Hruaitu Pawl Upat Peknak (Apeh)

1Siang 1:23 zongah Profet Nathan cu Pathian thimmi Israel Siangpahrang David hmaiah a lu a kun ti kan hmuh. Hi zong tah profet Nathan le David nih hin, keimah hlei in a dang hmaiah lukun in na bia lai lo timi nawlbia an buar maw? Asilo. Pathian tlaihchan mi pakhatkhat dawtnak in upat an i pekmi a si. 2 Siang 2:15 ah, “Jeriko khua i a ummi nih khan, Elisha kha an hmuh tikah Elijah thlarau cu Elisha cungah aa fu, tiah an ti. Cun amah don awkah khan an ra i amah hmaiah Vawlei lei hoih in an kun,” ti kan hmuh. Hi Bible zong nih Pathian rian`uantu hna kha lukun in upat an pekmi a si. Pathian sinak in an biakmi a si lo. 
    Cu bangin Bishop, Siangbawi, Sister hna peng an tlawn tikah sunglawi tein lukun in an biakchonh tawn hna. Pathian a tlaihchan deuh mi cheukhat nih cun Bishop hmaiah lukhun khukbil in an biakchonh `theo. Annih tuahsernak hi nawlbia an buar mi a si hnga maw? 1 Siang 1:31 ah, Solomon kha Siangpahrang ah an canter lai ah David nih a auh i a ra mi, “Bathsheba cu vawlei lei hoih in a kun i Siang-pahrang sin ahcun upatnak a tuah i David Siangpahrang ka Bawipa cu zungzal in nung ko seh,” a timi kan hmuh. Annih kha Pathian nih sual a phaw hna lo. Lukun in upatnak pek paoh ah nawlbia buar a si maw? 1Siang 18:3-47 ah, “Ahad nih Obadiah kha a kawh. Obadiah nih cun Bawipa kha fakpi in a upat i, Jezebel nih Bawipa profet hna a thah hna ahkhan, Obadiah nih profet zakhat a lak hna i sawmnga in lungkua ah a thuh hna i ti le rawl in a cawm hna,” ti kan hmuh
    Hi Bible ningin cun Obadiah timi pa hi Pathian kha zeitluk in a upatmi, zeitluk in a dawmi, profet nunnak tiang a rak khamhtu ti fiangte in kan hmuh. Hi lio caan hi mang`am a tlun caan a si i Ahad le Obadiah hna cu an sa`til hna, laa le rang hna an thih lonak ding caah ram cu `tol awkah an i phaw i khatte lei veve anmah lawngin an kal lioah (1Siang 18:5-6) Obadiah le profet Elijah an i tonnak cu hitin a si. 1Siang 18:7-8 ah, “Obadiah cu lam i a kal lioah khin, Elijah nih a rak ton. Obadiah nih cun a hngalh i a bawk i, “Ka bawipa Elijah, nangmah na si maw,” tiah a ti i anih nih keimah ka si, tiah a leh,” ti mi kan hmuh. Hika ah Pathian a upat tukmi hmanh nih Elijah kha a bawk i upatnak a pek. Nawlbia a buar ti a rak si lo. Pathian upatnak pek le minung upatnak pek kha thleidannak a rak langhter. Thleidan thiam a hau.
    1Chan 21:21 ah, “David cu Ornan lei i a rat lioah khan, Ornan nih cun a hei zoh i David cu a hmuh i phuhri cun a va chuak i vawlei lei hoih in, David cu upatnak a pek,” ti kan hmuh`han. Hihi upat hmaizah peknak a si. Nawlbia buar a si maw? 1Chan 29:20 ahcun, David Siangpahrang nih thla a cam dih hnuah,” Bawipa, nan Pathian cu thang`that ko u, tiah a ti hna bangin aa pummi vialte hna nih Bawipa, an pupa hna Pathian cu an thang`that i an lu an khun i Bawipa cu an biak i Siangpahrang cu hmaizahnak an pek,” tiah kan hmuh. Hi ahhin Pathian kha lukhun in an biak bangin David zong kha an biak i an upatmi a si. Annih nih Nawlbia an buar maw? A si hrimhrim lo. Kannih kha Pathian hmunah lukhun in biak le upat awktlak hruaitu, Biaknak lei hruaitu hna kha upatnak pek dingin an kan cawnpiak mi a si
    Daniel 2:46:49 ahcun, Siangpahrang Nebukhadnezzar mang sullam a lehpiak mi Daniel kha Siangpahrang nih cun, “A bawk i a biak i raithawinak le rimhmui khanghnak kha nan pekchanh lai, tiah nawl a pek hna. Cun rian kainak a pek i laksawng mansung tampi a pek i Babilon ram vialte uktu le Babilon mifim vialte haotu ah a ser,” ti kan hmuh. Hi Bible ahhin Pathian profet Daniel cu Siangpahrang nih upat a peknak a si. Bia 3:9 ah, “Filadelfia khua i a ummi zumtu Khrihfa hna sinah, Judah mi kan si tiah aa ti i a si `tunglo mi, mi lihchim pawl, Satan ta a simi kha, na hmaiah ka ratter hna lai i a kehram ah ka kunter hna lai, annih nih an dihlak in kan dawt kha an hngalh lai,” tiah a `tial. Cu khua i a ummi zumtu hna kha an ra lai i upatnak an in pek hna lai, tiah a tinak a si. Pathian sinak in an in biak hna lai a tinak a si lo. Salm 138:2 ah, “Na biakinn thiang hmaiah ka kun i kan thang`hat,” tiah a timi cu Pathian a biak kha a si i thleidan thiam a herh tukmi a si.

Cunglei i Bible hna ningin kan chim ahcun, khukbil tik paoh ah Pathian nawlbia buar a si lo i serhsat zong a si fawn lo. Catholic nih biaknak lei hruaitu Bishop, Siangbawi, Sister hna kha lukhun khukbil in upatnak an pekmi cu Bible ah mi sawhsawh hna nih profet hna kha khukbil lukhun in an upat hna caah a si. Khukbil paoh ah nawlbia a buar cang tiah kan ruah ahcun khukbilnak in pakhat le pakhat i chawnhbiak nak nunphung a ngeimi ram hna ah zeitindah kan nun lai. Kawl Budhish pawl nih an phungki pawl kha khukbil in an biak, an upatmi khi Pathian an si tiin an biakmi a si lo. Nu le Pa hna kha khukbil in upat kan pekmi hna zong nawlbia buar a si lo hlei ah nu le pa hmai khukbilnak cu Pathian nawlbia a simi Mt 15:4 i Jesuh bia a simi, “Na nu le na pa kha va upat hna; a nu siseh, a pa siseh a congoih mi cu thah siseh,” a timi Bible kha umtu ningcang in tehte langhternak a si. Cuti nu le pa upatnak cu Bawipa duh lo mi a si hrimhrim lo. Pathian nih cutin tuahsernak cungah, “Keimah kha nan ka bia lo, nawlbia nan buar” tiah zeitik hmanh ah a ti bal lai lo. Exo 20:12 ah, “Nan nu le nan pa kha upat hna u, cuti nan tuah ahcun, Bawipa nan Pathian nih an pekmi hna ram ah saupi nan um lai,” timi Bible kha cohlan nak a si.