Catholic Bupi nih milem a bia maw?

Catholic Bupi le milem
Pathian nih Nawlbia pahra chung i a pakhatnak ah pathian dang nan bia lai lo tiah Exodus 20:3-6 ah fiang tein a ttial ko nain Catholic hna nih milem, zukttuh sinttuh nan biak, nawlbia he a ralchanmi a si lo maw tiah bia halnak a tam pah. Hi ti a chimmi hna hi Catholic zumhnak le tuahsernak hngalhset ttung lo in a leng zohnak men in a ruat palhmi hna an si.
Hi kongah a bik in duhdawtnak, tangdor toidor upatnak le biaknak timi hi fiangfai deuh in ruah le tuktonh an thiam deuh lo ruangah a si. Catholic bupi cu tangdor upatnak, thlacam halnak le pekchanh bolthawinak tiah a thleidang thiam nain butthen (protestants) Khrihfa a cheu hna nih cun a cunglei kong hi an thleidang thiam lo i Catholic zumhnak le tuahsernak kha huaha loin a ceihphai tawnnak a si deuh.
Angaite tiah cun upat peknak le biakchawnhnak cu aa dangmi a si ko. A biana ah Kawlram mi nunphung dawh ah mino hna nih upa le tar deuh hna kha an hmaikaa i an luhchuah tikah an lu kun buin an luhchuah tawn phung a si i lu an kun piakmi hna kha an biakmi si hngin loin upatnak, tangdor khunchuknak an pekmi hna tu a rak si deuh. Cu hlei ah ram le miphun kip nih alan (flag) kan ngei cio i cu alan hmai ah cun kan lu kan kun piak cio.
A taktak le angai ngai te tiah cun alan, flag cu kan biak tinak si loin alan kha ram le miphun ai awh in upat hmaizah kan pekmi a si ti kha zapi nih hngalh dih khawh cio mi a si. Cu bantuk in Catholic hna zong nih khamhtu Jesu Khrih, a nu a simi Bawinu Mary, mithiangmi hna le vancungmi hna i an muisam an zuk an suaimi hna kha upatnak le hmaizahnak kan pekmi a si i zukttuh sinttuk, hmanthlak, zuk suaimi milem hna hi kan pathian a si tiah kan biakmi hna a si hrimhrim lo ti kha kan thleidan le kan thiehthiam awk a si.
Khrih vailamtah zuk le hmanthlak kan zohnak thawng in Khrih nih zeitluk tiang in dah a kan dawt ti kha lungthin tak tein ruah pah buin tuaktaan le ruahthiam khawhnak caah a si. A ngaite tiah cun kan nu Bupi nih hi thil hna hi rak tuah le ram fimhlawm le rak zohkhenh in rak kilkawm hlahsehlaw Khrih muihmai muidam le huham hi zeidah a lawh hnga tiah ruahdamh le tuaktaan khawh a rak si naisai hnga lo. A tu chan tu ah cun Catholic Bupi tuaktaan khuaruah thiamnak thawngin Bawi Jesu Khrih i umtu muisam mit hmai cuanpian ning kha a thlaam in kan theih hngalh khawh hlei ah Khrih muisam le hmanthlak zukttuh hna zong kan inn cio le kan biak inn hna zong ah hmai hngal uanthlaar ngai in kan i taar cio, kan i chiah cio tawn.
A tuaktaan a thiammi hna nih cun an nu an pa le a unau chungkhat hawikom hna i an hmanthlak kha ttha tein in an ken hlawm an fimhlawm dih hna va si kaw, Catholic Bupi zong nih Jesu Khrih le a nu Mary, mithiang hna le vancungmi hna cu duhdawtnak, tlaihchannak le upat peknak kan ngeih hna. Cu nak hlei in biakchawnhnak bolthawi cu kan tuah hna lo ti kha thleidan le theih fian a herh. Zukttuh sinttuh, hmanthlak suaimi milem hna hi hi vawlei ah a um lo mi hna kan umter chawmmi bantuk an si caah a nungmi Pathian pakhat lawng kha biak taktak ding a si ti kha Catholic Bupi nih a theih fian tukmi a si ko tiah 1Cor 8:4 chungah fiang tein kan hmuh.
Hi nak in fianter deuh chin ding caah zukttuh sinttuh, milem tiah Biakam Hlun chung i aa ttialmi a duh lo chanmi cu baal pathian kha a si i a um zong a um lo mi ruahnak in a zuk an suaimi le an tuah ttawn chawmmi a si caah a fih tuk le a huat tuknak a si. Sihmanhsehlaw, Jesu Khrih le a nu Bawinu Mary, lamkaltu mithiang hna le vancung hi cu minung nih an mit hrim hrim in an rak hmuhmi hna le hi vawlei ah a rak tlawngleng balmi an si ko caah an mah he aa lo mi hmanthlak suaimi an lem (an milem) cu an mah philh lo nak, an mah hngalh camcin ding i tahchunhnak, a tu chan holh in cun an hmanthlak cuancam ti deuh a si.
Khrih le a nu Bawinu Mary muithlaam cuang, hmanthlak suaimi zukttuh suaimi thil hna cu minung lei in an min auhnak tlamtling deuh in kan ngeih khawh lo caah a si. A um zong a um bal lomi a hmuh zong hmuh bal lomi baal pathian zukttuh milem he cun pehtlaih ter khawh a si lo.