MINUNG I A DANGTE UMKHAWHNAK (POPE FRANCIS)

MINUNG I A DANGTE UMKHAWHNAK

Minung hna cu pakhat hnu pakhat aa thleng i, a rak chuahnak kong kan cohlan hmanh ah pakhat hnu pakhat zumhnak thlennak nih a fianter khawh lomi pumpak pakhat cio he pehtlaimi a dangte umnak kha nawl a ngei. Mikip cu pumpak hleikhunnak kha kan ngeihcio i, midang hna he siseh, Pathian he siseh, tlaihchan tein ikomh in umkhawhnak kha ngeih a si.

            Kannih cu hngalhthiamnak thluak kan ngeih caah khuaruah tuaktan in kan chimkhawh i, biaalnak hna zong kan tuahkhawh, ruah in thilthar chuahter rianṭuannak a cangmi thil hna cungah sullam fianternak, zuk pachi suainak le adang relcawklo thil tikhawhnak hna ngeihnak cu Physics le Zoology ram kha lonh in adangte umkhawhnak kha a langhter. Vawlei i thilri chawva, thilnung, saram hna a lai ah hngalhnak thluak a ngeimi minung hna an rak chuah hi khuaruahhar a si i, cucu Pathian nih dairek in a sernak le a nungmi in umnak, mah pumpak he tlaihchan le daw tein hawikomhnak hna caah Pathian nih a kan sawmpeng ti a fiang.

            Bible thiang chungah a langhter mi sernak konglam cu minung hi thilri chawva dot ah ṭhumhkhawh a silo mi thilnung hna an sinak kong langhter i, ruahcio dingah a kan sawm.

Sihmanhsehlaw, a nungmi adang thilnung hna zong minung nih duhpaoh uknak tangah a ummi thil an si tiah kan ruah ahcun a palh lai. Kokek vawlei kha minung caah amiak laknak, hman awk menmen an si tiah ruahnak cu minung phu caah achia ngaimi ahnu pehzulh a chuahter.

            Thazaang angan lawng ahmaan tiah tiin, nawlngeihnak thazaang kha thangṭhatnak ningcang hna cu aherh lomi ahnu pehzulh a simi, minung pakhat le pakhat aa khah lonak, dinfel lonak, minung tam uak kha a ralchanh i, ṭhihphaih rianṭuannak hna kha a chuahter i, vawlei chungchuak thilri hna cu teitu vialte nih an ngeih lai an ti bangin, hmasabik a phanmi thazaang a ṭhawngmi kut ah a phan kho.

            Hi ningcang he aa ralchanh bakmi ningcang cu Bawipa Jesuh nih a biatung a rak dirhmi, minung pakhat le pakhat daw tein ikomh in umnak, ningcangte sinak, unau ṭafar thinlung ngeihnak tiah zohchunh awktlak hna an si. Miphun dang (Lawkih mi) hna siangpahrang cu rammi hna cungah aana hmangzau in siseh, uktu bawi hna cu an kuttang mi hna cungah aana in an hrem tawnmi kha siseh, nannih nih nan hngalh. Nannih tu nih cun, cuticun siter nan duh awk a si lai lo, nannih lak i pakhat nih ngan a duh ahcun nan sin-um a siawk a si (Mt. 20:25-26).

Van le Vawlei dihlak a ṭhangcho i, sangbik dot phanhkhawhnak hmuitinh (Kawltung) cu Pathian i, tling cikcek a sinak dot kha a si. Cu tlin cikceknak cu Bawipa Jesuh Khrih thihnak in a thawhṭhannak ah khan a ṭuanchuah i a tlingcang mi a si.

            Hika zawn ah thilnung saram dang hna cungah minung nih hremnak, ṭuanvo tlolh in ukchihnak hna kha hlawt awk, adang, i allen awk a simi konglam pakhat kha an hmuh cio. Thilnung saram vialte kha a ser tikah tinhnak kawltung kha minung hna cungah kan hmu kho lo. Thilnung saram vialte cu kannih he hmunkhat in, kannih thawngin Pathian timi aa khat i, i hrawmmi kawltung lei ah kalcio a si. Mi nih banhkhawh lomi tlin le rumnak ah a thoṭhan mi Jesuh Khrih cu zeizongte kha kutpharh in a don hna i tleu ngaiin a ceuter.

            Theihthiamnak le dawtnak kha a pekmi minung hna cu Bawipa Jesuh a tlin cikceknak in lemsoi a ing i, thilnung saram vialte sertu sinah hruai in kalpi dingah sawmnak kan in cu a si.