BIAK TONPUMHNAK

VOI (16) NAK CATHOLIC BISHOP PAWL I BIAK TON PUMHNAK- ṬHENKHATNAK

                         POPE FRANCIS I HUNNAK CHIMHRINNAK

Ka u le ka nau hna;

            Pope St. John (6) nih “nitlaklei vawlei ah biaknak cawnpiaknak chungah hmunkhat ah kal in kar kan hlaan ṭi lai, timi thinlung put phun a tlau cuahmah cang,” tiah a rak chimmi kha ka vun i theih ṭhan. Hi ruangah pei amah nih Bishop pawl i Biak tonpumhnak kha timhlamh in tuah dingah rianṭuantu komiti kha a rak ser piak. Cu phu i timhlamhnak he Biak tonpumhnak tampi kha tinhnak aphunphun chiah in an rak tuah.

            Sihmansehlaw, hmunkhat tein kaarhlan mi khrihfabu (Bupi) sinak in sullam phuannak ah chambaunak hna a um rih. Keimah pumpak nih hibantuk Biak tonpumhnak ah chungṭuan (secretary) sinak in ṭuanvo ka rak lak lio ah methlak (pek) in biakhiah dingah ka rak  timhtuah lio ah tonpumhnak i aphunphun chungṭuan asimi Cardinal nih “zeidah na tuh?” tiah a ka hal tikah, “Thaizing me pekding caah ka timhtuah lio” tiah ka leh. Kei zong nih, “Hihi cu an dihlak aa tel ding mi tonpumhnak asi lo mei,” tiah ka vun al ṭhan tikah,” aherh lo, aherh lo, hikong he pehtlaihin methlak in bia kan khiah lai lo,” tiah a ka leh ṭhan. Zeicah tiah cun, kanmah pumpak hrimhrim nih hi tonpumhnak ah kan dihlak zalongtein mah i ruahdap mi kha phuannak nawl kan ngei timi kha fiangtein kan rak thei lo. Cuti cu kum (60) chungah Biak tonpumhnak i lamthluan cu duhsah tein a vun tling deuh cang i atu ahcun, hmunkhattein kaarhlan ṭimi khrihfa bu (bupi) nih Biak tonpumhnak cu kan tuah ko cang.

            Hihi fawitein a rak cangmi asi lo. Bishop dihlak nih hibantuk tuahding kha a caan a cu cang tikha hngalh dih asi cang caah hi tinhnak he Biak tonpumhnak kha kan tuahmi asi. Keimah nih ka chimduh mi cu Biak tonpumhnak timi cu hlutdaw (Parliament) auhmi asilo. Naihniam mi ikhawmh in atu kan ton lio mi poipang (piahtana) hna kha fainter remhchunh dingah, mah zumhnak ruahnak chimding ah kan tuah mi asi lo. Tonpumhnak hruaitu cu Thiang Thlarau asi. Kannih kha ceunak a kan pek i lam a kan hruaitu Thlarau Pathian cu kannih sin ah, Kan laifang ah a um ahcun hi tonpumhnak cu aṭhami tonpumhnak asilai. Cuti siloin mah pumpak ruahdapnak le zumhnak kongkau lawnglawng kha biapi ah chiah in kan chim cio ahcun, cucu Biak tonpumhnak siti loin hlutdaw tuah bantuk lawng he aa lawh lai.

            Biaknak i zulhding mi lam ah Thiang Thlarau Pathian cu biapibik cawlcangtu asi. Thiang Thlarau Pathian i veel laksawng kan hmuh lawng ah minung hna nih khamhnak an co khawh lai. Pentecost puaini ah Thiang Thlarau Pathian nih zeizongte kha pungsan pakhatte siding in a rak tuahmi siloin Pakhat le pakhat ilawh lo kan i thleidaannak in khat le khat hnatlaknak ngeih ding lawnglawng a rak kan tuah piak mi asi.

Hi Biak tonpumhnak adih tikah ṭhencheunak umbak loin, adihlak lungnget tein (lungrual tein) kan rak khiahmi asi, tiah thanhca a rak chuak ahcun Thiang Thlarau Pathian telpi mi, Biak tonphumhnak asi ti lailo. Thiang Thlarau Pathian cu aakhat aalawh lomi thil hna kha aatlak tein siding in fonhpiak ding ah a kan tuahpiaktu asi. Khrihfabu (bupi) kha kilven zohkhenhtu Bawi zong cu Thiang Thlarau Pathian lawnglawng asi. Kannih cu Thiang Thlarau Pathian i awthawng phunphun hna kha ngaihthiam dingin kan cawn ding asi.

            Khrihfa bu (bupi) kha a rak kan hrinpiaktu zong Thiang Thlarau Pathian ṭhimaṭhiam asi. Thiang Thlarau Pathian kha ngaih a chiattertu cu santlailo biachimnak kha asi. Hi tuahtawn keel zia cu kannih karlak ah ihruh chih mi zia hmanh ah a can cang. Cuhe pehtlaihin Bible thiang chungah, “khamhnak hmuh lai dingmi ni caah nanmah kha min an ṭhutpiaktu Pathian i Thiang Thlarau kha a ngaihchiatter hlah u”, (Efesa 4: 30) tiah ralring a kan pek. Mipakhat hnulei in congoih thangchiatnak hruh bia chimmi nakin hi Bishop chimmi, hi Sister chimmi, hi mipa chim mi na cohlanglo asi ahcun amah hmai bakah zapitheih tein chim ko. Khi bantuk caah Biak tonpumhnak kan tuah mi cu asi. Cucaah Thiang Thlarau Pathian kha ngaihchiat lungkuai in tuah cio lo ding kha hleikhun in cah kan duh hna.

            Ngaih a thiammi cawnnak ṭha nan ngeih cio ding zongah forh chap kan duh hna. A chimtu simi nakin a ngaitu si kha biapi deuh ah chiah dingin Thiang Thlarau Pathian nih a kan forhfial tikha mi tampi nih an theih dingah Media hna zong nih kan tuahpiak ulaw nan kan bawmh cio nak hnga nawl kan duh hna.

            Bawipa Jesuh khrih thihnak a rak innak  cawn ningapi ah Lamkaltu ngan hna cu a hohmanh holhlo in daitein an rak um bantukin kannih zong dai zirziar tein, pakhat le pakhat ingaihpiak ding kan izuam hna lai. Hi konglam cu abiapibik zong asi. Nannih izuam in nan rianṭuannak cung zong ah hleice lawmhnak bia chim ka duh. Nan dihlak cungah lunglawmhnak tampi ka ngei.

Translated by                                                                                      

Francis Aung Min Naung 

                                                                                         Hakhahloh Alettu,

                                                                                       Nobert Caling

                                                                                      Hakha Diocese

                                                                                        9 Oct 2023 (Mon)