Bupi pakhat te lawngLawng

Photo Credit

(Efesa 4 : 4 - 6)

            Jesuh Khrih nih a dirhmi Bupi ser atlaaknak ah a biapi bik cu zeidah a si? Hi biahalnak hi minung (10) hei hal usilaw a lehnak (10)nak tam kan hmuh men lai, tiah ka zumh.

            Evangelist Sayapa pa kha kan hal ahcun mikip sinah thawngtha phuan awk caah Khamhnak thawngtha chim a herh a ti lai. Khrihfa zumhnak kha biapi in a chimmi pa zong nih Khrihfa pakhat cu a zumhnak kha tha tein i fianh a hau a ti ve lai, tiah ka ruah. Minung nunnak caah a bikin a tuan duhtu caah cun Bupi cu vawlei cungah ningcang tein um khawhnak ding caah tuan a herh tiah a ti lai.

            Cu ve bangin Khrih bupi hna cu pumkhat silo in aa then, aa dannak cu Pathian duhning a si lo, cu caah Khrihfabu hna cu pumkhat si awk a biapi tiah kan ti lai.

            A cunglei i tuahding hna hi an biapi cio ko. Asinain cu riantuannak ah pumpak in ai tel mi Bu hna nih lungthinkhat pumkhat sinak a um khawh lo ruangah cu rian cu mah lawng um mi ah a canter.

            Bu hna cu Khrih sermi bu an si i pakhat te lawng a si nak kha mithiang Paul nih Efesa 4 : 4 - 6 ah a phuan. Cutin a phuannak ah a tanglei hna hi hram a bunh.

            (1) Bupi cu Pathian pakhat lawng kha a zumh. Bupi cu hmunkhat te a si mi Pathian lawng kha a zumh. Bupi chungah a um mi kannih vialte zong hi Pa Pathian pakhat lawngin fanu fapa hna kan si. Kannih vialte cu chungkhar pakhat kan si hna. Khrih a zummi paoh nih cun chungkhat ah an lut cio. Pa nih a fanu /pa hna kha a kan dawt. Amah cu chungkhar thawngin hi vawlei ah rian a tuan. A fanu/pa hna herhbaunak zong a zoh, a ngiat zungzal.

            (2) Bupi cu Bawi pakhat lawng kha a biak. Bupi nih Bawi pakhat lawng a um tiah a hramthawk tein a thanh. Kannih cu, cu Bawi pakhat te kha aa rinh mi kan si. "Cu Bawi leng in Khamhkhotu dang an um lo" tiah kan au pi. Kannih cu thilri bantuk in cu Bawi cu kan ngeih si lo in Bawi Jesuh bantuk in a nung hnga dingtu kan si.

            (3) Bupi cu pakhat lawng a si. Khrihfa hna cu pumkhat kan si. Butengnge(phu) pakhat chungah aa tel mi kan si lo (chungtel kan si lo). Khrihbu i pumcheu kan si. Kan pum chungah hin cell(thihri) thong tampi in a sem bantuk in Bu cu Khrih cell (thihri) in sakmi a si. Cell hna a fah ahcun pum dihlak a fah bantuk in Khrih pumcheu a fah ahcun a dihlak in a fak ve. Cuti a sinak cu pum a sinak thilthup a si. Bu timi cu inn tinak a si lo. Kannih vialte kan i komhnak kha Bupi tiah ti a si.

            (4) Bupi nih tipil innak pakhat lawng kha a cohlan. Khrih kha Khamhtu ah a cohlanmi poah nih zumhnak hmel chunhnak caah tipil an in. Cu tipil innak cu nunnak hlun kha phoih i nunnak thar i hruk nak zong a si. Tipil kan innak thawngin Khrihfa vialte chungkhar pakhat kan si. Lungthin khat te in a kan nun ter. Aho nih, zeitindah tipilnak apek timi kha a biapi si ti lo in, Khrihfa vialte zumhnak ah pumkhat a sinak kha tette a si.

            (5) Bupi nih Thlarau pakhat a cohlan. Khrih kha Khamhtu ah a zum mi paoh cungah Thiang Thlarau a tum. Cucaah annih pakhat le pakhat pehtlaihnak an ngei. Thiang Thlarau pakhat lam hmuhsak nak in pumkhat an si. Cu thlarau thawngin Bupi cu a nung. Khrihfa hna cu Thlarau pakhat lawng kha an ngeih caah i hawikomhnak (fellowship tuahnak) cu a thangchin lengmang ko lai.

            (6) Bupi ah zumhnak pakhat lawng a um. Bupi nih zumhnak pakhat lawng a cohlan. Khrihfa paoh cu Jesuh Khrih zumhnak ah khan an zumhnak hram an bunh cio. Jesuh Khrih hrimhrim nih, 'Keimah leiah a tang lo mi (aatel lo mi) cu ka ral an si," tiah a ti. Kannih nih zumhnak pakhat te kha kan i zamh cio. Khrihfa paoh cu vailam tung hmaiah kan zapi kan i khat cio.

            (7) Bupi cu ruahchannak pakhat te lawng a ngei. Khrihfa nih biakmi Jesuh Khrih cu ruahchannak pakhat te kha Khrihfa hna sinah a pek. Vailamcung thihnak a innak thawngin, thihnak teitu a sinak kong, cucaah amah a zummi paoh nih thi hmanh hna sehlaw thawh`han a si lainak kong kha kan i ruahchan cio mi a si.

            Khrihfa hna cu hi vawlei cungah Jesuh he a nungmi kan si. Nihin ah Bu timi hi a herh bikmi thil a si. Cu thil cu khamhnak thawngtha a chimmi nak in a biapi deuh kho. Cat lo in thlacam mi nak zong in a biapi deuh kho men.

            Cuthil cu Bu vialte lungthin khat pumkhat sinak in vawlei mi hmaiah nun thiam awk, pumkhat si awk le pakhat le pakhat i hawikomh awk a si. zeicah kan ti ahcun cu bangin Bu hna nih kan tuah khawh a si ahcun leicung mi vialte nih Jesuh Khrih kha kan cohlan khawh lai caah a si. 

Add new comment

9 + 6 =