ADVENTU TI MI CU

 

Adventu (hngahcaan) timi cu Pathian cu kan thinlung chungah aa tlak tein a run luh khawh nakhnga caah thlarau lei he pehtlaih in a hlei khun timhtuahnak caan a si.

ADVENTU PANGPAR KUAL SULLAM

Adventu (hngahcaan) chungah a pummi muisam Pangpar kual an tuah i phazawngdan pali, Cheukhat nih pa 5 an van. Pangpar kual I pangpar caah thingṭeng le thinghnah hring (tamdeuh nih farhnah) an hman. A kual a pummi sullam cu: Pathian cu hramngei lo donghnak zong a ngei lo, tinak a langhter. Thinghnah hring cu hringdildel in a nungmi tinak a si. Phazawngdan pali sullam cu kum 4000 aiawhtu an si. Chim duhmi cu Adam, Eve thawkin Jesuh Khrih a chuah tiangah kum (4000) a rau. Phazawngdan pakhat cio in van a si.

Pakhatnak Phazawngdan sullam.

Prophecy candle (Profet phazawngdan) tiah an ti. A sullam cu Hope timi ruahchannak kha a aiawh. Profet pawl nih Bawipa a rat lainak kha a  changchang tein an chim cio hnu ah an i ruahchan ningin thawngṭha bia hna kha kutchanh in an rak chimhchin. Profet phazawngdan he pehtlailh in (Isaiah; 7:14) ah Bawipa nih hmelchunhnak a pek lai mi cu “Ngaknu pakhat a um i fapa a hrin lai,” timi thawngṭha kha a rak pek.

Pahnihnak Phazawngdan sullam.

Pahnihnak phazawngdan cu Bethlehem phazawngdan tiah an auh. Cu nih “Dawtnak” kha a aiawh. Zulh tawnmi phumlam ningin Jesuh Khrih i Bethlehem caw rawl einak kuang a aiawh mi a si an ti. (Luka; 2:12) ah, “Nan ca i hmeichunhnak cu ngakchiate pakhat kha puan in an zual i caw rawl einak kuangchung i an thlim kha nan va hmuh lai,” tiah a timi kan hmuh.

Pathumnak Phazawngdan sullam.

Pathumnak phazawngdan cu Shepherd Candle (Tuukhal phazawngdan) tiah an ti. Joy timi lunglawmhnak a aiawh mi a si. A sullam cu Bawipa Jesuh a hrin hnu hmasa bik thawngpang ṭha a theitu Tuukhal hna kha Vanbawi Gabriel nih (Luka; 2:8-11) ah Bawipa Jesuh chuahnak kong langhternak philhlonak canah Tuukhal phazawngdan tiah an auhnak a si.

Palinak Phazawngdan sullam.

A hnu bik phazawngdan cu Angel Candle (Vanmi Vanmithiang hna phazawngdan) tiah auh a si. Hi phazawngdan nih ‘Daihnak’ kha a aiawh. Hi phazawngdan he pehtlaih in Bawipa Jesuh a chuah hnu ah Van mithiang hna an ra i conglawmhnak hla an rak sak piak. “ Asangbik Van ah khin Pathian cu sunparnak hmu ko seh, Cun a dawtmi hna umnak Vawlei ah hin remnak (daihnak) um ko seh” (Luka; 2:13-14) tiah a chimnak kha a si.

Adventu caan chungah hin mah le mah pumpak pakhat cio kha kan i remh cio hna lai. A rauh hlan i a ra dingmi Bawhte Jesuh kha kan thinlungah hrin le a chuah khawhnak hnga aa tlak dingin timhlamh nak ngei cio hna usih!

 

Ṭhenhnihnak

  • Adventu (hngahcaan) biafang cu Greek biafang ‘parosia’ in Latin biafang Adventu (hngahcaan) ah an leh mi a si i Bawipa Jesuh Khrih voihnihnak a ratṭhannak ti sullam a si.
  • Adventu (hngahcaan) kha kum fatein Adventu caan chung luh ni thawk in Dec.24 zan, Jesuh Khrih a chuah hlan caan tiang a si. (2020) kum caah cun Nov. 29, zarhkhatnak Adventu zarhpi ni in a thawk i Dec. 24 zan, Bawipa Jesuh a chuah hlan caan tiang a si.
  • Adventu (hngahcaan) kha tinhmi pahnih in tuah a si. Cu hna cu Bawipa Jesuh a hrinnak kha timhtuah in hngahnak le a voihnihnak a ratṭhannak kha timhtuah in donnak a si.
  • Hngahcaan (Adventu) ah pangpar kual cungah cica muici phazawngdan pali van a si. Cica muici sullam cu sual ngaihchihnak, sumnak le sualnak hrialnak a si.
  • Pakhatnak phazawngdan cu ruahchannak sullam a si. Kannih cu a ra dingmi khamtu Jesuh kha ruahchannak khat cikcek he timhtuah ruahchannak sullam a si.
  • Pahnihnak phazawngdan cu khamtu kha aa tlaktein don khawhnak caah timhtuahnak sullam a si.
  • Pathumnak phazawngdan cu lunglawmhnak hmelchunhnak a si. Jesuh Khrih a chuah lainak thawng kha Van ralkap bu hna nih lunglawm thanuam tein an um bantukin Vawlei mi hna zong nih mi khamhtu Jesuh a rat lainak a nai cang caah lunglawm thanuam in kan umnak sullam a si.
  • Palinak phazawngdan cu; ‘Daihnak’ i hmelchunhnak a si. Vanmi nih mi khamhtu thawngṭha kha an rak phorh. Pathian nih Vawlei mi kha a Fapa pek sian tiang in a dawtnak kha a langhter mi a si.
  • Adventu (hngahcaan) cu Christmas a thiang a sannak kha Khrihfa hna sin ah a phuannak a si. Carol hlasaknak cu a sunglawi tuk bantukin thinlung chungah a ra taktak mi Jesuh Khrih kha thianghlim tein don khawhnak caah timhlamhnak zong a biapi tuk mi a sinak kha a langhter.

Cheukhat nih hngahcaan (Adventu) phazawngdan panga an hman. A rangmi panganak phazawngdan kha pangpar kual a laifang ah an tun i Jesuh Khrih aiawh mi a si, an ti. An vang lo. Adventu Pangpar kual cu Dec.24 zan (or) 25 ni Jesuh Khrih a chuah lai tikah lakṭhan a si.

Add new comment

15 + 5 =