AATLAK LOTUK IN HAWIKOMHNAK

VAWLEI INNCHUNGKHAR MUISAM NUNNAK NGEI VIALTE PEHTLAIHNAK.

Vawleicung i sermi thilnung saram vialte hna cu a ngeitu umlo mi thil an si lo. Nunnak ngei saram hna kha a dawtu Maw ... Bawipa Pathian, annih cu Bawipa nih na ngeihmi hna an si (Wisdom 11:26). Hi konglam cu van le vawlei a cheuchum asimi kannih kha pakhatte lawng a simi Pa, Pathian thawngin sawm kan si i, thilnung saram vialte hna cu hmuhkhawh lomi ṭemnak hri in an pehtlaih cio i, an dihlak funtom in vawlei innchungkhar bantuk an si.

Hika zawn ah chimh kan duhrih mi cu Pathian cu kannih kha pawngkam vawlei he naihniam in a kan fonhter caah a ṭhami hmun hna, non hna kha thetserawn ah canternak kha takpum cung i a chuak mi ngaichiat awktlak zawtnak pakhat siter nak in siseh, thilnung saram hna an cimihnak kha ngaihchiat awk asimi zohchia ngai sinak in siseh thinlung chungah intuar cio awk a si.

MINUNG KHAT LE KHAT KARLAK AATLAK LOTUK IN HAWIKOMHNAK

Hiti ka chimnak cu thilnung saram vialte kha aa khatte in chiahnak asilo. Minung hna zong saram hna lakah annih ahleice hmun zong kha thilnung saram hna cungah an ngeih dingmi ṭuanvo hna zong alnak asilo.

Hiti chimnak cu vawleipi kha biakawk asimi Pathian sinak in thangṭhat i, cu cungah rianṭuan rawleinak le cu i a rawhfawinak ningcang kha zohkhenh khamh kilvennak kha khapnak zong asi fawn lo. Hibantuk ruahnak hna cu itluk lonak kha a chuahter i, a kan zuamcawhtu thil umtu ningcang hmaan le i hlaatnak lei ah a kan phakter te lai.

Caankhatkhat cu thilnung saram hna lakah minung thiannak kha al in minung vialte aatluk tein cohlan mi ṭhawnnak huham kha khamh dingah an tlolh i, adang saram hna khamhnak cungah lungtho tein rianṭuannak ah aa tuaitam mi hna zong kan hmuh hna. Ngaite tiahcun adang thilnung saram cungah ṭuanvo tlolh in tuahsernak caah lungretheihnak ngeih ahau. Asinain kannih cu minung lakah kan hmuhmi itluk ruanglonak, aatlak lo tukin hawikomhnak hna, cheukhat hna nih midang nakin biapi deuh kan si tiah ruat in rianṭuannak hna cohlannak hna kha lungretheih thinphan deuh awk an si.

Cheukhat hna cu sifah harsat ruangah achia ngaimi umtu ningcang, minung tluklo sining ah chuahnak awngka umloin an pil i, acheu phukhat hna cu an ngeihmi thilri chawva chiahnak hmanh umlo tiangin an rum i, ruamkai ngaiin mi cungah um duhnak kha man ngeilo an langhter, hlonhmi thilri tampi kha an tantak i, hmunkip ah hibantuk thilsi ningcang hi a chuah ahcun hlonhmi thilri hna hmanh nihhin vawlei hi a rawhter te lai.

Kuttongh sinak in cheukhat minung hna cu mah le mah kha sangpi ah an i ruat i, midang kha minung ah chiah loin, annih kha ahleice tinvo lami minung ah i ruah in khuasaknak kha zeirel loin kan um.

Kan thinlung chungah duhtlai nunnemnak, zaangfah zawnruah thiamnak, nunnak khat minung hna cungah zaangfah zawnruahnak hna a umlo ahcun kannih vawlei thilnung saram vialte he funtom in kan um tiah an chimmi cu zumhawktlak asi hrimhrim lai lo.

            Ci lohtlau awk ral a tong liomi aharmi thilnung saram hna chaw lehthalnak kha a doh i, minung zuarthlainak, sifak harsa mi hna cungah zeirel lonak, aherh lo minung tiah ruahmi hna hrawh rianṭuannak hna cungah hmurcipnak hna cu papeknak a hrelh i, chimmi le tuahmi aakhahlonak hna an si. Hibantuk tuahsernak cu kokek pawngkam harnak piahtana caah ral atuk lio mi hna rian kha zorternak a si.

St. Francis i thilnung saram hna kha sernak caah Pathian a thangṭhatnak hla ah tonsual in hitin a ti. ‘Maw...Bawipa Pathian, na dawtnak kha hmuhsak in nunnak khat minung hna karlak ah pakhat le pakhat ngaihthiam mi hna le minung phu hna chungin harnak buainak hna kha fianter dingah lungsau thinfual in nunnak a pekchanh i rianṭuanmi hna thawngin Bawipa kha kan in thangṭhat cio’.

Kannih cu kan thinlung kha kan hun i vawleicung dihlak he pehtlai mi, thilnung saram hna i pehtlaih funtom in an umnak kha kan cohlan tikah zeithil hmanh kha kan hnong hna lo i, zeizong vialte kha unau ṭafar bantuk ah kan ruah i an dihlak he kan i fonh, kan komh te hna lai.

Kan vawleicung i nunning khat ser a ingmi thilnung saram hna cungah mah he pehtlai lo bantukin umnak, serhsatnak hna cu kannih he umnak khat minung hna hawikomhnak hmunchung zongah a rak chawnh khawh. Minung hna ahhin lungthin pakhatte lawng a um. Saṭil hna cungah kan ngeihmi serhsatnak thinlung cu minung khat le khat komhnak zongah a chuak kho ve.

Thilnung saram hna cungah chiahmi serhsatnak cu minung huham he a ralchanh. Saram hna zei ah a rel lomi cu mah pum aa dawthiam mi ka si a tikho lai lo. Daihnak, ningcangnak, saram hna zohkhenh khamthiamnak hna cu achung taktak in aa pehtlaimi tlangtar an si. Cu hna kha ṭhen in chiahnak, adangte hlathlainak hna cu kannih kha asung a kan pemi phu chungah a kan phakter.

Thilnung saram vialte hna cu khat le khat pehtlaihnak an ngei dih. Kannih minung hna zong Pathian nih thilnung hna cungah a ngeihmi duhdawtnak zuunhri in hmunkhat ah a kan ṭem i, unau ṭafar bantukin Pathian sin aa thawn thluahmah mi Pathian biak khualtlawng kan si i, kannih kan u a simi Turizah Nika, kan far Sanda Thlapa, kan nau Tiva hna he kan nu Vawlei sinak ah a kan funtom.