Nang le Kei Hawikomhnak

(I-Thou) Keimah le nangmah hawikomhnak cu (I-It) “Keimah le thil pehtlaihnak” he aa dang. Keimah le thil pehtlaihnak ah keimah cu a sannak in i uahnak lungthin he midang kha ka zoh tawn. Midang kha thil pakhat bantuk ah ka chiah. Hi hawikomhnak ah aakhat tein chiahnak, upatnak, man ngeih ah chiahnak, zawnruahnak a umlo. Keimah le adang minung cu thinlung ah aa hlattuk hringhran. Tlangcung tlangtang pehtlaihnak asi ko. Keimah le thil pehtlaihnak cu  a haakmi hawikomhnak, minung kha minung ah hmuhlo mi hawikomhnak, biatak ngeilo pehtlaihnak, midang kha mah pum bantuk dawtkhawh lomi hawikomhnak asi ko. Hi pehtlaihnak ruangah ningcang lonak hna, huatnak hna, lunghrinhnak hna a chuahter i tehte asimi hna huham kha a thurhnawmter i Pathian hmai kha ummaang neh asi te lai.
    Sihmanhsehlaw, “Kei le Nang” (I-Thou) hawikomhnak kha kan thim ahcun pumpek kan ngamh lai. Kan i pekchanh lai. Kan ral a`tha lai. St. Paul nih a rak i thimmi hawikomhnak phun a si ko.
    Kei le Nang (I-Thou relationship) hawikomhnak in midang kha kan komh ahcun nangmah le nangmah (aho ka si) tiah kawl in na hmuhkhawh bantukin a danglo Pathian zong kha kawl in na hmuh khawh lai, tiah (Gabrael Marcel) nih a rak ti. <sup>1</sup>
    “Keimah le nangmah hawikomhnak” thawngin kei cu midang kha adik ahmaan tein, dinfel tein ka tuah ka komh, Keimah i a dikmi nunnak cu midang kha upat hmaizah tein hawikomhnak ah tanglo aa hngatmi asi, tiah tuaktannak a rak ngei. <sup>2</sup>
    “Martin Buber bantukin Gabrael Marcel zong nih” minung chungkhat asimi hna i hmailei ruahchannak cu “Nangmah le keimah hawikomhnak” cung lawnglawng ah aa hngatmi asi, tiah a rak ti.<sup>3</sup>
    “Keimah le Nangmah” hawikomhnak thawngin pakhat kha pakhat dinfel tein, upat tein, daw tein, manngei tein, aatluk mi rian dot he hawikomhnak thawngin huatnak, `thihphaihnak, lehrulhnak le raltuknak hna kha kan hrial khawh lai.
    Cu hawikomhnak cu kannih hna he aa naihniam mi dihlak kha mah pum bantukin dawtnak ngeih i hawikomhnak tu kha asi (cf. Mt. 22:39).  Nangmah kha midang nih tuah hnaseh tiah na duhning in tuah ter na duh bantukin nangmah zong nih midang cungah na tuah lai timi (Mt. 7:12) Bible bia bangin hawikomhnak zong asi i “Nangmah na duhlo mi thil kha midang cungah va tuah hlah” tiah (Tobiah 4:16) ah ralrin peknak bia bangin fahnak intuarh i midang kha mah pum bantukin zawnruah (zaangfah) i hawikomh awk an si. Minung pakhat le pakhat cubantuk lungthin he khat le khat pehtlai tein kan komh hna si cun “a daimi hawikomh nunnak” kha kan serkhawh te lai.
    (I-Thou) “Keimah le Nangmah” hawikomhnak cu adikmi hawikomh pehthlaihnak, khrihfa taktak asimi hawikomhnak, biaknak zulh phungning, a dot sang hawikomhnak bak a si. Midang kha mah pum bantukin dawtnak bak asi ko.
    End Notes:
1. Anthony E. Giles
    The evolution of philosophy
    Alba House, New York 1987, P. 244
2. Ibid P. 244
3. Francis, J. Lescope
    Existentialism, With or Without God
    Alba House, New York, 1974, P. 13