St.Padre Pio

St.Padre Pio

September 23

Mithiang Padre Pio

            Padre Pio cu Italian siangbawi pakhat a si. Amah cu biaknak lei ah aa zuam ning le a thianhlim nak hna siseh, kan Bawipa Jesuh Khrih i Vailamcung an khenh chih lio i a putmi hma hna kha a tak cungah an lang fawn. Cu konglam he pehtlai in tuni tiang ah fiangfai tein an chim bal hna lo.

            Padre Pio cu Italy ram Pietrelcina khua ah May 25, 1887 kumah a rak chuak. A hngakchiat lioah a min cu Francesco Forgione ti a rak si. A pa le a nu cu lothlo an si. Amah cu u pakhat le farle pathum a ngeih hna. A chuah `i hna lakah, bawhte an si lioah a thimi pahnih zong an um rih. A rak hngak chiat lio tein biaknak lei ah aa zuam ngaingai i kum 5 a rak si lio tein Pathian caah ka nunnak ka pek lai tiah a rak chim lengmang tawn. Cuhlei ah a nu le a pa zong biaknak lei ah aa zuam ngaingai mi an rak si ruangah a caah ah zumhnak lei in `hawnnak thazang tampi a rak hmu. A chungkhar hna cu zingchiarte Missa thawinak ah an kal lengmang tawn. Fracisco cu an umnak khua Biakinn, Missa thawinak ah Siangbawipa a bawmtu (alter boy) zong a si. Francisco cu mah le mah temhinnak a tuah lengmang i nikhat cu zan a ih ah lung in sermi `uang cungah a ih caah a nu nih a rak sik tawn.

            Francisco a umnak khuami hna zong a mah caah thazang an um ngai. Mithiang mi hna puai a um paoh ah an khua ningin puai an tuah tawn hna. A rak hngakchiat lio hrimhrim in Francisco cu phundang ngai in thil ti khawhnak a ngeimi a rak si. Vancungmi hna a hmuh khawh hna hleiah kan Bawipa Jesuh Khrih le kan Bawinu Mary he zong aa rak i chawn kho mi a si. Hi kong he pehtlai in a hohmanh nih chimh le cawnpiaknak zong a um fawn lo. A ruahnak ahcun midang hna zong nih amah bantukin an hmuh khawh cio ko hna rua ti tu in a rak ruah.

            Francisco te chungkhar cu biaknak lei ah an i zuam tuk ko nain sifak harsa ngai in a rak nungmi chungkhar an rak si. Cu ruangah rian`uan cu a herh ngaimi a rak si. Kum saupi anmah  nih an ngeih mi tuu tlawmpalte kha a rak cong zungzal tawn. Cu ruangah sianginn `ha tein a kai khawh lo ruangah amah he aa `hi mi a hawile hna he tahchunh ah cun an hnu ah a rak um peng tawn.

            Francisco cu a dam lo ngaimi zong a si. Kum 6 a rak si ah pawpi le rilphin zawtnak a rak ngei. Kum 10 a si ah rilphin zawtnak (typhoid) in a rak zaw. Kum 3 chung Sianginn a kai hnu ah 1897 kumah a nu le a pa sinah (friar) pakhat si ka duh tiin a rak chimh hna. A nu le a pa nih an khua pawng um monk hna sinah an va kal i Francisco an sinah um khawh a si le si lo an rak hlat piak. A kum a no hleiah ca tamdeuh cawn a hau an rak ti i an rak sianh lo.

Add new comment

4 + 0 =