan ti lai. Fapa lawng a daw i a nu kha a hlawmi an kan ti ko lai. Myanmar ram i kan duhdawt, kan upatmi Daw Aung San Su Kyi kha “Kan nu/ ka nu” tiah kan auh ahcun zeicah sualnak in a kan luatter tu pa i a nu kha “Kan nu/ ka nu” tiah auh ngam loin kan um lai.
Biathlam nih Minu pakhat a timi hi na nu, ka nu, minthang lemcang hna, ram rian`uan hna an si lo. Jesuh Khrih nu Bawinu Mary, Bible nih roca a `ialmi a si. Bawinu(r,fawmf)ti cu Siang-pahrang chungkhar nih “Ka nu” caah hmanmi Bile ah Jesuh nu kha Bawinu Mary tiah a hmanmi kan hmuh lai. A sullam cu Jesuh nu ti kha a si. Bible cathar cahmai pakhatnak ah “Jacob fapa cu Josef a si, Josef cu Mary va a si, Mary cu Messiah timi Jesuh nu kha si” (Mt 1:16) a timi hmuhkhawh a si. Catholic Khrihfa hna nih a cunglei i Bible hna ruangah Nu Mary kan biakmi siloin kan bochan i kan upat. Cucaah thluachuah kan hmuh. Catholic Khrihfa nih Pathian sinah dairek zong in thla kan cam i Nu Mary bawmh hal in Pathian sinah kan cam fawn. Ka fapa/nu thanghra camipuai awnnak dingah tiah Pastor pawl kha hleice in thla a camter mi nih Nu Mary in Jesuh sinah thlacam a almi cu a hmaan na ti lai maw? Pastor le Bawinu Mary ahodah a sang(`hawng) deuh hnga? Hawi Khrihfa hna i ‘Pastor pa/nu’ kong khoika Bible ahdah a um? 

Catholic pawl nih Mary kong an chim ahcun a bikin Bawinu Mary kong lawng an chim i Jesuh kong an chim ahcun Jesuh Khrih kong lawng `ha tein an chim. Nu Mary puai ah Nu Mary kha an cawisan i an thang`hat. Khrih caah Bawipa Thisa changreu, nunnak changreu kha an biak. Lenglei sawhsawh in soisel hlah. Hawi Khrihfa hna bantuk in ka zumh ahcun khamh ka si tinak menmen a si lo. Zeizongte kha amah le a caan ningin a zulh, a tuahmi Bu cu RC a si. Bawinu Mary upatnak cu Jesuh Khrih kha hngalh chin chin uh. Nawlbia a simi “Nan nu le nan pa kha upa hna u, cuti nan tuah ahcun, Bawipa, nan Pathian nih an pekmi hna ram ah saupi nan um lai” (Exo 20:12) a timi Bible zulh nak thawngin zungzal nunnak, zungzal vancung ram phak awkah Khrih i nu, kan nu Bupi Khrihfa hna i Thlarau lei Nu, Bawinu Mary kha toidor tein upat cio uh! Khuaruahhar a simi cu Bawinu Mary kha hawi Khrihfa pawl nih zeitluk in hua hmanh hna seh, Mary cu Genesis in Biathlam tiang Bible zapi ah aa telnak kha a lang. Pathian nih a thimmi a si ti a fiang ko. Aho nih an soisel zongah cu bantuk Thluachuah he a khat mi nu (Nu Mary) a upat a hmaizah mi Catholic Khrihfa hna cu thluachuak mi an si cio. Pathian vel kha, a thei lo nih lanhtak, a thei mi nih phut in ei” an ti bangin a thei mi lawng nih an tinco.

A donghnak ah Catholic Bupi cu Bible kha a zulhtuk caah Bible chung i athian nih a thimmi hna cu, atu lio minung hna nak in Pathian naihniam deuhmi an si tiin toidornak lungthin he Thum-komh Pathian sinah dairek thla an cam i thluachuah an hmuh bangin kha bantuk Bible chung i Abraham thawkin Lamkaltu hna, Jesuh Khrih i a nu Bawinu Mary le atu lio mithiang hna sin in thlacam nak kha tuah a si. Cu mithiang hna(Saints) Pathian sin tlangtlak thlacam piaknak thawngin vel kha tling tein hmuh a si cang. Vawlei cung i a nungmi Pastor hna nak in mithiang hna(Saints) cu an thi ko cang nain Pathian nih nawl a pek hna caah Pathian hmai ah an kan halpiak tiah zumh a si. Hihi Catholic Bupi i duhnung nunphung  pakhat a si. 

Pa le Fapa le Thiang Thlarau cungah sunparnak um ko seh! Amen