ADVENTU – HNGAH CAAN RIMHMUI

Photo Credit

 

A sangbik khamhtu bawi nih thinlung niamter a hrinnak kha kan hngah cio.

Zeitin muisam in dah kan hngah lai? Mt;3:2 kan zoh ahcun; “Vancung pennak a nai cang caah nan sualnak kha mertak cang hna u,”…a lam kha rak sialpiak u…a ti. Cucaah Advantu (hngah can) chungah sual ngaihchih in timhtuah a si cio caah cica muici hna in kan i khuh kha na cinken ṭheu lai…

A fawi bikin kan fainter sicun Christmas hlan zarhli chung kha Advantu-hngah can tiah khiah a si. Cutisi ahcun hngah caan a langhter mi thil hna he kan theihter hna lai.

  1. A hringmi thingṭeng, thinghnah hna le Pangpar tel lo mi thinghnah kualte… Nitlak lei ram ahcun farthingṭeng tete hna in an tuah. A hring pengmi thinghnah kualte kan ti lai cu: - A hring muici timi cu, daihnak le ruahchannak a langhter mi a si ti kha chim hau ti lo tiah ka ruah. Thinghnah kual a pum mi cu; a fawinak in kan chim ahcun a fiangbik Crown (Siangpahrang lukhinh) pungsan, hlanchan Siangpahrang hna nih crown an i khinh caah Daihnak a ra phortu ding Siangpahrang kha a sawhter duh. Cuti a pummi (circle) te kha a dang khoika ah dah kan hmuh khawh? - Ṭhit-umhnak puai ah a si lo mei? - Ahram le donghnak um lo dawtnak le dinfelnak, cuti sicun thinghnah kualte na hmuh le cangka Pathian nih minung cungah a chiah mi dongh ngei lo dawtnak le minung leikap in pekchan dingmi biakamnak kha philh lo ding a si.
  2.  

Cheukhat Pangpar kual ah phazawngdan pali a cheu khat panga an telh hna. A laifang i a dirmi panganak phazawngdan cu Jesuh Khrih ai awhtu a si. Adventu-hngahcaan zarhli caah zarh kip Vanmi phazawngdan pali a si. Zarh thumnak i vanmi phazawngdan chim lo in cun a tangmi phazawngdan pathum cu cica muici lawngte an si kha mu…

  • Zarhkhatnak i van mi phazawngdan kha profet phazawngdan tiah an auh. Bawipa Jesuh Khrih a chuak lai ti kha hmasabik ah profet hna nih Bible hlun chan chungah hmelchunhnak an rak chimchung cio cang. Cucaah miphun vialte nih chimchung bia bangin kan hngahhlang cionak a si cuh! Hngahhlang (ruahchannak) phazawngdan ti zong in auh a si.
  • Pahnihnak phazawngdan kha Bethlehem phazawngdan tiah an ti. Khamhtu Pathian nih David khua hmete a si mi Bethlehem khua ah a rak hrin caah a si cuh! Jerusalem in 8km tluk a hlatnak hi khua hmete ahhin Bawipa Jesuh cu a rak hrin. Cu chanlio ahNu Mary le Joseph cu milu relnak caah Nazaret khua in thabat zaangba in an rak ra an ti…

Cheukhat nihcun Bawipa Jesuh cu minung hna kha Vawlei muihnak chung in lam hmuhsak phawrh piaktu ding a si caah khullam phazawngdan tiah chuankhan in an auh ve.

  • Pathumnak phazawngdan tu cu hleice te sandaang muici a si. Lunglawmhnak a langhter mi a si i Tuukhal phazawngdan tiah zong in an ti. Hmasabik khamhtu a va biak mi hna culeikuang i Tuu a cawng lio mi, sifak Tuukhal hna a si. Pathian nih a caan caan ahcun teinak hmuh i minthang mi hna nak in thinlung dawh le thinlung thiang a ngeimihna tu kha a thim hmasa tawn hna timi cawnnak a si…
  • Ahnubik phazawngdan cu lamkaltu Vancung mi phazawngdan ti a si. Cut ikan ti tikah Tuukhal hna kha “Vawlei lawmtuah, Bawipa a ra”…ti mi hlaremh sak in thawng a rak thanhtu Vancung mi tete hna kha naa theihṭhan ko hna lai. Hmasabik “Gliria” hla kha hlaremh an rak sak cionak cu a luan ci akum (2000) lonh ah a si cang.

Khah! Cuti sicun khamhtu a hrinlai ni ‘Christmas’ puai kha ṭha tein kan don khawh cionak dingah Adventu-hngahcaan rimhmui tein i tom cio hna usih law…

 

Adventu rimhmui, New New Nandar (s+v)

Alettu; Nobert Caling (OSC)

                                          

Add new comment

2 + 0 =