Kokek Pawngkam

Vawlei kha zohkhen tuah

Vawlei kha hringter u sih

67. Kannih cu Pathian kan si lo. Kan hmai i Vawlei pumpi hi Pathian nih kan kut chungah a kan pekmi thil a si. Genesis ah a langhter mi, minung kha Vawlei uk dingah ṭuanvo a pek tiah a langhter i Khrihfa hna khuaruahnak ah minung cu Pathian pekmi ṭuanvo kha biapi ah chiah i ṭuanvo lak zohkhenh awk nakin, minung kha tlaihkhip ukte ngei lo, kokek pawngkam hrawh dihnak kha tha an peknak kong, minung hna kha a hram tawntu, minung nunning in a hrawh thiamtu hna sinak in zuksuai pachi cahnah nganpi cungah suaimi pungsan in a langhter tiin Bible kha sullam an hrilhfiah cio. Bupi theihnak ningin kan chim ahcun hibantuk Bible thiang sullam an lakmi cu hman mi thil a si lo.

            Khrihfa mi hna cu a caan canah Bible thiang sullam kha palhngai in an lak sual mi tampi a um nain, tuchan ahcun kannih cu Pathian muisam kengin sermi thilnung kan si i Vawlei pumpi ukding ah ṭuanvo a kan pek caah, thilnung vialte cungah tang lo in aana pekmi pungsan in chim i a sullam chimnak hna cu hlonh bak ding a si.

            Bible caang kan rel tikah a dang Bible caang he pehtlaihter in a sullam leh ding a si i, a sullam leh ning he pehtlaih mi zulhphung hna kha zulh in sullam leh hrilhfiah ding an si. Vawleicung huap he pehtlaih mi dum nganpi kha thuan in cinthlak zokheh dingah (Gen. 2:15) tiah a langhternak cu zeidah a chim i a sullam chim duh timi kan hngalh a hau lai. Lei thuannak tiah a langhter tikah, Vawlei kha leithuannak, cinthlaknak lei rian ṭuannak hna kha a timh mi a si i, zohkhenh kilvennak tiah a ti tik ah ralring tein zohnak, zohkhenh khamnak, tlangtlak lam hmuhsak le rawh lo ding pehzulh in zohkhenak hna aa tel.

            Hi konglam cu minung le kokek pawngkam karlak pehtlaihnak le pehzulh tein ṭuanvo ngeihnak kha a langhter mi a si. Vawlei pumpi i minung phu hna cu Vawlei nih tling cikcek in a rummi Vawlei chungchuak thilri hna in mah le nunnak cio caah a herh mi paoh hmankhawh a si nain annih cu Vawlei pumpi ah an zohkhenh kilveng in thlairawl tamlak pi chuahternak in hmailei chan cipeh hna eiawk le nunnak caah aamah khaannak zong kha chiah dingin ṭuanvo an ngei. Vawlei pumpi hi Pathian ukmi (ngeihmi) thil a si (Psalm. 24:1). Vawlei pumpi le a chung um thil zeizongte hna cu Pathian ta (ukmi) lawngte an si dih (Deut. 10:14).

            Cucaah minung hna cu Vawlei kha tanglo in nawl a ngeihnak, mi nih an chimmi vialte kha an hlonh. Vawleipi cu keimah, Pathian nih ka ngeihmi thil a si i nan thih tiang in nan i zuarh kho lo. Nannih cu khual le mipem hna nan si i, vawlei pumpi keimah he hmunkhat in a um kal timi khual tlawng lamli lawngte nan si (Lev. 25:23).

 

68. Pathian sermi Vawlei pumpi cungah minung kha a pekmi ṭuanvo ningin hngalh theihnak a pekmi minung hna cu kokek vawlei he pehtlaimi upadi hna le Vawlei cung um thilnung saram hna karlak i a ummi cuaithlainak lei aa tluknak kha upat in zulh a hau. Zeicahtiah cun Pathian nih nawl a pek tibakah hi thil vialte cu ser an si. Bawipa cu hi thil saram vialte kha zungzal hmun dingin a ser a tuah mi a si. Bawipa cu annih an ramri kha ri a khiah piak hna i zeitik hmanh ah a lohtlau kho lomi upadi kha a pek (Psalm. 148:5-6).

            Bible thiang ah a langhter mi kokek zulphung upadi hna cu minung khat le khat karlak pehtlaihnak lawng siloin, minung le thilnung saram dihlak karlak ah a hmun ding mi pehtlaihnak cung ah hram a bunh mi a si. Nang cu na unau nih a neih mi rang siseh, caw sihnaseh, lamkam i a ril ko mi hna na hmuh siahcun a herh mi bomhnak pek ding ah na thawh awk a si ko. Nang cu thingkung pakhat cung ah siseh, vawlei ah siseh, va fate hna siseh, a ti tlumh lio mi a nu vapi kha tlaih awk a si lai lo (Deut. 22: 4,6).

            Hi Bible caang hna he hmunkhat in zarhkhat ah nikhat, a ni sarihnak ni ah i dinhnak ni hna cu minung hna ca lawng siloin, nan fial mi rang hna, caw hna zong dinh ter (Exo. 23: 4,6) ve an hau. Bible thiang nih a cawnpiaknak ah minung cu a dang thilnung saram hna kha zeirel lo bakin, aana ngeitu bantuk a tuah mi, minung ṭhathnemnak lawng a langfang ah a chiah mi zumhnak hna caah hmun a um hrimhrim lo.

 

Add new comment

7 + 11 =