“Amen”

Bible bia bantukin zumhnak bia cu Hebru holh “Amen”in a dong. Mah biafang nih Biakam Thar chungah thlacamnak kha a donghter lengmang. Bupi zong nih thlacamnak kha “Amen” in a donghter ve.
“Amen” cu zumhnak he a biahram aa khat. A biahram a duhnak cu a taktak sinak, bochantlak sinak, zumhtlak sinak hi a si. Cucaah “Amen” nih Pathian kan mah cungah zumhtlak a sinak le Amah kan i bochannak kha a langhter.
Profet Isaiah cauk ah “Biatak Pathian” ti mi bia kha kan hmuh. (A ning tein leh mi cu “Amen Pathian” ti a si). Cucu Pathian cu a biakamnak cungah zumhtlak a si, tinak a si. “Amah tein ram chungah thluachuah aa pe mi cu, “Biatak (Amen) Pathian nih thluachuah a pek lai”(Is. 65:16). Kan Bawipa zong nih a cawnpiak mi kha hmual ngei seh, ti a duh tikah “Amen” timi biafang kha a hman. (Cf. Matt 6:2-5, 16; Jn 5:19)
Cuticun zumhnak bia hmanungbik biafang “Amen” nih “Ka zumh” ti mi biafang kha a fehter.
Jesuh Khrih hrimhrim hi “Amen” a si (Rev 3:14). Amah cu Pa Pathian a kan dawtnak “Amen” a si. Amah Pa Pathian sinah kan “Amen” kha a kai pi i a tlinter. Zeicatiah Pathian biakamnak vialte cu Amah chungah an “Ee” kha an hmuh dih. Cucaah kan nih nih Amah thawngin “Amen” kha Pathian sunparnak ah kan chim(2Cor 1:20).

“Amah thawngin, Amah he, Amah chungah
Zeizong tuah kho Pa Pathian
Thiang Thlarau kawmhnak chungah
Sunparnak le upatnak vialte cu
Nangmah ta an si;
A zungzal dong hin lo in…Amen”