Pathian Dawtning 95 Theses

Zuk hlah, Bet hlah
73.     Pathian bia le hla cu zuk khawh asilo i bet khawh zong asilo. Bia in, Pa chan, Fapa chan i cawnpiaknak lawng an chim i Bupi pakhat chung lawngah khamhnak a um timi Thiang Thlarau chan i Pathian cawnpiaknak a zuktu le  Thiang Thlarau chan cawnpaiknak lonh in Fapa chan i Bupi a biapi lo timi bia a chaptu hna cu vanram an co lai lo i Pathian nih a dantatnak a bet hna lai (cf; Bia. 22:18-19).
Bia. 22:18-19    “..hi bia ah ahohmanh nih biadang a chap ahcun, hi cauk chungah aa `tial mi hremnak  kha a dantatnak ah Pathian nih a chap lai. Cun hi cauk chung i aa `tial mi prophet bia kha zeihmanh a hlaw mi cu hi cauk chungah aa `tial mi nunak thingkung theitlai a co hnga ding; le khua Thiang chung i um ve nak a co hnga ding cu Pathian nih a lak piak lai.”

Vanmi hmanh nih chiat a serh hna
74.    Lamkaltu hna cawnpiaknak  Thawng`tha a si mi, Thiang Thlarau chanah bu `thennak tuah hlah u ti mi cu, kaltak riangmang in khoika bu poh ah Jesuh a um, bu a biapi lo tiin thawng`tha dang a chim mi  hna cu vawlei mi lawng si lo in vancung mi hmanh nih hell ah tla seh tiah nolh`than hmanh in chiat a serh hna lai (cf; Gal. 1:6-9).
Gal. 1:6-9     “...Ka khuaruah nan har. ..  a ngaite ti ahcun thawng`tha dang a um lo....nan rak cohlan cang mi thawng`tha he aa dang mi thawng`tha an chimtu hna paoh cu hell ah tla ko seh..”

Thlarau pum a kuai mi pawl 
75.    Kan Bawipa Jesuh Khrih an thahlio ah a rawk lo mi pahnih long an um.  Cucu, a ruh an kiah lo mi le hliah ngei lo a angki an si (cf; Jn. 19:22-24); `thitnak ngei lo puan zual an thleh lonak cu Jesuh a zummi vialte Bupi pakhat chung ah an um lai ti hmelchunhnak asi. Jesuh he pumkhat sinak changreu ei duhlo in a zammi Judas Iskariat cu Jesuh angki pi kha thleh a duh caah amah pum tu kha a tlek, a kuai i a chungril vialte a pawt dih.  Rome ralkap misual pawl hmanh nih an thleh ngamlo mi Jesuh angki kha a tlektu bu `then`thek pawl an thlarau cu an pum a kuai i an chungril zong a pawt dih cang.
Jn. 19:23-24    “ralkap pawl nih cun Jesuh kha vailamtung ah an khenh chih ...Cun a angki hliah ngei lo in tah mi a si... ‘Hihi cu thlek hlah u sih, cawmcawhfung in zuk usih’, an ti.”
Lam.1:18     “Judas nih thil `thalo a tuahnak tangka in lo pakhat a cawk i cuka lo ahcun aa awk i a thi, a pum a khuai i a chungril a pawt dih.”