CHANGREU CHEUNAK AH

Annih nih Khrih kha changreu cheunak ah an hngalh. Khrih cu a zultu hna he a tlongleng i bia an i ruah i an ei an ding tti; atu ah anmah he aa chawk tti i annih nih an hngal lo. Khrih cu kum tampi Israel mi hna he a um tti, annih cu Bible thiang a hngal mi le a luat hmanh in a zah dih mi an si, sihmanhsehlaw annih nih an hngal lo. Phungbia cawnpiaktu hna nih Khrih kong profet nih an chim mi bia vialte an hngalh dih, sihmanhsehlaw profet bia hna a vun tlin tikah cun annih nih amah kha an hngal lo. Zeicadah a si hnga? Zeicatiah Khrih cu changreu cheunak thawng lawng in hngalh khawh ding a rak si caah a si.

Changreu a vun cheu tikah an mit cu a hung fim i annih nih amah kha an hngalh. Khrih nih changreu a cheu: cheunak cu Pathian duhnak tuah awkah nawlngaihnak thawngin a in mi nautatnak a si ti-in theihthiam a si. Mahle mah kha i ruah lo, asiloah i niamter kha a si. Khrih he changreu cheu cu kan caah, zultu hna bangin, Khrih a nawlbia kha ngaihnak thawngin tangdor nunnak in kanmah tein kan i niamter mi a si. Hi bantuk in kan mit cu a vun au lai i amah le a cawnpiak mi kha kan hngalh lai.

Missa raithawinak  chungah tlangbawi nih changreu kha cheuthum ah a cheunak zawn a um; mah nih khan changreu cheunak le Khrihfa vialte hna an duhnak kha i alnak in Pathian duhnak kha Khrih he changreu cheu awkah sawmnak kha a sawh.

Balaam nih Pathian bia kha a theih hna i zeizong tuah kho Pathian kong langhnak kha a hmuh hna. Cu bang cun Israel mi hna zong thetse ram (ramcar) chungah Pathian sinin khuaruahharnak hna kha an hmuh. Sihmanhsehlaw annih cu Pathian le a nawlbia kong kha hngalh loin an um rih ko. Zei caah? Zeicatiah annih nih changreu cheunak thawngin amah kha an hngalh lo caah a si. Pathian le Khrih cu changreu cheunak thawng lawng in hngalh khawh an si.

Cu bantuk cun tuchan zongah a si ve: Khrih le a cawnpiaknak hna cu cauk thawngin, cawnpiaknak le ceihmainak in hngalh khawh a si lo; ramchung le ramdang i theology sianginn le seminary sianginn (siangbawi cannak cawnnak sianginn) thawng hmanh in hngalh khawh a si lo. Kannih nih Khrih cu changreu cheunak lawnglawng in hngalh khawh a si. A ngaite ahcun Bible a cawng mi tampi, asiloah Cathedral le biakinn dangdang ah a cawnpiak mi le phung a chim mi tampi nih zeidah kan chim ti kha an hngal lo; annih nih Khrih kha carelnak le hlathlainak lawngin an hngalh i, Khrih cu hi bantuk cun hngalh a si lo. Mah bantuk phungchimtu hna cu Bible a dal le a caang an zah mi hna piah in an hngalhnak an langhter mi le an i titer mi lawng a si. Annih nih Bible  kha a dal le  a caang le a cahmai tiang chim khawhnak in an hngalhnak kha an langhter i changreu cu an cheu bal lo. Khrih a hngal taktak mi nih cun Bible ca a dal le a caang (a ngan le a hme) kha an chim bal lo; Khrih hrimhrim nih a cawnpiak hna bantuk khan Khrih cawnpiak mi hna kha hmaan tein a fianh khawh. Annih nih an hngalh lo mi bia kha `hekter awkah stage show an piah, drama an vun chap i mi suaisawngnak kha an i zuam hi khuaruahhar awk a si lo.

Khrih le a cawnpiak mi hngalh awkah Khrih he changreu kha kan cheu hrimhrim awk a si; Khrih a nun bangin kan nun awk a si i, Khrih nih amah duhnak a tuah bal lo; vancung i a um mi a Pa duhnak kha a tuah zungzal. Khrih le a cawnpiak mi hngalhnak cu bia ah a um lo: kan nunning ah hmuh a si.

Khrih he changreu cheunak ti mi cu nawlngaihnak rianttuannak thawngin Khrih aa toidornak cawn awkah i tinhnak kha a si. Cucu sifah temhinnak kha a chim duh mi a si, tthatlonak tuah ruangah si loin, Khrih bantuk in tthatnak tuah ruangah sifah harnak in kha a chim duh mi a si. Zeicatiah Khrih cu a tthalo mi thil a tuah ruangah si loin ttatnak a tuah ruangah sifah temhnak a in. Cucu sal sinak kha a si, bawi sinak kha a si lo. Nangmah nih na pumpak duhnak vialte kha na vun zulh lo tikah cun nangmah cu Khrih he changreu cheu awkah timhcia in a um mi na si cang. Changreu cheunak nih zeihmanh kan si lo ti kha a kan cawnpiak. Kanmah le kanmah zei i kan i rel lo tik lawnglawng ah Khrih hngalh hram kha kan thok.

Khrih he changreu kan vun cheu hnu lawnglawng ah Bible sullam cu kan caah aa vun i hung. Annih nih kha hlan in an rak hngalh bal lo mi ningcang khan Bible kha theihthiam hram an i thok. Bible bia kha an vun theihthiam bangin midang sin zongah `hate in an hrilhfiah khawh cang hna . . . zeicatiah annih nih Khrih he changreu kha an cheu cang.

Emmaus khua lei i a kal mi zultu hna bantuk in si loin, lamkaltu hna cu hmanungbik zanriah an ei lio ah Khrih he changreu kha an cheu cang. Cu asicaah annih nih a thotthan mi Khrih kha khiangraang puan le pavuah men in fawite in an hmuh. Cu bantuk in hmanungbik an sin i a langh tikah khan fawite in Khrih kha an hngalh. Kannih nih Pathian kha kan hngalh lai, Pathian kha kan dawt lai i Pathian kha kan biak lai tiah kan chim. Kannih nih Khrih cu changreu cheunak thawngin kan hngalh i, changreu cheu cu a fawi mi rian a si lo: cucu lambi a si i mi tampi nih tuah an i zuam nain mi tlawmte lawng nih an tuah khawh mi lam a si. Khrih he changreu cheu cu mi tlawmte caah a hme mi thil a si zungzal . . . Jerusalem innkhaan chung i a si bantuk in le Emmaus lam i a rak si bangin.

Catial tu - Fr. Paul Thla Kio